ވެރިކަން ބަދަލުވާ މަރުހަލާގައި މަގާމް ތަކަށް އިތުރު މީހުން ނެގުން ހުއްޓުވުމަށް ރައްޔިތުންގެ މަޖިލީހުން އަމުރެއް ނެރެދޭންޖެހޭ ކަމަށް މެދުހެންވޭރު ދާއިރާގެ މެންބަރު އަދި ދަ ޑިމޮކްރެޓްސް ގެ ޕީޖީ ލީޑަރު ޢަލީ ޢާޒިމް ވިދާޅުވެއްޖެއެވެ. 

އިންތިޤާލީ މަރުހަލާ ފަށައިގެން މިހާރު ކުރިއަށް ގެންދާއިރު، ސަރުކާރުން މި ވަގުތު ހަތް ކަމެއް މަޑުޖައްސާލަން އެދިވަޑައިގެން އިންތިހާބީ ރައީސް ޑރ. މުހައްމަދު މުއިއްޒުގެ ސިޓީފުޅެއް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް މިމަހު 5 ވަނަ ދުވަހު ވަނީ ފޮނުއްވާފައެވެ. 

އެގޮތުން އެދިލެއްވި ކަންކަމުގެ ތެރޭގައި، ދައުލަތުގެ އެއްވެސް ވަޒީފާއަކަށް އަލަށް މީހަކު ނުވެއްދުން އަދި މަޤާމުގެ ކުރިއެރުން ނުދިނުން ހިމެނެއެވެ. 

Advertisement

އެހެންނަމަވެސް، އިއްޔެވެސް ރައީސް ޞާލިހު ވަނީ ޕާކިސްތާނަށް އައު ސަފީރަކު ނަގަން ސަފީރަށް ރުހުން ހޯދަން މަޖިލީހަށް ފޮނުއްވާފައެވެ. އެގޮތުން ރައީސް ޞާލިހު މަޖިލީހަށް ފޮނުއްވި ސިޓީ، އަމީން އިއްވެވުމާއި އެކު ޢާޒިމް ވަނީ ނިޒާމީ ނުކުތާ ނަންގަވައި އެކަމާއި މެދު ކަންބޮޑުވުން ފާޅުކުރައްވާފައެވެ. 

ޢާޒިމް ވިދާޅުވީ ވެރިކަން ބަދަލުވާ ކޮންމެ ފަހަރަކު، ވެރިކަން ބަދަލުވާ މަރުހަލާގައި އައު ވަޒީފާތަކަށް މީހުން ނެގުމުގެ ކަންކަން ހިނގާއިރު, ގާނޫނު އަސާސީން ރައްޔިތުންގެ މަޖިލީހަށް ލިބިދޭ ބާރުގެ ބޭނުން ކޮށްގެން އެފަދަ ކަންކަން ނުކުރެވޭ ގޮތަށް އަމުރެއް ނެރެން ޖެހޭ ކަމަށެވެ. 

 ޢާޒިމްގެ އިތުރުން މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވެސް ވަނީ އައު ސަފީރުން ނަގާތީ އެކަމާއި މެދު ނުރުހުން ފާޅު ކުރައްވާފައެވެ. އަދި ރިޔާސީ ނިޒާމެއްގައި އެފަދައިން ކަންކަން ނުކުރެވޭނެ ކަމަށްވެސް އޭނާ ވަނީ ވިދާޅުވެފަ އެވެ.