ހުވާ ކުރުމުގެ ރަސްމިއްޔާތުން ފެށިގެން އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަށް ޖެއްސުން ކުރާނެ ކަމަށް މަޖިލީހުގެ މެޖޯރިޓީ އޮތް މޯލްޑިވިއަން ޑިމޮކްރަޓިކް ޕާޓީ, އެމްޑީޕީން އިއުލާން ކޮށްފައިވާ ކަމަށް ޕީޕީއެމްގެ ހަރަކާތު ކޮމިޓީގެ ޗެއާ އަދި ހޯރަފުށި ދާއިރާގެ ކުރީގެ މެންބަރު މުހައްމަދު އިސްމާއިލް ވިދާޅުވެއްޖެއެވެ. 

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ދުރުކުރަން އެމްޑީޕީގެ ޕާލިމަންޓަރީ ގުރޫޕުން ހުށައެޅި މައްސަލަ ފާސް ކުރަން ވޯޓް ދޭން ނިންމާ އެެ ޕާޓީން ނެރެފައިވާ ތްރީލައިން ވިޕާއި ގުޅޭގޮތުން، އިއްޔެ އެ ޕާޓީގެ ޕީޖީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ޕީޖީ ލީޑަރު މުހައްމަދު އަސްލަމް ވަނީ ދެން އެންމެ އަވަހަށް މަޖިލީހުގައި ކުރިއަށް ގެންދަން ޖެހޭނީ ރައީސް ނަޝީދުގެ އިތުބާރު ނެތް މައްސަލަ ކަމަށާއި އަދި އެ ޖަލްސާ ނުބާއްވާ ނަމަ އެހެން އެއްވެސް މަސައްކަތެއް ކުރުމަށް އެއްބާރުލުން ނުދޭން ނިންމާފައިވާ ކަމަށް ވިދާޅުވެފައެވެ.

އެގޮތުން އިންތިހާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުވާ ކުރެއްވުމަށް ބާއްވާ ޖަލްސާއަށް ވެސް އެއްބާރުލުން ދެވެން ނޯންނާނެ ކަމުގައި އަސްލަމް ވަނީ ވިދާޅުވެފައެވެ. 

އަސްލަމްގެ ވާހަކަތަކަށް ތާއީދު ކުރައްވައި ކިނބިދޫ ދާއިރާގެ މެންބަރު މުހައްމަދު ނާޝިޒުވެސް ވަނީ، އިތުބާރުގެ މައްސަލަ ނުނިންމާ ނޮވެންބަރު 17 ވަނަ ދުވަހު އިންތިހާބީ ރައީސުލްޖުމްހޫރިއްޔާ ހުވާ ކުރެއްވުމުގެ ޖަލްސާގެ ރިޔާސަތުގައި ނަޝީދަށް ނުއިންނެވޭނެ ކަމަށެވެ. އަދި އެގޮތުގައި އެ ޖަލްސާ ކުރިއަށް ގެންގޮސްފިނަމަ ރައީސް މުއިއްޒުގެ ކެބިނެޓަށް ރުހުން ނުދޭނެ ކަަމަށްވެސް އޭނާ ވިދާޅުވި އެވެ. 

"އެ ޖަލްސާ އެހެން ކުރިއަށް ގެންދަވައިފި ކަމުގައިވާނަމަ އެ ރައީސުލްޖުމްހޫރިއްޔާ ފޮނުވާ ކެބިނެޓާއި އެހެން ކަންކަމަށް އަޅުގަނޑުމެންނަށް ކަނޑައެޅިގެން ނޯ ޖަހާނީ އިނގޭތޯ. މިއީ ވަކި ޕްރޮސެސް އެއް އޮންނަ ކަމެއް،" ނާޝިޒު ވިދާޅުވި އެވެ. 

އެމްޑީޕީ މަޖިލީހު މެންބަރުންގެ އެ ވާހަކަ ތަކާއި ގުޅިގެން މުހައްމަދު އިސްމާއިލް ރޭ ކުރެއްވި ޓްވީޓެއްގައި ވިދާޅުވީ، މަޖިލީހުގެ ތެރެއިންނާ އިދިކޮޅު ޕާޓީގެ ގޮތުގައި އޮވެގެންވެސް ޑރ. މުޢިއްޒުގެ ސަރުކާރަށް ފުރިހަމަ އެއްބާރުލުން ދޭނެ ކަމަށް މީގެ ކުރިން އެމްޑީޕީން ބުނެފައިވާ ކަމަށެވެ.

އެހެން ނަމަވެސް ހުވާ ކުރުމުގެ ރަސްމިއްޔާތުން ފެށިގެން މުޢިއްޒަށް ޖެއްސުން ކުރަން ފަށާނެ ކަމަށް އިއްޔެ އެމްޑީޕީން  އިއުލާން ކޮށްފައިވާ ކަމަށާ، އެއިންވެސް ޔަގީންވެގެން ދަނީ އެމްޑީޕީ އަކީ ބަހާއި އަމަލާ ދިމާ ނުވާ ޕާޓީއެއްކަން ކަމަށް އޭނާ ވިދާޅުވި އެވެ.

މިއާއެކު މުހައްމަދު އިސްމާއިލް ވިދާޅުވީ، އެމްޑީޕީން މުޢިއްޒުގެ ކެބިނެޓަށް "ނޯ" ބުނާނެ ކަމަށް ބުނިގޮތަށް ކުރިއަށް އޮތް މަޖިލިސް އިންތިޚާބުގައި ދިވެހި ރައްޔިތުން އެމްޑީޕީއަށް ނޯ ބުނަންޖެހޭ ކަމަށެވެ. 

"އެހެން ނޫންނަމަ، މަޖިލިސް ތެރެއިން ސަރުކާރަށް ޖެއްސުން ކުރުން ނޫން ކަމެއް އެމްޑީޕީން ނުކުރާނެކަން ޔަގީން. މިއަދު އަދި މި ފެނުނީ އެކަމުގެ މަލަމަތި އެކަނި." މުހައްމަދު އިސްމާއިލް ވިދާޅުވި އެވެ.