އިންތިޚާބީ ރައީސް ޑރ މުހައްމަދު މުއިއްޒު ރައީސުލްޖުމްހޫރިއްޔާކަމުގެ ހުވާކުރެއްވުމަށް އެމްޑީޕީ ޕާލަމެންޓްރީ ގުރޫޕު މެދުވެރިކޮށް ހުރަސްއަަޅަމުން ގެންދަނީ ރައީސް އިބްރާހިމް މުހައްމަދު ޞާލިހު އަންގަވައިގެން ކަމަށާއި، އެކަން ހަރުކަށި އިބާރާތުން ކުށްވެރިކުރާކަމަށް ދަ ޑިމޮކްރެޓްސްއިން ބުނެފި އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރިޔާސަތު ބަލަހައްޓަވާ ދަރުބާރެއްގައި ޑރ މުހައްމަދު މުއިއްޒު ހުވާކުރައްވައިފިނަމަ ރައީސް މުއިއްޒަކީ ގާނޫނާއި އެއްގޮތްވާ ގޮތުގެ މަތީން ހުވާ ކުރައްވައިގެން ހުންނެވި ރައީސެއް ކަމުގައި ބަލައި ނުގަންނާނެ ކަމަށާއި އެމަނިކުފާނުގެ ކެބިނެޓަކަށް ރުހުން ނުދޭނެ ކަމުގައި އެމްޑީޕީގެ ޕާލަމެންޓްރީ ގުރޫޕުން ވަނީ ބުނެފައެވެ.
އެކަމާއި ގުޅިގެން ދަ ޑިމޮކްރެޓްސްއިން ވަނީ ޑރ މުއިއްޒު ހުވާކުރެއްވުމަށް ހުރަސްއެޅުން ކުށްވެރިކޮށް ބަޔާނެއް ނެރެފައެވެ.
އެ ޕާޓީން ނެރުނު ބަޔާނުގައި ބުނެފައި ވަނީ ނިމިދިޔަ ރިޔާސީ އިންތިޚާބުގައި ދިވެހި ރައްޔިތުންގެ ވަރަށް ތަނަވަސް އަގުލަބިއްޔަތަކުން އިންތިޚާބުވެވަޑައިގެންނެވި ޕީއެންސީގެ ކެންޑިޑޭޓު، އިންތިޚާބީ ރައީސް ޑރ މުހައްމަދު މުއިއްޒާއި ނައިބު ރައީސް ހުސެއިން މުހައްމަދު ލަތީފު ހުވާކުރުމުގެ ދަރުބާރަށް ހުރަސްއެޅުމަށް، ރިޔާސީ އިންތިޚާބުން ނާކާބިޔާބުވެވަޑައިގެންނެވި ކެންޑިޑޭޓު އިބްރާހިމް މުހައްމަދު ޞާލިހު އަންގަވައިގެން އެމްޑީޕީގެ ޕީޖީ ގުރޫޕުގެ ބައެއް މެމްބަރުން ލައްވާ ކުރައްވަން އުޅުއްވަނީ ހުތުރު މަސައްކަތްޕުޅެއް ކަމަށެވެ.
އެކަން އެ ޕާޓީން ހަރުކަށި އިބާރާތުން ކޮށްވެރި ކުރާ ކަމަށާއި، ރައްޔިތުންގެ ނިންމުމަށާއި، ޤާނޫނު އަސާސީގެ ހުރުމަތަށާއި، ޑިމޮކްރަސީގެ އަސާސްތަކާއި މަކާރިމުލް އަޚްލާގުގެ ހަމަތަކަށް ރުޖޫއަވެ ވަޑައިގަތުމަށް އިލްތިމާސްކުރައްވާކަމަށް ދަ ޑިމޮކްެރޓްސްގެ ބަޔާނުގައި ވަނީ އިލްތިމާސްކުރައްވާފަ އެވެ.
ޑރ މުއިއްޒުގެ ސަރުކާރަކީ ދަ ޑިމޮކްެރެޓްސް ހިއްސާވާ ސަރުކާރެއްކަމަށް އެ ޕާޓީން ވަނީ ބުނެފައެވެ. އަދި ސަރުކާރުގެ ޝާމިލުވެވޭނެ ގޮތްތަކާއި ގުޅޭގޮތުން މަޝްވަރާކުރެއްވުމަށް އެ ޕާޓީގެ މުއައްސިސުން ވަނީ ޑިރެކްޓާ ޖެނެރަލް އޮފް ޓްރާންސިޝަން އަބްދުައްރަހީމް އަބްދުﷲ އާއި އެކު މަޝްވަރާ ބައްދަލުވުމެއް ވެސް ކުރިއަށް ގެންގޮސްފަ އެވެ.
Advertisement
This content is created and paid for by advertisers and does not involve Voice Journalists
