އާ ސަރުކާރުން ވެރިކަމާއި ހަވާލުވުމުގެ ކުރިން، ނިމުނު ސަރުކާރުން، އެ ސަރުކާރުގެ ޚަރަދުތަކާއި، ކުންފުނިތަކުން ދައްކަންޖެހޭ ބިލުތައް ދައްކާ ޚަލާސްކުރަން ޖެހޭނެކަމަކަށް އެއްވެސް ޤާނޫނެއްގައި ބަޔާންކޮށްފައި ނޯންނަކަމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސެއިން ޝަމީމް (އަނދުން ހުސެއިން) ވިދާޅުވެއްޖެ އެވެ. 

އޭނާ މިފަދައިން ވިދާޅުވެފައި ވަނީ އިންތިޚާބަށް ނުފޫޒު ފޯރުވުން ހުއްޓުވުމުގެ ގަރާރަށް ރައްޔިތުންގެ މަޖިލީހުގެ މި އަހަރުގެ ތިން ވަނަ ދައުރުގެ 13 ވަނަ ޖަލްސާގައި ވާހަކަދައްކަވަމުން ނެވެ. 

ރިޔާސީ އިންތިޚާބަށްފަހު ސަރުކާރު ބަދަލުވުމުގެ އިންތިޤާލީ މަރުހަލާ ކުރިއަށްދާއިރު، ސަރުކާރުގެ ކުންފުނިތަކާއި ވުޒާރާތަކުން އެކި ފަރާތްތަކަށް ދައްކަންޖެހޭ ގިނަ އަދަދެއްގެ ފައިސާ ނުދައްކާއޮތްކަން ފާހަގަވެފައިވާކަމަށް އިންތިޤާލީ ރައީސުލްޖުމްހޫރިއްޔާގެ އޮފީހުން ވަނީ ފާހަގަކޮށްފަ އެވެ. 

އެގޮތުން ސަރުކާރުގެ ފެން ކުންފުނިން ކުދި އަދި މެދުފަންތީގެ ވިޔަފާރިތަކަށް ދައްކަން ޖެހޭ 2 ބިލިއަނަށްވުރެ ގިނަ ރުފިޔާ އޮތް އިރު، އެ ފައިސާ ނުދެއްކުމުގެ ސަބަބުން ދިމާވާ ދަތިތައް ފާހަގަކޮށް މަސައްކަތްތެރިންނާއި، ފެނަކައިން ފައިސާ ލިބެންޖެހޭ ކުދި އަދި މެދުފަންތީގެ ވިޔަފާރިވެރިން ގެންދަނީ މުޒާހަރާވެސް ކުރަމުންނެވެ. 

ސަރުކާރުގެ ކުންފުނިތަކުން ދައްކަންޖެހޭ ބޮޑެތި ބިލުތައް ނުދައްކާ އޮތުމަކީ އާ ސަރުކާރަށް މާލީގޮތުން ގޮންޖެހުންތައް ކުރިމަތިވާނެ ކަމެއްކަން ރައްޔިތުންގެ މަޖިލީހުގެ ބައެއް މެމްބަރުންވެސް ފާހަގަކުރައްވަމުން ގެންދަވާއިރު، އެކަންކަމަށް އިޝާރާތްކުރައްވާ އަނދުން ހުސެއިން ވިދާޅުވީ، ނިމޭ ސަރުކާރުން ދައްކަން ޖެހޭ ބިލުތައް ޚަލާސްކުރަން ޖެހޭނެކަމަށް ޤާނޫނުގައި ބަޔާންކޮށްފައި ނޯންނަ ކަމަށެވެ. 

2018 ވަނަ އަހަރު އެމްޑީޕީ ކޯލިޝަނުން ސަރުކާރާއި ހަވާލުވިއިރު ވެސް ކުންފުނިތަކުން ދައްކަންޖެހޭ ބޮޑެތި ބިލުތަކަށް ފައިސާ ނުދެއްކި އޮތް ކަމަށާއި، މަސްވެރިންނަށް ދޭން ޖެހޭ ގިނަ އަދަދެއްގެ ފައިސާ ވެސް ނުދައްކާ އޮތްކަން އޭނާ ފާހަގަކުރެއްވި އެވެ. 

އެއާއެކު އޭނާ ވިދާޅުވީ ސަރުކާރު ބަދަލުވުމުގެ ކުރިން ނިމުނު ސަރުކާރުގެ ހުރިހާ ބިލެއް ދައްކަން ޖެހޭނީ ޤާނޫނުގައި އެފަދައިން އެކަން ކުރުމަށް ލާޒިމްކުރާނަމަ ކަމަށެވެ. އަދި އެއީ އެކުލަވާލުން މުހިންމު ޤާނޫނެއްކަމަށް ފެންނަކަމަށް ވެސް އަނދުން ހުސެއިން ވިދާޅުވި އެވެ. 

އޭގެ އިތުރުން އޭނާ ވިދާޅުވީ އެ ސަރުކާރަކުން ނެގި ލޯނެއް، ދައުރު ނިމުމުގެ ކުރިން ދައްކާ ޚަލާސްކުރަން ޖެހޭގޮތަށް ވެސް ގާނޫނެއް އެކުލަވާލަން ޖެހޭނެ ކަމަށެވެ. އާ ސަރުކާރުން ކުރީ ސަރުކާރުގެ ޚަރަދުތަކާއި ދަރަނިތަކަށް ޒިންމާ ނުވާގޮތަށް ހެދޭނީ ގާނޫނެއް ހަދާ އެ ތަންފީޒު ކުރެވިގެން ކަމަށް އޭނާ ވިދާޅުވި އެވެ. 

ސަރުކާރު ބަދަލުވުމުގެ މަރުހަލާ ކުރިއަށް ދާއިރު، މި މަރުހަލާގައި ޚަރަދުތައް ކުޑަކޮށް އާ ލޯނުތައް ނުނެގުމަށް އިންތިގާލީ ރައީސުލްޖުމްހޫރިއްޔާގެ އޮފީހުން ވަނީ އެދިލައްވާފަ އެވެ.

މިހާރު އިންތިގާލީ ރައީސުލްޖުމްހޫރިއްޔާގެ އޮފީހުން ކުރައްވަމުން ގެންދަވާ މަސައްކަތަކީ ސަރުކާރުގެ މާލީ ހާލަތު ދެނެގަތުމުގެ މަސައްކަތެވެ. އެގޮތުން އިންތިގާލީ ކޮމެޓީތަކުން އެކުލަވާލާ ރިޕޯޓުތަކުގެ މައްޗަށް ކުރިއަށް އޮތް ތަނުގައި އެ މައުލޫމާތުތައް ހިއްސާކުރަމުން ގެންދާނެކަމަށް އިންތިގާލީ ރައީސުލްޖުމްހޫރިއްޔާގެ އޮފީހުން ވަނީ ހާމަކޮށްފަ އެވެ.