ފަލަސްޠީނަށް ގަދަކަމުން ވެރިވެގެންފައިވާ ހަރުކަށި ޔަހޫދީން ހިންގަމުންދާ ލާއިންސާނީ ޖަރީމާތަކުގެ ތެރެއިން ރޭ ފަލަސްތީނުގެ އަލް އަހްލީ ހޮސްޕިޓަލަށް ދިން ޓެރެރިސްޓް ހަމަލާ ކުށްވެރިކޮށް، އަރަބި ގައުމަތަކާއި މުސްލިމް ހުރިހާ ގައުމަކުން މަގުތަކަށް ނުކުމެ އިހްތިޖާޖު ކުރުމަށް ފަލަސްޠީނުން ގޮވާލި ގޮވާލުމަށް ރާއްޖެއިން އިޖާބަދީފިއެވެ.
ފަލަސްޠީނުގެ ހޮސްޕިޓަލަށް ދެވުނު އެ ޓެރަރިސްޓް ހަމަލާއަށްފަހު، އެ ގައުމުގެ މިނިވަންކަމަށްޓަކައި ޖިހާދު ކުރަމުންދާ ހަމާސްގެ ސީއަރ ލީޑަރެއް ކަމަށްވާ އިސްމާޢީލް ހާނިޔޭ މީޑިއާއަށް ދެއްވި ބަސްދީގަތުމެއްގައި އޭނާ ވަނީ، ޔަހޫދީންގެ އެ ލާ އިންސާނީ ޖަރީމާ ކުށްވެރިކޮށް އަރަބި އަދި މުސްލިމް ހުރިހާ ގައުމުތަކެއްގެ ރައްޔިތުން އަޑު އުފުލުމަށް ގޮވާލާަފައެވެ.
ހަމާސްގެ އެ ލީޑަރ ގެ ގޮވާލުމަށް އިޖާބަދެއްވައި، އިމްރާން ކުރެއްވި ޓުވީޓެއްގައި ވިދާޅުވީ، ރާއްޖޭގެ ހުރިހާ ރަށެއްގެ ރައްޔިތުންގެ ބޮޑު އެއްވުމެއް އިންތިޒާމުކުރުމުގެ މަސައްކަތް މިހާރު ކުރިއަށްދާ ކަމަށެވެ.
ރޭ އިޒްރާއިލްގެ ޔަހޫދީން އަލް އަހްލީ ހޮސްޕިޓަލަށް ދިން ހަމަލާގައި 900 އެއްހާ މީހުން ވަނީ ޝަހީދުވެފައެވެ. "ވޮއިސް" ގެ މުރާސިލް ވިދާޅުވެފައިވަނީ އިޒްރާއިލުން ހަމަލާދިން އަލް އަހްލީ ހޮސްޕިޓަލަކީ ގިނަ ޢަދަދެއްގެ ބަޔަކު، އެހެން ތަންނަތަނަށްވުރެ ބޮޑަށް ރައްކާތެރިކަން ލިބޭނެ ކަން ޤަބޫލު ކޮށް ވަގުތީ ހިޔަލެއްގެ ގޮތުގައިވެސް ބޭނުންކުރަމުން ދިޔަ ތަނެއް ކަމަށެވެ. އަދި އެއީ ކްރިސްޓިއަނުންގެ ބަޔަކު ފަންޑުކޮށްގެން ހިންގާ ތަނެއް ކަމަށްވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
