ކުޅުދުއްފުށީ އެއަރޕޯޓްގެ ފަޔަރ ޓްރެއިނިންގް ގައި ބޭނުންކުރާ ސިލިންޑަރެއް ރިފިލް ކުރުމުގެ ތެރޭގައި ގޮވައިގެން އަނިޔާވެ ހާލު ސީރިއަސްވި އެއާޕޯޓް މުވައްޒަފަކު އިތުރު ފަރުވާއަށް މާލެ ގެނެސްފި އެވެ.
އިއްޔެ ހެނދުނު ހިނގި މިހާދިސާ އާއި ގުޅޭގޮތުން މައުލޫމާތު ދެއްވަމުން އިއްޔެ ފުލުހުންގެ މީޑިއާ އޮފިޝަލް ވިދާޅުވީ މިހާދިސާގައި އަނިޔާވެފައިވަނީ ކުޅުދުއްފުށީ އެއަރޕޯޓްގެ ފަޔަރ ގައި މަސައްކަތްކުރާ ހަތަރު މުވައްޒަފަކަށް ކަމަށާއި އަނިޔާވި މީހުންނަށް ކުޅުދުއްފުށީ ހޮސްޕިޓަލުގައި އޭރު ފަރުވާދެވެމުން ދާކަމަށެވެ.
އަދި ހާދިސާގައި އަނިޔާ ލިބިފައިވަނީ 3 ފިރިހެނަކާއި 1 އަންހެނަކަށް ކަމަށްވެސް މީޑިއާ އޮފިޝަލް ވިދާޅުވި އެވެ.
އެތަނުން އެންމެ ހާލުސީރިއަސްވި މީހާ އިތުރު ފަރުވާ އަށް އެމްއެންޑީއެފްގެ ޑޯނިއާ އެއާކްރާފްޓް ގައި މާލެ ގެނެސްފައިވާ ކަމަށް އެމްއެންޑީއެފް އިން ރޭ ވަނީ ބުނެފައެވެ. އެގޮތުން މާލެ ގެނެސްފައިވަނީ އުމުރުން 37 އަހަރުގެ ފިރިހެން ކަމަށާއި، އެމީހާ މާލެ ގެނައީ ރޭ 7:08 އެހައިކައްހާއިރު ކަމަށް ވެސް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
