ރައްޔިތުންގެ މަޖިލީހުގެ މިއަދުގެ ޖަލްސާގެ ކޯރަމް ހަމަ ނުވެގެން ނިންމާލަން ޖެހުނު މައްސަލަ އަކީ ބައެއް މެންބަރުން ރާވައިގެން ހިންގާފައިވާ ކަމެއް ކަމަށް އެމްޑީޕީ ޕާލިމެންޓްރީ ގުރޫޕުގެ ލީޑަރު އަދި މަޖިލީހުގެ މެޖޯރިޓީ ލީޑަރު އައްޑޫ ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ތުހުމަތު ކުރައްވައިފިއެވެ.
މިއަދަށް އެޖެންޑާކުރި ރައްޔިތުންގެ މަޖިލީހުގެ ޖަލްސާ، މަޖިލީހުގެ ރިޔާސަތުގައި އިންނެވި މަޖިލީހުގެ ނާއިބު ރައީސް އީވާ އަބްދުالله ނިންމަވާ ލެއްވީ، 9:00 އިން ފެށިގެން ކޯރަމް ހަމަވޭތޯ ބަލަންޖެހޭ ވަގުތަށްވެސް ބެލުމަށްފަހު ޖަލްސާގެ ކޯރަމް ހަމަނުވުމުންނެވެ. މީގެ ކުރިންވެސް، މަޖިލީހުގެ މެޖޯރިޓީ މެންބަރުން ހިމެނޭ އެމްޑީޕީ މެންބަރުން މަޖިލީހަށް ވަޑައިގެން، މަޖިލީހުގެ ތަޅުމަށް ވަޑައިނުގަތުމުން ކޯރަމް ހަމަނުވެގެން ގިނަ ޖަލްސާތަކެއް ނިންމާލަން ޖެހުނުތަން ވަނީ ފެނިގެން ގޮސްފައެވެ.
އޭރު އެމްޑީޕީ ޕީޖީން އެކަމުގެ ސަބަބެއް ކަމަށް ދެއްކެވީ މުހިންމު ބިލުތައް ހުއްޓައި އެހެން މައްސަލަތައް އެޖެންޑާ ކުރުމެވެ.
ނަމަވެސް މިއަދުގެ އެޖެންޑާގައި ސަރުކާރުން ހުށަހަޅާފައިވާ މުހިންމު ބިލްތަކުގެ ބަހުސް ކުރުން ތާވަލް ކުރެވިފައި އޮތް އިރުވެސް ކޯރަމް ހަމަނުވާތީ ޖަލްސާ ޖެހުނީ ނިންމާލާށެވެ.
އެކަމާއި ގުޅިގެން ނޫސްވެރިއަކު ކުރި ސުވާލަށް ޖަވާބު ދެއްވަމުން، އެމްޑީޕީގެ ޕާލިމަންޓަރީ ގުރޫޕުގެ ފަރާތުން މިއަދު ރައްޔިތުންގެ މަޖިލީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އަސްލަމް ވިދާޅުވީ ކޯރަމް ހަމަވާވަރަށް މިއަދުވެސް މަޖިލީހަށް މެންބަރުން ހާޒިވެވަޑައިގެންނެވި ކަމަށެވެ. އެހެންނަމަވެސް، އެވަގުތު މަޖިލީހުގެ ތަޅުމުގައި މެންބަރުން ހަމަނުވާ ކަމަށާ، މެންބަރުން ހަމަ ކުރުމަށް ރިޔާސަތުން އެއްވެސް މަސައްކަތެއް ނުކުރާ ކަމަށް އަސްލަމް ވިދާޅުވިއެވެ.
"އެހެން ނަމަވެސް އެވަގުތު ފްލޯގައި (ކޯރަމް ހަމަވާވަރަށް މެންބަރުން) ނެތީ. އާއްމު އުސޫލެއްގެ ގޮތުން ފްލޯގައި ބޭފުޅުން މަދުވާ ކަމުގައި ވަނީ ނަމަ މަޖިލީހުގެ ރިޔާސަތުން އިދާރީ މޭޒުން ބޭފުޅުން ފޮނުއްވަވާ، މެންބަރުންނާ ވާހަކަ ދައްކަވާ، މެންބަރުން ހަމަ ކުރައްވާ. އެހެން ނަމަވެސް، އެފަދަ އެއްވެސް ކަމެއް ނެތި މިއަދުގެ ޖަލްސާ ނިންމަވާލެއްވީ." އަސްލަމް ވިދާޅުވި އެވެ.
މިއާއެކު އަސްލަމް ވަނީ މިއަދުގެ ޖަލްސާގެ ކޯރަމް ހަމަ ނުވީ، ގަސްތުގައި ބައެއް މެންބަރުން އެހެން އެކަން ކުރަން ބޭނުން ވެގެން ކަމަށް ތުހުމަތު ކުރައްވާފައެވެ.
އަދި އަޅުގަނޑުމެންނަށް ފާހަގަ ކުރެވުނު ބައެއް ޕާޓީތަކަށް ނިސްބަތްވާ މެންބަރުން، ޚާއްސަކޮށް ދަ ޑިމޮކްރެޓްސް އަށް ނިސްބަތްވާ ބޭފުޅުން، ހަމަ ފުލޯއަށް ވަދެ ވަޑައިގެންފައި، ދޮރުން އެތެރެ ބަލާލުމަށްފަހު ބޭރަށް ވަޑައިގެންނެވި. އެހެންވީމާ އަޅުގަނޑުމެންނަށް ވަރަށް ބޮޑަށް ފާހަގަކުރެވޭ ރޭވިގެން މިއަދުގެ ޖަލްސާ ކޯރަމް ހަމަނުކުރުމަށް، ކަނޑައެޅިގެން ރޭވިގެން ހިނގިކާމެއްގެ ގޮތުގައި އަޅުގަނޑުމެން ފާހަގަކުރަން."
މެޖޯރިޓީ ލީޑަރު މުހައްމަދު އަސްލަމް
އަސްލަމް މިފަދައިން ވިދާޅުވެފައި ވާއިރު، މަޖިލީހުގައި ޖުމްލަ 87 މެންބަރުން ތިއްބަވާއިރު، އޭގެ ތެރެއިން އެމްޑީޕީ މެންބަރުންގެ އަދަދު 50 އަށްވުރެ ގިނަ އެވެ. ކޯރަމް ހަމަވާން ބޭނުންވަނީ 22 މެންބަރުންނެވެ.
Advertisement
This content is created and paid for by advertisers and does not involve Voice Journalists
