ފަލަސްޠީނުގެ ރައްޔިތުންނަށް 2 މިލިއަން މަސްދަޅު ހަދިޔާ ކުރެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ނިންމަވައިފިއެވެ.
އެކަން ހާމަކޮށް ފޮރިން މިނިސްޓަރ ޝާހިދު ކުރެއްްވި ޓުވީޓެއްގައި ވިދާޅުވީ، ފަލަސްޠީނުގެ އަޚުންނާއި އުޚްތުންނަށް 2 މިލިއަން މަސްދަޅު ހަދިޔާ ކުރެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ނިންމަވާފައިވާ ކަމަށެވެ.
އަދި ފަލަސްޠީނުގެ ރައްޔިތުން އެބައިމީހުންގެ ވަކި ދައުލަތެއް އުފެއްދުމަށާއި އެބައިމީހުންގެ ޙައްޤުތައް ކަށަވަރުކުރުމަށްޓަކައި ކުރަމުންގެންދާ މަސައްކަތްތަކުގައި އެއްވެސް ޝަރުތަކާނުލައި ތާއީދުކުރުންމަތީ ދިވެހި ސަރުކާރާއި ދިވެހި ރައްޔިތުން ތިބިކަމަށް ވެސް ޝާހިދު ވިދާޅުވި އެވެ.
ފަލަސްޠީނަށް ދެ މިލިއަން މަސްދަޅު ދިނުމަށް ރައީސް ޞާލިހު ނިންމަވާފައިވާއިރު، އެމަނިކުފާނުގެ އިރުޝާދުގެ ދަށުން، އެހެން ގައުމުތަކާއި ގުޅިގެން، އިސްރާއީލުގެ ޔަހޫދީން، ކެނޑިނޭޅި ފަލަސްޠީނަށް އަމާޒުކޮށް ދެމުން ގެންދާ ވަރުގަދަ ހަމަލާތަކާއި ގުޅިގެން އދ. ގެ އާންމު މަޖިލީހުގެ ޚާއްސަ ކުއްލި ބައްދަލުވެއް ބާއްވަން ދިވެހިރާއްޖެއިން އެދިފައިވާ ކަމަށްވެސް އިއްޔެ ޝާހިދު ވަނީ ވިދާޅުވެފަ އެވެ.
އަދި ރާއްޖެ އަބަދުވެސް އޮންނާނީ ފަލަސްތީނާއެކު، އެމީހުންގެ ހައްގުތައް ކަށަވަރުކުރުމަށް ގޮވާލުމުގައިކަމަށްވެސް ސަރުކާރުން އަންނަނީ ތަކުރާރުކޮށް ބުނަމުންނެވެ.
Advertisement
This content is created and paid for by advertisers and does not involve Voice Journalists
