އެމަނިކުފާނުގެ ސަރުކާރުގައި ކައުންސިލްތަކަށް ފުރިހަމަ އެއްބާރުލުންދީ އެއްވެސް ހުރަހެއް ނެތި ކައުންސިލްތަކުގެ ޒިންމާތައް އަދާކުރުމުގެ މަގު ފަހިކޮށް ދެއްވާނެކަމަށް އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މާލެ ސިޓީ ކައުންސިލްގެ މުވައްޒިފުންނާއި މާލޭގެ މޭޔަރުގެ ހައިސިއްޔަތުން އެންމެ ފަހު ފަހަރަށް ބައްދަލު ކުރައިވަ ވާހަކަފުޅު ދައްކަވަމުން ޑރ. މުއިއްޒު ވިދާޅުވީ ވޭތުވެދިޔަ ދެ އަހަރާއި ބައި ތެރޭގައި ބޮޑެތި ގޮންޖެހުންތަކަކާއެކު ވެސް ރަނގަޅު މަސައްކަތްތަކެއް ކޮށްފައިވާ ކަމަށެވެ. އަދި އެ ގޮންޖެހުންތައް ކުރިމަތި ނުވި ނަމަ މާލެއަށް މާ ފުރިހަމަކޮށް ކަންކަން ކޮށް ދެވުނީސް ކަމަށާ، އެހެން ނަމަ، ހުންނާނީ މަގުތައް ހެދި، ޕާކިން މަލްޓިސްޓޯރީ އެތައް ބިލްޑިންއެއް އަޅައި ޕާކިންގެ ބޮޑު މައްސަލަ އަށް ހައްލެއް ލިބިފައި ކަމަށް އެމަނިކުފާނު ވިދާޅުވި އެވެ.
މުޢިއްޒު ވިދާޅުވީ ޕާކިންގ މައްސަލަ އާއި މަގުހެދުމުގެ މައްސަލަ ފަދަ މައްސަލަ ތައް ހައްލު ކުރުމަށް އެންމެ ފަހު މަރުހަލާ އާ ހަމައިން ހުއްދަ ނުލިބި މަސައްކަތް މަޑު ޖެހިފައިވާ ކަމަށެވެ.
މިއާއެކު މުޢިއްޒު ވިދާޅުވީ، ނޮވެމްބަރު 17 ގައި ރައީސްކަމުގެ ހުވާ ކުރައްވާ އައު ސަރުކާރުގެ މަސައްކަތް ފެށޭ ހިސާބުން އެ ހުރިހައި ކަމެއް ފަހިކޮށްދީ މާލޭގެ ރައްޔިތުން އެދޭ ކަންކަން ހަގީގަތަކަށް ހައްދަވައި ދެއްވާނެ ކަމަށާއި އެ ވެރިކަމުގައި މަސައްކަތް ކުރުމަށް ނަންގަވާނީ ގާބިލް ބޭފުޅުން ކަމަށް ވެސް ވަނީ ވިދާޅުވެފައެވެ. އަދި އެމަނިކުފާނުގެ ސަރުކާރު ގާއިމްވުމުން ހަގީގީ މާނައިގައި ފުރިހަމަ ލާމަރުކަޒީ ނިޒާމެއްގެ ތެރެއިން ހިދުމަތްތައް ދެމުން އަންނަތަން ރައްޔިތުންނަށް ފެންނާނެ ކަމަށްވެސް މުއިއްޒު ވިދާޅުވި އެވެ.
ދެން އޮތް ދުވަސްތަކަކީ މި ނިމިގެން ދިޔަ ދެ އަހަރާ ބަޔަށް ވުރެ ވެސް މާ ފުރިހަމަ ގޮތެއް ގައި ހިދުމަތް ދޭނެ ދުވަސްތަކަކަށް ވާނެ. އެހީތެރިކަން ފޯރު ކޮށްދިނުމަށް މި ހުރީ ތައްޔާރަށް. އެކަމުގެ ޔަގީންކަން އަރުވަން.
އިންތިޚާބީ ރައީސް ޑރ މުހައްމަދު މުއިއްޒު
Advertisement
This content is created and paid for by advertisers and does not involve Voice Journalists
