އެމްކޭޓީ ކެޕިޓަލް ކިޔާ އަމިއްލަ ކުންފުންޏަކަށް 650،000 އަށް ވުރެ ގިނަ ޑޮލަރު (10 މިލިއަނަށް ވުރެ ގިނަ ރުފިޔާ) ދައްކަން ލިލީ އެންޓަޕްރައިސަސްގެ މައްޗަށް ސިވިލް ކޯޓުން ހުކުމްކޮށްފި އެވެ.

މި މައްސަލަ އަކީ، އެމްކޭޓީ ކެޕިޓަލް ޕްރައިވެޓް ލިމިޓެޑް ނަމަކަށް ކިޔާ ކުންފުންޏެއް މެދުވެރިކޮށް ލިލީ އެންޓަޕްރައިސަސް އިން އެއް މިލިއަން އެއް ލައްކަ (-/1,100,000$) އެމެރިކާ ޑޮލަރު ގަތުމަށްފަހު އެމްކޭޓީ ކެޕިޓަލް އަށް ހަ ލައްކަ ފަންސާސް ހާސް ޑޮލަރު ނުދައްކާ އޮތުމުން، އެ ފައިސާ ހޯދުމަށް އެދި ދައުވާ ކޮށްފައިވާ މައްސަލަ އެކެވެ. 

މި މައްސަލާގައި ދައުވާ ކުރި އެމްކޭޓީ ކެޕިޓަލް ޕްރައިވެޓް ލިމިޓެޑް އިން ބުނެފައިވާ ގޮތުގައި އެ ނުލިބިވާ ފައިސާ ހޯދުމަށް އެތައް ފަހަރެއްގެ މަތިން ލިލީ އަށް އެންގުމުން ވެސް ލިބިފައެއް ނުވެއެވެ. 

އެހެންކަމުން އެފައިސާ ނުލިބުމުގެ ސަބަބުން ޖޫރިމަނާގެ ގޮތުގައި، ދިހަ މިލިއަން ހަތަރުލައްކަ ހަތްހާސް ފަސްސަތޭކަ އެމެރިކާ ޑޮލަރު ހޯދުމަށާއި، އެކު ޖުމްލަ އެގާރަ މިލިއަން ފަސްލައްކަ ހަތްދިހަ ހާސް ފަސްސަތޭކަ އެމެރިކާ ޑޮލަރަށްވާ ފައިސާ އާއި ގާނޫނީ ޚަރަދުގެ ގޮތުގައި 15,000 ރުފިޔާ ލިލީ އަތުން ހޯދުމަށް ވެސް އެމްކޭޓީ ކުންފުނިން ދައުވާކޮށްފައި ވެއެވެ. 

ސިވިލް ކޯޓުން މި މައްސަލަ ބެއްލެވި ގާޒީ ވަނީ އެމްކޭޓީ ކެޕިޓަލް މެދުވެރިކޮށް ލިލީ އިން ގަނެފައިވާ، 650،000 ޑޮލަރު ނަގުދު ފައިސާއިން ދިން ކަމަށް ލިލީއިން ބުންޏަސް، އެކަން ސާބިތުކޮށް ނުދެވޭ ކަމަށް ކަނޑައަޅުއްވާފައެވެ. އެހެންކަމުން، އެ ފައިސާ މިއަދުން ފެށިގެން އެއް މަސްދުވަހުގެ ތެރޭގައި ދައްކަން ލިލީ އަށް ވަނީ ހުކުމް ކޮށްފައެވެ. 

މީގެ އިތުރުން، އެ ފައިސާ ނުދެއްކުމުން ޖޫރިމަނާގެ ގޮތުގައި 10.4 މިލިއަން ޑޮލަރާއި ގާނޫނީ ފީގެ ގޮތުގައި 15,000 ނަގައިދޭން އެމްކޭޓީ ކެޕިޓަލް އިން އެދިފައި ވީ ނަމަވެސް ސިވިލް ކޯޓުން ނިންމީ އެ ފައިސާ ނަގައި ނުދެވޭނެ ކަމަށެވެ.

މީގެ ކުރިންވެސް އާންމު ވިޔަފާރިވެރި އަކަށް 9.3 މިލިއަން ރުފިޔާ ދައްކަން ލިލީ އެންޓަޕްރައިސަސް ޕްރައިވެޓް ލިމިޓެޑުގެ މަައްޗަށް ސިވިލް ކޯޓުން ހުކުމް ކޮށްފައިވެއެވެ.