ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބީހައިވް ހޮޓެލްސްއަށް ނުދައްކާ އޮތް ފަސް ލައްކަ ރުފިޔާގެ ދަރަންޏަށް ފައިސާ ދެއްކުމަށް ސިވިލް ކޯޓުން ހުކުމްކޮށްފި އެވެ. 

މި ފައިސާ އަކީ އެފްއޭއެމްގެ އެދުމުގެ މަތިން ބީހައިވް އިން ދޫކޮށްފައިވާ ފަސް ލައްކަ ރުފިޔާއަށް ވާ ޑޮލަރުގެ ފައިސާއެވެ. 

މި މައްސަލައިގައި އެފްއޭއެމްއާ ދެކޮޅަށް ބީހައިވްއިން ކޮށްފައިވާ ދައުވާއަށް އެ އެސޯސިއޭޝަނުން ވަނީ އެއްބަސްވެފަ އެވެ.

އެގޮތުން، ދަރަނި ދައްކަން ބީހައިވްއަށް ޗެކެއް ދޫކުރި ކަމަށާއި ނަމަވެސް އެ ފައިސާ ބޭންކުން ނެގޭ ގޮތް ނުވީ އެފްއޭއެމްގެ މާލީ ހާލަތު ހުރި ގޮތުން ކަމަށް ބުނެފައިވެ އެވެ. އަދި، ދަރަނި ނުދެއްކި އޮތީ ބައިނަލްއަގްވާމީ ޖަމިއްޔާތަކުން ލިބެން ޖެހޭ ފައިސާ އެ ދުވަހަށް ނުލިބި އޮތުމުން ކަމަށް ބުނެފައިވެ އެވެ. 

އެ ދަރަނި ދެއްކުމަށް އެފްއޭއެމްގެ މައްޗަށް ސިވިލް ކޯޓުން ހުކުމްކޮށްފައިވަނީ ދައުވާތަކަށް އެމްއޭއެމުން އެއްބަސްވެފައިވާތީ އެވެ. އަދި އެ ކޯޓުން ވަނީ އެފްއޭމުން އެދުނު ގޮތަށް އެފްއޭއެމްގެ މާލީ ހާލަތު ހުރި ގޮތަށް ބަލައި އެއް އަހަރު ދުވަހުގެ ތެރޭގައި އެ ފައިސާ ދައްކަން ޖެހޭ ގޮތަށް އަމަރުކޮށްފައެވެ. 

އެމްއޭއެމްގެ މައްޗަށް ފަސްލައްކައިގެ ދަރަންޏެއް ދައްކަން ހުކުމްކޮށްފައިވާއިރު، ވަރަށް ގިނަ ތަންތަނަށް އެމްއޭއެމުން ފައިސާ ނުދައްކާހުރި މައްސަލަތަކެއް ވެސް ވަނީ ފެންމަތިވެގެން ގޮސްފައެވެ. 2021 އިން ފެށިގެން މިދިޔަ ސެޕްޓެމްބަރު މަހާ ހަމައަށް އެފްއޭއެމްއާ ދެކޮޅަށް ސިވިލް ކޯޓުގައި 18 ދައުވާއެއް ކޮށްފައިވެއެވެ. 

އެފްއޭއެމާއި ދެކޮޅަށް ދައުވާކޮށްފައިވާ ފަރާތްތަކުގެ ތެރޭގައި ޑީކޭ ހޮސްޕިޓަލާއި، ޕަބްލިކް ސާވިސް މީޑިއާ (ޕީއެސްއެމް) އަދި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ހިމެނެ އެވެ.

އޭގެ އިތުރުން އެފްއޭއެމްގެ ތެރޭގައި ޚިޔާނާތާއި ކޮރަޕްޝަންގެ ބޮޑެތި މައްސަލަތަކެއް ހުރިކަން ފާހަގަކޮށް ފުލުހުން ވަނީ ތަހުގީގެއް ވެސް ފަށާފައެވެ.