ވެރިކަން ކުރާ ނިޒާމް ބަރުލަމާނީ ނިޒާމަކަށް ބަދަލުކުރަން ރައްޔިތުންގެ ފެންނަ ނުފެންނަ ވޯޓެއް ނެގުމަށް ޑިމޮކްރެޓްސްއިން ހުށަހަޅާފައިވާ ގަރާރު ފާސްކޮށްފައިވަނީ އަވަސް އަރުވާލައިގެން ކަމަށާއި، އެ ގަރާރުގައި ފުރިހަމަ ނުވާ އެތައް ކަމެއް ހުރިކަމަށް އެމްޑީޕީގެ ޕީޖީ ލީޑަރު މުހައްމަދު އަސްލަމް ވިދާޅުވެއްޖެ އެވެ. 

އަސްލަމް މިފަދައިން ވިދާޅުވެފައި ވަނީ ދިވެހިރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާއި ގުޅޭގޮތުން ރައްޔިތުންގެ ޚިޔާލު ހޯދުމުގެ އާންމު ވޯޓުނެގުމަށް މަޖިލީހުން ފާސްކޮށްފައިވާ ގަރާރާއި ގުޅޭގޮތުން އިލެކްޝަންސް ކޮމިޝަނުން ފޮނުވާފައިވާ ސިޓީއާއި ގުޅޭ މައްސަލައަށް މަޖިލީހުގެ 2023 ވަނަ އަހަރުގެ ތިންވަނަ ދައުރުގެ 7 ވަނަ ޖަލްސާގައި ވާހަކަދައްކަވަމުން ނެވެ. 

ވެރިކަމުގެ ނިޒާމު ބަދަލުކުރުމާއި ގުޅޭގޮތުން ދަ ޑިމޮކްރެޓްސްގެ ފަރާތުން ހުޅުދޫ ދާއިރާގެ މެންބަރު އިލްޔާސް ލަބީބު ހުށަހަޅުއްވާފައިވާ ގަރާރުގައި ބުނެފައި ވަނީ 30 އޮކްޓޯބަރު 2023ގެ ކުރިން ވެރިކަމުގެ ނިޒާމާއި ގުޅޭ ވޯޓު ނަގަންވާނެ ކަމަށެވެ. އަދި އެއީ ރައްޔިތުންނަށް އެންމެ ފައިދާހުރި ގޮތް ކަމަށެވެ. 

Advertisement

އެ ގަރާރާއި ގުޅޭގޮތުން މުޅި މަޖިލީހުގެ ކޮމިޓީން އެކުލަވާލި ރިޕޯޓް ފާސްކުރީ އެމްޑީޕީ ހިމެނޭހެން 29 މެންބަރުންގެ ވޯޓުންނެވެ. 

އެކަމާއި ގުޅޭގޮތުން މިއަދުގެ ޖަލްސާގައި ވާހަކަދައްކަވަމުން އަސްލަމް ވިދާޅުވީ ނިޒާމީ ވޯޓުގެ ގަރާރުގެ މަސައްކަތް ކުރިއަށް ގޮސްފައިވަނީ ވަރަށް ހައްސާސް ދަނޑިވަޅެއްގައި ކަމަށެވެ. އަދި އޭރުގެ ހާލަތަށް ބަލައި އެއް ދުވަސްތެރޭ ދިރާސާކުރެވި ގަރާރު ފާސްކުރި ނަމަވެސް އެއީ ވަރަށް އަވަސްއަރުވާލައިގެން ކުރެވުނު ކަމަކަށް ވާތީ ފުރިހަމަ ނުވާ އެތައް ކަންތައްތަކެއް ހުރިކަން އަސްލަމް ފާހަގަކުރެއްވި އެވެ. 

އަސްލަމް ވިދާޅުވީ ނިޒާމީ ވޯޓުގެ ގަރާރާއި ގުޅޭގޮތުން އިލެކްޝަންސް ކޮމިޝަނަށް ގިނަ ސުވާލުތަކެއް އުފެދިގެން ދިޔައީ ވެސް ގަރާރުގައި ފުރިހަމަ ނުވެ އެތައް ކަމެއް އޮތުމުން ކަމަށެވެ. 

އެހެންކަމުން ގަރާރާއި ގުޅޭގޮތުން އީސީން ފޮނުވާފައިވާ ސިޓީ މަޖިލީހުގެ ދާއިމީ ކޮމެޓީއަކަށް ގެންގޮސް ގަރާރާއި، އިލެކްޝަންސް ކޮމިޝަނުން ފޮނުވާފައިވާ ސިޓީގައި ހުރި ކަންބޮޑުވުންތަކާއި ބަލައި އެކަން ކުރިއަށް ގެންދެވޭނެ ގޮތްތައް ސާފުކޮށް ބަލައި ދިރާސާ ކުރުމަކީ ކުރަންޖެހޭ ކަމެއް ކަމަށް އަސްލަމް ވިދާޅުވި އެވެ. 

އަސްލަމް ވިދާޅުވީ ނިޒާމީ ވޯޓުގެ ވާހަކައަކީ ކުޑަ ވާހަކައެއް ނޫން ކަމަށެވެ. އަދި އެއީ ގައުމީ ވަރަށް ބޮޑު ނިންމުމެއް ކަމަށެވެ.

އެހެންކަމުން އަވަސް އަރުވާލައިގެން ކުރުމުގެ ބަދަލުގައި ދިރާސާތައްކޮށް ފުރިހަމައަށް އެކަންކަމާއި ގުޅޭގޮތުން ވާހަކަދެކެވިގެން ރަނގަޅު އިންތިޒާމެއްގެ ތެރެއިން އެ ކަންކަން ކުރިއަށް ގެންދިއުމަކީ މުހިންމު ކަމެއްކަމަށް އަސްލަމް ވިދާޅުވި އެވެ.