ރައްޔިތުންގެ މަޖިލީހުގެ ނިޒާމު ގެއްލުވާލާ އެމްޑީޕީއަށް ނިސްބަތްވެވަޑައިގަންނަވާ މެމްބަރުން ޖަލްސާ ދޫކުރައްވާ ވަޑައިގެންފި އެވެ. 

މިއަދު ކުރިއަށް ދަނީ ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ 9 ވަނަ ޖަލްސާއެވެ. މި ޖަލްސާ ފެށިގެން ދިޔައިރު އޮނަތިރީސް މެމްބަރުން މަޖިލީހަށް ހާޒިރުވެތިއްބެވިކަން ރިޔާސަތުން ވަނީ ހާމަކުރައްވާފަ އެވެ. 

މިއަދުގެ ޖަލްސާގައި އެންމެ ފުރަތަމަ ވާހަކަދެކެވުނީ ސަރުކާރުގެ ފަރާތުން ކޮމަންޑޫ ދާއިރާގެ މެމްބަރު މުހައްމަދު ރަޝީދު ހުށައަޅުއްވާފައިވާ، ޤާނޫނު ނަންބަރު 2\2022 (ކުނި މެނޭޖުކުރުމުގެ ޤާނޫނު) އަށް އިސްލާހު ގެނައުމުގެ ބިލުގެ ބަހުސް ކުރިއަށް ގެންދިއުމެވެ. 

މި އިސްލާހަށް ބަހުސްކެއްވި އެންމެ ފަހު މެމްބަރު ވެލިދޫ ދާއިރާގެ މެމްބަރު މުޙައްމަދު އަބްދުالله ޝަފީގު ވާހަކަދައްކަވަމުން ވަނީ ކުނި މެނޭޖުކުރުމުގެ ޤާނޫނަށް ހުށައެޅި އިސްލާހުގެ މަސައްކަތް ލަސްވެގެން ދިޔައީ ރިޔާސަތުން ޒިންމާދާރުކަމާއެކު މަޖިލީހުގެ މަސައްކަތްތައް ކުރިއަށް ގެންދިއުމުގައި އެއްބާރުލުން ނުދޭތީކަން ފާހަގަކޮށް ވަރަށް ބޮޑަށް ފާޑުވިދާޅުވެފަ އެވެ. 

މެމްބަރު ޝަފީގު ވާހަކަދައްކަވަމުން ދަނިކޮށް މަޖިލީހުގެ މެދުހެންވޭރު ދާއިރާގެ މެމްބަރު އަލީ އާޒިމް ވަނީ ނިޒާމީ ނުގުތާއެއް ނަންގަވާ އެމްޑީޕީގެ މެމްބަރުން ޖަލްސާތަކަށް ވަޑައިނުގެންނެވުމުގެ ސަބަބުން މަޖިލީހުގެ ކޯރަމް ހަމަނުވެ އެތައް ޖަލްސާއެއް ނުބޭއްވި ކެންސަލްކުރަން ޖެހިފައިވާކަން ހަނދާންކޮށްދެއްވާފަ އެވެ. 

އަލީ އާޒިމްގެ އެ ވާހަކަތަކަށް ރައްދުދިނުމަށް މަޖިލީހުގެ ކެނދިކުޅުދޫ ދާއިރާގެ މެމްބަރު އީސަ ނިޒާމީ ނުގުތާއެއް ނަންގަވާ އެޔަށް ރައްދުދެއްވިއެވެ. އެވަގުތު މަޖިލީހުގެ ރިޔާސަތު ބަލަހައްޓަވަމުން ގެންދެވި މަޖިލީހުގެ ނައިބު ރައީސާ އީވާ އަބްދުالله ވަނީ އެ ދެބޭފުޅުންގެ ނިޒާމީ ނުގުތާވެސް ބަލައިނުގަންނަކަން ހާމަކުރައްވާ އިސްލާހަށް ވާހަކަދެއްކެވުން ކުރިއަށް ގެންދެވުމަށް މެމްބަރު ޝަފީގުގެ އަރިހުން އެދިވަޑައިގެންފި އެވެ. 

އެހެން ނަމަވެސް އީސަ ތަކުރާރުކޮށް ނިޒާމީ ނުކުތާއަށް އެދިވަޑައިގަންނަމުން ދިޔައެވެ. އަދި ނިޒާމީ ނުކުތާ ނުދީ މަޖިލީހުގެ ރިޔާސަތުން ޖަލްސާ ކުރިއަށް ނުގެންދެވޭނެކަމަށް ވިދާޅުވަމުން ގެންދެވިއެވެ. 

އެފަހުން މަޖިލީހުގެ ނައިބު ރައީސާ އީވާ ވަނީ ކުނިމެނޭޖުކުރުމުގެ ޤާނޫނަށް ހުށައެޅި އިސްލާހުގެ ބަހުސް ނިންމަވާލެއްވުމަށްފަހު އީސައަށް ފުރުސަތު އަރުވާފައެވެ. އެ ފުރުސަތުގައި އީސަ ވަނީ ވާހަކަފުޅުވެސް ދައްކަވާފަ އެވެ. އަދި މަޖިލީހުގެ ރިޔާސަތުން ޖަލްސާ ކުރިއަށް ގެންދިއުމުގައި ތަފާތުކުރުންތައް ގެންގުޅޭކަން ފާހަގަކުރައްވާ ނުރުހުން ފާޅުކުރައްވާފަ އެވެ. 

އޭގެ ފަހުން ރައްޔިތުންގެ މަޖިލީހުގެ ތިނަދޫ ދާއިރާގެ މެމްބަރު ސަނީފް ވެސް މަޖިލީހުގެ ރިޔާސަތު އީވާ ބަލަހައްޓަވަމުން ގެންދަވާގޮތަށް ވަރަށް ބޮޑެތި ފާޑުކިޔުންތަކެއް އަމާޒުކުރައްވާފަ އެވެ. 

އެފަހުން މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ހުށައަޅުއްވާފައިވާ އިންޑަސްޓްރިއަލް ރިލޭޝަންސްއާއި ބެހޭ ބިލުގެ ބަހުސް ފެއްޓުމާއެކު މަޖިލީހުގެ އެމްޑީޕީއަށް ނިސްބަތްވާ މެމްބަރުން ވަނީ ޖަލްސާ ދޫކުރައްވާ ވަޑައިގެންފައެވެ. އެކަން މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ރިޔާސަތުގެ ސަމާލުކަމަށް ގެންނެވިއެވެ. 

ރިޔާސަތުން ވެސް ވަނީ ނިޒާމު ގެއްލުވާލާ އެމްޑީޕީއަށް ނިސްބަތްވެވަޑައިގަންނަވާ މެމްބަރުން ޖަލްސާ ދޫކުރައްވާ ވަޑައިގެންފައިވާކަން ރިޔާސަތުގެ ސަމާލުކަމަށް އައިސްފައިވާކަމަށް ވިދާޅުވެފަ އެވެ. އެހެން ނަމަވެސް މަޖިލީހުގެ މަސައްކަތްތައް ކުރިއަށް ގެންދިއުމަށް މަސައްކަތްޕުޅު ކުރައްވާނެކަމަށް އީވާ ވިދާޅުވި އެވެ.