ނުފޫޒު ފޯރުވައިގެން އެއްވެސް ސަރުކާރަކަށް އިންތިޚާބު ކާމިޔާބުކުރެވިފައި ނެތްކަން ފެހި ޤާނޫނޫ އަސާސީ ވުޖޫދުވީފަހުން ރާއްޖޭގައި ބޭއްވުނު ރިޔާސީ އިންތިޚާބުތަކަށް ބަލާލުމުން ހާމަވެގެންދާކަމަށް ރައްޔިތުންގެ މަޖިލީހުގެ ބިލެއްދޫ ދާއިރާގެ މެމްބަރު ދޮންބިލެއް އަހުމަދު ހަލީމް ވިދާޅުވެއްޖެ އެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ހަލީމު ވިދާޅުވީ އެމްޑީޕީން ވަނީ ރާއްޖޭގެ އިންތިޚާބުތަކަށް ނުފޫޒު ނުފޯރުވޭނެ ހަރުދަނާ ނިޒާމެއް ގާއިމްކޮށްދީފައި ކަމަށެވެ. އަދި އެއީ އެމްޑީޕީ ވުޖޫދުވީއްސުރެ މިހާތަނަށް ކުރެވުނު އެންމެ ކާމިޔާބު މަސައްކަތް ކަމަށް އޭނާ ސިފަކުރެއްވި އެވެ. 

އެކަމަށް ބާރުދިނުމުގެ ގޮތުން ހަލީމު ވިދާޅުވީ އެއިރެއްގައި އޮންނަ ސަރުކާރަކުން ވެރިކަން ދެމެހެއްޓުމަށްޓަކައި އިންތިޚާބަށް ނުފޫޒު ފޯރުވުމަށް ތަފާތު ކަންކަން ކުރަމުން އައިސްފައިވާ ކަމަށެވެ.

އެހެން ނަމަވެސް އިންތިޚާބުގެ ނަތީޖާތަކަށް ބަލާއިރު، ސަރުކާރުން ނުފޫޒު ފޯރުވައިގެން އިންތިޚާބުތައް ކާމިޔާބުކުރެވޭތަން ފެނިގެން ގޮސްފައި ނުވާކަމަށާއި، އެއްވެސް ސަރުކާރަކަށް މިހާތަނަށް ވެރިކަމުގެ ދެވަނަ ދައުރެއް ލިބިގެން ގޮސްފައި ނުވާކަމަށް ހަލީމު ވިދާޅުވި އެވެ. 

ފެހި ގާނޫނު އަސާސީ ވުޖޫދުވެ އެންމެ ފުރަތަމަ ބޭއްވުނު ރިޔާސީ އިންތިޚާބުގައި ރައްޔިތުންގެ ވޯޓުން އޭރު އޮތް ސަރުކާރު ބަދަލުކުރި ގޮތަށް، ކޮންމެ ރިޔާސީ އިންތިޚާބެއްގައި ވެސް ރައްޔިތުން ނިކުމެ ސަރުކާރު ބަދަލުކޮށްފައިވާ ކަމަށާއި، މި ގޮތަށް އެކަން ކުރެވެނީ އިންތިޚާބަށް ނުފޫޒު ފޯރުވި ނަމަވެސް، ދެފުށް ފެންނަ އޮޅުވާނުލެވޭ އިންތިޚާބުތައް ބޭއްވިގެން ދިއުމުގެ ސަބަބުންކަން އޭނާ ފާހަގަކުރެއްވި އެވެ. 

ހަލީމު ވިދާޅުވީ ރާއްޖޭގައި މިހާރު ގާއިމްކުރެވިފައިވާ އިންތިޚާބީ ނިޒާމު ހަރުދަނާވުމުގެ ސަބަބުން ސަރުކާރުން ނުފޫޒު ފޯރިވި ނަމަވެސް ނަތީޖާ ބަދަލުކޮށްލުމަކީ ކުރެވޭނެ ކަމެއް ނޫންކަން ރިޔާސީ އިންތިޚާބުގެ ނަތީޖާތަކަށް ބަލާލުމުން ވެސް ހާމަވެގެންދާ ކަމަށެވެ. 

އިންތިޚާބުތަކަށް ސަރުކާރުން ނުފޫޒު ފޯރުވާކަމުގެ ކަންބޮޑުވުންތަކާއެކު ރައްޔިތުންގެ މަޖިލީހުގެ މެމްބަރު އިމްތިޔާޒު ފަހުމީ ގަރާރެއް ހުށައަޅުއްވާފައިވަނީ ރިޔާސީ އިންތިޚާބުގެ ތެރޭގައެވެ. 

އެހެން ނަމަވެސް މަޖިލީހުގެ މަސައްކަތްތައް ކުރިއަށް ނުގެންދެވުމުގެ ސަބަބުން އެ ގަރާރަށް ބަހުސްނުކުރެވި މިއަދާއި ހަމަޔަށް މަޑުޖެހިފައި އޮތް ނަމަވެސް މިއަދުގެ ޖަލްސާގައި މެމްބަރުން ވަނީ ވަރަށް ފުޅާކޮށް އެ ގަރާރަށް ބަހުސްކޮށްފައެވެ. އަދި އިންތިޚާބުތަކަށް ނުފޫޒު ފޯރުވުން ހުއްޓުވުމަށް ގާނޫނުތައް އެކުލަވާލާ ތަންފީޒުކުރުން މުހިންމުކަން ގިނަ މެމްބަރުން ފާހަގަކުރެއްވި އެވެ.