ޖުޑިޝަލް ސާވިސް ކޮމިޝަންގެ ޤާނޫނަށް ސަރުކާރުގެ ފަރާތުން، ހިތަދޫ އުތުރުދާއިރާގެ މެމްބަރު މުހައްމަދު އަސްލަމް ހުށައަޅާފައިވާ އިސްލާހު އޮތްގޮތުން ޖޭއެސްސީ ސިޔާސީ ނުފޫޒުތަކުން މިނިވަންވާތަން ފެނިވަޑައިނުގަންނަވާކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ޠާރިގު ވިދާޅުވެއްޖެ އެވެ. 

ޠާރިގު މިފަދައިން ވިދާޅުވެފައި ވަނީ ޖޭއެސްސީގެ ގާނޫނަށް ހުށައަޅާފައިވާ އިސްލާހަށް މަޖިލީހުގެ މިއަދުގެ ޖަލްސާގައި ބަހުސްކުރައްވަމުންނެވެ. 

ތާރިގު ވިދާޅުވީ ޖޭއެސްސީގެ ކޮމްޕޮސިޝަނަށް ތިންފަހަރު މަތިން އިސްލާހު ހުށައެޅި ނަމަވެސް އެމްޑީޕީން އެ އިސްލާހުތައް ބޭރުކޮށްލާފައި ވާއިރު، އެ އިސްލާހުތަކަކީ ވަރަށް ގިނަ ގޮތްގޮތަށް ބެލުމަށް ފަހު، ޤާނޫނީ ގޮތުން ފުންނާބު އުސް ފަރާތްތަކާއި، ފެހި ޤާނޫނު އަސާސީ އެކުލަވާލިއިރު ޚާއްސަ މަޖިލީހުގައި ތިއްބެވި ބައެއް މެމްބަރުންނާއި ވެސް މަޝްވަރާ ކުރުމަށްފަހު ހުށައެޅި އިސްލާހުތަކެއް ކަމަށެވެ. 

Advertisement

އެ އިސްލާހުތަކުގައި ޖޭއެސްސީގެ ކޮމްޕޮސިޝަނަށް ގެންނަ ބަދަލުތަކުގެ ތެރޭގައި މަޖިލީހުގެ ރައީސް ޖޭއެސްސީގައި ނުހިމެނުމަށް ނިންމާ، އޭގެ ބަދަލުގައި ލެކްޗަރާއިންނާއި، އެހެން ސެކްޓާތަކަށް ނިސްބަތްވާ ފަރާތްތައް ހިމެނުމަށް ހުށައަޅާފައިވާނެކަމަށް ތާރިގު ވިދާޅުވި އެވެ. އޭނާ ވިދާޅުވީ އޭގެ ބޭނުމަކީ ސިޔާސީ ނުފޫޒުތަކުން އެ ކޮމިޝަން މިނިވަންކުރުން ކަމަށެވެ.

އެހެން ނަމަވެސް އޭރު އެމަނިކުފާނު ހުށައެޅި އިސްލާހުތައް ބޭރުކޮށްލުމަށްފަހު، މިހާރު ސަރުކާރުން ހުށައަޅާފައިވާ އިސްލާހުގައި ހުރި ކަންކަމަށް ބަލާއިރު، ޖޭއެސްސީ އިސްލާހުކުރުމަށް ސަރުކާރުން ހުށައަޅާ މަޤްސަދު ހާސިލް ނުވާކަމަށް ތާރިގު ވިދާޅުވި އެވެ. އަދި މިހާރު ސަރުކާރުން ހުށައަޅާފައިވާ އިސްލާހު ފާސްކުރިޔަސް ޖޭއެސްސީއަށް އޮންނަ ސިޔާސީ ނުފޫޒުތަކުން އެ ކޮމިޝަން މިނިވަންވާނެކަމަށް ދެކިވަޑައިނުގަންނަވާކަމަށް ޠާރިގު ވިދާޅުވި އެވެ. 

މެމްބަރު ޠާރިގުގެ ވާހަކައިގައި ވަނީ ޝަރުއީ ދާއިރާ އިސްލާހުކުރުމާއި ގުޅޭ އެހާ މުހިންމު އިސްލާހެއް އެމްޑީޕީގެ ވެރިކަން ނިމެން މަސްދުވަހަށް ކުޑަވުމުން ހުށައެޅި ހުށައެޅުމަށް ވަރަށް ބޮޑަށް ފާޑުވިދާޅުވެފަ އެވެ. 

އެގޮތުން ޠާރިގު ވިދާޅުވީ ޖޭއެސްސީގެ ކޮމްޕޮސިޝަން ބަދަލުކޮށް އެ ކޮމިޝަން ސިޔާސީ ނުފޫޒުތަކުން މިނިވަންކުރުމަކީ ރައީސް އިބްރާހިމް މުޙައްމަދު ޞާލިހުގެ ރިޔާސީ ވައުދުފުޅެއް ކަމަށެވެ. އަދި އެއީ ވެރިކަމަށް ހުވާކުރައްވާތާ ފުރަތަމަ 100 ދުވަސްތެރޭ ކުރައްވާނެ ކަންކަމުގެ ތެރޭގައި ވެސް ހިމަނުއްވާފައިވާ ވައުދެއް ކަމަށެވެ. 

ރައީސް ޞާލިހުގެ އެ ވައުދުފުޅު ފުއްދުމަށް އެމްޑީޕީ މެޖޯރިޓީ އޮތް މަޖިލީހުން މިހާތަނަށް އެއްވެސް މަސައްކަތެއް ކޮށްފައިނުވާއިރު، އެކަން ކުރުމަށް ހުށައެޅި އިސްލާހުތައްވެސް ބޭރުކޮށްލާފައިވާކަން ޠާރިގު ވަނީ ހަނދާން އާކޮށްދެއްވާފަ އެވެ. އަދި ޖޭއެސްސީ އިސްލާހުކުރުމުގެ ނަމުގައި މިހާރު ހުށައަޅާފައިވަނީ ނަމެއްގައި އޮތް އިސްލާހެއް ކަމަށް ޠާރިގު ވިދާޅުވި އެވެ.