ގެދޮރުވެރިޔާ ސްކީމުގެ ދަށުން ދޫކުރާ 4000 ފްލެޓް ލިބޭ މީހުންގެ ދާއިމީ ލިސްޓަށް ޝަކުވާ ހުށަހަޅަން އެކަށީގެންވާ މުއްދަތެއް ނުދީ ފްލެޓު އެގްރިމެންޓުގައި ސޮއި ނުކުރަން އެންޓި ކޮރަޕްޝަން ކޮމިޝަން (އޭސީސީ) އިން އަންގައިފި އެވެ.

އޭސީސީން މި ފަދަ އެންގުމެއް ޕްލޭނިންގ މިނިސްޓްރީއަށް އަންގާފައިވާ ކަމަށް އެ އިދާރާއިން ވަނީ ވޮއިސް އަށް ކަށަވަރު ކޮށްދެއްވާފައެވެ. 

އެގޮތުން އެ އޮފީހުގެ މީޑިޔާ އޮފިޝަލް ވިދާޅުވީ، ފުލެޓް ލިސްޓާއި ގުޅިގެން ހުށަހެޅޭ ޝަކުވާތައް ބަލައި އެއާމެދު ގޮތެއް ނިންމުމުގެ ކުރިން، ފްލެޓް ލިބޭ ކަމަށް އިއުލާން ކުރެވުނު 4000 މީހުންގެ ލިސްޓަށް، ލިބުނު ކަމުގެ ލިޔުންދީ، އެކަން ކުރިއަށް ނުގެންދިޔުމަށް ޕްލޭނިންގ މިނިސްޓްރީން އަންގާފައިވާނެ ކަމަށެވެ. 

Advertisement

އޭސީސީން މިފަދަ އެންގުމެއް ޕްލޭނިންގ މިނިސްޓްރީއަށް އަންގާފައިވާއިރު، ފްލެޓް ދިނުމުގައި ކޮރަޕްޝަންގެ ޢަމަލު ހިންގާފައިވާ ކަމަށްބުނެވެސް މިއަދުގެ ވަގުތެއްގައި ގިނަ އަދަދެއްގެ ޝަކުވާ އެ އޮފީހަށް ހުށަހެޅިފައިވާ ކަމަށް މީޑިއާ އޮފިޝަލް މަޢުލޫމާތު ދެއްވައެވެ. އަދި އެ މައްސަލަތައް އެ އޮފީހުން ބަލަމުންދާ ކަމަށް އޮފިޝަލް ވިދާޅުވިއެވެ. 

ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ފުލެޓް ދޫކުރުމަށްޓަކައި ހިންގާ ގެދޮރުވެރިޔާ ސްކީމުގެ ދަށުން މާލެ ސަރަޙައްދުން ފުލެޓަށް އެދި ހުށަހަޅާފައިވާ ފަރާތްތަކުގެ ދާއިމީ ލިސްޓާއި ގުޅިގެން ގިނަބައެއްގެ ފާޑުކިއުންތައް އަމާޒުވުމާއިއެކު ލިސްޓަށް ޝަކުވާ ހުށަހަޅަން ހުޅުވާލީ މިއަދުގެ ވަގުތެއްގައެވެ. 

އެގޮތުން ޕްލޭނިންގ މިނިސްޓްރީން މިއަދު ކުރި އިއުލާނެއްގައި ބުނެފައިވާ ގޮތުން ފުލެޓް ލިބުނު ލިބުނު މީހުންގެ ދާއިމީ ލިސްޓަށް ޝަކުވާ ހުށަހެޅުމަށް ބޭނުންވާ ފަރާތްތަކަށް "ގެދޮރުވެރިން ޕޯޓަލް" މެދުވެރިކޮށް ޝަކުވާ ހުށަހެޅުމުގެ ފުރުސަތު މިހާރު ވަނީ ހުޅުވާލައިފަ އެވެ. 

އެހެންކަމުން ޝަކުވާ ހުށަހަޅަން ބޭނުންވާ ފަރާތްތަކުން 5 ނޮވެންބަރ 2023 އިން ފެށިގެން 9 ނޮވެންބަރ 2023 ގެ 16:00 ގެ ނިއަލަށް ޝަކުވާ ހުށަހެޅުމަށް އެ މިނިސްޓްރީން ވަނީ އެދިފައެވެ.