އެމްޑީޕީ އިސްވެ އޮވެ ހިންގަމުން ދިޔަ ރައީސް އިބްރާހިމް މުހައްމަދު ޞާލިހުގެ ވެރިކަން ވައްޓާލީ ފާޅުގައި ކަމަށާއި، އެކަމާއި ރުޅިއައިސްގެން އެމްޑީޕީން އުޅޭނަމަ ދެން ވެސް ކުރިއެރުމެއް އެ ޕާޓީއަށް ނުލިބޭނެކަމަށް އެމްޑީޕީން ވަކިވެވަޑައިގެން ދަ ޑިމޮކްރެސްޓް އުފެއްދުމުގައި އިސްކޮށް އުޅުއްވި އެމްޑީޕީގެ ކުރީގެ ނައިބު ރައީސް އަހުމަދު ޝިފާޒު ވިދާޅުވެއްޖެ އެވެ.
ޝިފާޒު މިފަދައިން ވިދާޅުވެފައިވަނީ އެމްޑީޕީގައި އިސްކޮށް ތިބި ބައެއް ބޭފުޅުން އެ ޕާޓީ ދޫކުރައްވާ ނިކުމެވަޑައިގަތް ސަބަބާއި، އަދި އެމްޑީޕީގެ ވެރިކަން ނިމުމަކަށް ގެނައުމަށް މަސައްކަތްކުރަން ޖެހުނު ސަބަބުތަކަށް އަލިއަޅުވާލައްވާ ދަ ޑިމޮކްރެޓްސްގެ ޖަލްސާއެއްގައި ވާހަކަދައްކަވަމުން ނެވެ.
ޝިފާޒު ވިދާޅުވީ އެމްޑީޕީން މެމްބަރުންތަކެއް ވަކިވުމުގެ ކުރިން އޭރު ހަދަމުން ދިޔަ ގޯސްތަކުގެ ވާހަކަތައް ތަކުރާރުކޮށް ކިޔައިދީފައިވާނެ ކަމަށެވެ. އެހެން ނަމަވެސް އޭރު ދެއްކި އެއްވެސް ވާހަކައެއް އަޑުނާހާ ޕާޓީތެރެއިން އެއްފަރާތްކުރުމުގެ މަސައްކަތް ކުރަން ފެށުމުން، ޕާޓީން ވަކިވެ އާ ސިޔާސީ ޕާޓީއެއް އުފައްދައިގެން މަސައްކަތް ފަށާ އެކަން ކާމިޔާބުކޮށްފައިވާނެ ކަމަށް ޝިފާޒު ވިދާޅުވި އެވެ.
އެއާއެކު އޭނާ ވިދާޅުވީ އެއީ ސިއްރިއްޔާތުގައި ކުރި މަސައްކަތެއް ވެސް ނޫން ކަމަށެވެ. ކަންކަން ގޯސްކޮށް ހިންގަން ފެށުމުން، އެމްޑީޕީން ނިކުމެ އެ ވެރިކަން ބަދަލުކުރުމުގެ މަސައްކަތް ކުރަމުން ދިޔައީ ފާޅުގައި ކަމަށާއި، އެކަން އެ އޮތީ މިހާރު ކާމިޔާބުވެސް ކޮށްފައިކަމަށް ޝިފާޒު ވިދާޅުވި އެވެ.
އޭގެ އިތުރުން ޝިފާޒު ވިދާޅުވީ ގޮސްކޮށް ކުރި ކަމެއް ރަނގަޅުކުރުމަށް މަސައްކަތްކޮށް އެކަން ކާމިޔާބުކުރުމުން އެކަމާއި ރުޅިފަދަވެގެން މަސައްކަތް ކުރާނަމަ ދެން ވެސް އެމްޑީޕީއަށް ލިބޭނެ ކުރިއެރުމެއް ނޯންނާނެ ކަމަށެވެ.
"އެ ޕާޓީން އެއްފަރާތް ވެލާފަ ދަ ޑިމޮކްރެޓްސް އުފަންކޮށްފައި ސީދާ އެވެރިކަން ބަދަލުކުރަން ނިކުމެ އެކަން ކުރީ އަޅުގަނޑުމެން. ކީއްތޯ ކުރާނީ؟ އޭގެ މައްޗަށް މިއަދު ރުޅިގަދަވެގެން ތިބެގެން މާދަމާއެއް ނުލިބޭނެ"
އަހުމަދު ޝިފާޒު
ޝިފާޒު ވިދާޅުވީ އެމްޑީޕީއަށްވެސް އަދި ޕީޕީއެމް-ޕީއެންސީއަށް ވެސް ވެރިކަމަށް ކުރުމަށް ދެވަނަ ފުރުސަތު ލިބިގެންގޮސްފައިވާ ކަމަށެވެ. އެހެންކަމުން މާޒީން ފިލާވަޅު ދަސްކުރުމަކީ ކޮންމެ ބަޔަކުވެސް ކުރަން ޖެހޭނެ ކަމެއް ކަމަށެވެ.
އެގޮތުން ޑރ މުއިއްޒުގެ ވެރިކަން ވެގެންދާނީ ރާއްޖޭގެ ރައްޔިތުން އެދޭ ތަރައްގީއާއި ފާގަތިކަން ލިބިގެންދާނެ އުންމީދީ ވެރިކަމެއްކަމަށް ޤަބޫލުކުރައްވާ ކަމަށާއި، މީގެކުރިން އެ ޕާޓީން ވެރިކަން ކުރި ހިނގާފައިވާ ކަންކަމުން އިބުރަތް ހާސިލްކުރައްވާނެކަމަށް ދެކިވަޑައިގަންނަވާކަމަށް ވެސް ޝިފާޒު ވިދާޅުވި އެވެ.
އޭނާ ވިދާޅުވީ ސިޔާސީ ޕާޓީތަކުން މަސައްކަތް ކުރަނީ ޓާގެޓުތައް ހާސިލްކުރުމަށް ކަމަށެވެ. އެ މަސައްކަތްކުރާއިރު، އެ އިރެއްގައި ކުރަން ޖެހުނު ކަންކަން ކުރަމުންދާނެ ކަމަށާއި، އެއީ ކަންބޮޑުވާން ޖެހޭ ކަމެއް ނޫން ކަމަށެވެ. އަދި ރުޅިވެސް އިސްކުރަން ޖެހޭ ކަމެއް ނޫން ކަމަށެވެ.
Advertisement
This content is created and paid for by advertisers and does not involve Voice Journalists
