މިހާރު އެމަނިކުފާނުގެ އަމާޒަކީ ކުރިއަށް އޮތް ރައްޔިތުންގެ މަޖިލީހުގެ އިންތިޚާބު އެމްޑީޕީއަށް ކާމިޔާބު ކޮށްދިނުމަށް މަސައްކަތް ކުރެއްވުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހް މިފަދައިން ވިދާޅުވެފައި ވަނީ ނިޒާމީ ވޯޓާ ގުޅޭ ގޮތުން ނަގަން ތައްޔާރުވަމުންދާ ވޯޓުގައި އެމްޑީޕީން ގޮތް ނިންމާނެ ގޮތާއި ގުޅޭގޮތުން މަޝްވަރާ ކުރުމަށް ރޭ ބޭއްވުނު އެމްޑީޕީީ ގައުމީ މަޖިލީހުގެ ޖަލްސާގައި ވާހަކަ ދައްކަވަމުންނެވެ.
އެ ބައްދަލުވުމުގައި ވާހަކަ ދައްކަވަން ފަށްޓަވަމުން ރައީސް ޞާލިހު ވަނީ އެމަނިކުފާނަށް ރިޔާސީ އިންތިޚާބު ކާމިޔާބުކޮށްދެއްވަން ޕާޓީގެ މަޖިލިސް މެންބަރުންނާއި ޤައުމީ މަޖިލީހުގެ މެންބަރުންނާއި ދާއިރާގެ މެންބަރުން އަދި އާންމު މެންބަރުން ވަރަށް ބުރަ މަސައްކަތްތަކެއް ކުރެއްވި ކަން ފާހަގަކުރައްވައި އެހުރިހާ ބޭފުޅުންނަށް ޝުކުރު އަދާކުރައްވާފައެވެ.
އެއަށްފަހު އެމަނިކުފާނު ވިދާޅުވީ، ދެން އެ ޕާޓީން މަސައްކަތް ކުރަންވާނީ ޒިންމާދާރު އިދިކޮޅު ޕާޓީއެއްގެ ގޮތުގައި އޮވެގެން މަސައްކަތް ކޮށް ސަރުކާރު ޒިންމާދާރު ކުރުމުގެ މަސައްކަތް ކަމަށެވެ. އަދި އެއީ އެ ޕާޓީއަށް އައު ކަމެއް ނޫން ކަމަށާ، "ބައެއް ފަހަރު އެމްޑީޕީއަށް އިދިކޮޅު ޕާޓީއެއްގެ ގޮތުގައި އޮވެ މާރަނގަޅު މަސައްކަތްތައް ކުރެވޭ" ކަމަށް އެމަނިކުފާނު ވިދާޅުވިއެވެ.
މިއާއެކު ރައީސް ޞާލިހް ވަނީ، އެމަނިކުފާނުގެ މިހާރުގެ އަމާޒަކީ ކުރިއަށް އޮތް މަޖިލީހުގެ އިންތިޚާބު އެމްޑީޕީއަށް ކާމިޔާބު ކޮށްދެއްވުން ކަމަށާ، އަދި އެކަން ކުރުމަށާއި، ޖެހިގެން އަންނަ 2028 ވަނަ އަހަރު އެމްޑީޕީ ވެރިކަމަށް ގެނައުމަށް ކުރަންޖެހޭ މަސައްކަތްތައް ކުރައްވައި އެކަމުގައި އެމަނިކުފާނުގެ ފުރިހަމަ އެހީތެރިކަން ދެއްވާނެކަމަށް ވިދާޅުވެފައެވެ.
"އަޅުގަނޑުގެ ކުރިއަށް އޮތްތަނުގެ އަމާޒަކީ ކުރިއަށް އޮތް ރައްޔިތުންގެ މަޖިލިސް ހޯދައިދިނުން. 2028 ގައި މި ޕާޓީ ރާއްޖޭގެ ވެރިކަމަށް މި ޕާޓީ ގެނައުމަށް ކުރަންޖެހޭ މަސައްކަތްކުރުން،"
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރޭގެ ބައްދަލުވުމުގައި، މަޖިލީހުގައި މިހާރު ބަހުސް ކުރެވެމުންދާ ބަރުލަމާނީ ނިޒާމާގުޅޭ ގަރާރަށް ތާއީދު ނުކުރަން އެމްޑީޕީގެ މުޅި ގައުމީ މަޖިލީހުން ފާސްކޮށްފައިވާއިރު، ރައީސް ޞާލިހު ވަނީ ރާއްޖޭގައި ރިޔާސީ މިޒާމު ދަމަހައްޓަން ކުރެވެން ހުރި މަސައްކަތްތައް އެމަނިކުފާނު ކުރައްވާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
