މި ސަރުކާރުގެ ބޯހިޔާވަހިކަމުގެ މަޝްރޫއު، ގެދުރުވެރިޔާ ގެ ދަށުން ދިނުމަށް ހަމަޖެހިފައިވާ 4000 ފްލެޓަށް ޝަރުތުހަަމަވާ މީހުން ކަނޑައަޅައި އާއްމުކޮށްފައިވާ ލިސްޓުގެ މައްސަލައިގެ ތަހުގީގަށް އެންޓި-ކޮރަޕްޝަން ކޮމިޝަނުން، ހައުސިން މިނިސްޓްރީއަށް ވަދެއްޖެއެވެ.

އެސީސީގެ ކުއިކް ރެސްޕޯންސް ޓީމުގެ ފަރާތުން މިއަދު ވަނީ މި މަޝްރޫއާއި ގުޅުން ހުރި ލިޔެކިޔުންތަކާއި ފޯމުތައް ބަލައި ޗެކްކުރުމަށްޓަކައި ހައުސިންގް މިނިސްޓްރީއަށް ވަދެ ހަރަކާތްތެރިވާން ފަށައިފައެވެ. 

މިކަން އެ ކޮމިޝަނުގެ ފަރާތުން ވޮއިސްއަށް ވަނީ ކަށަވަރުކޮށްދީފައެވެ. 

މީގެ އިތުރުން މި މައްސަކައާއި ގުޅުންހުރި ކަންކަން ބަލައި ސާފުވަމުންދާވަރަކަށް މިކަމާއި ގުޅުން ހުރި އެހެނިހެން އަދާހަމަތައްވެސްވެސް ހިއްސާކުރަމުން ދާނެ ކަމުގައި އެ ކޮމިޝަނުން ވަނީ ބުނެފައެވެ. 

ފްލެޓުގެ ދާއިމީ ލިސްޓު އިއުލާންކުރުމާ އެކު އެއީ އިންސާފުން ބޭރުން އެކުލަވާލައި އާއްމުކޮށްފައި އޮތް ލިސްޓެއް ކަމުގެ ޝަކުވާ ބޮޑުވެ އެ މައްސަލަ އޭސީސީއަށް ހުށަހެޅުމާއެކު އެ ސްކީމްގެ ދަށުން ދޫކުރާ ފްލެޓުތަކުގެ އެއްބަސްވުމުގައި ސޮއިކުރުމާއި އެ ފްލެޓުތައް ހަވާލުކުރުމާ ގުޅުންހުރި ހުރިހާ މަސައްކަތްތަކެއް، ޕޮއިންޓް ދީފައިވާ ގޮތާމެދު ޝަކުވާ ހުށަހަޅަން އެކަށީގެންވާ މުއްދަތެއް ދީ، އެ ޝަކުވާތަކަށް ބެލުމަށް ފަހު ނޫނީ ކުރިއަށް ނުގެންދިއުމަށް އެސީސީން ވަނީ އަންގައިފައެވެ. 

މި ސަރުކާރުގެ ގެދޮރުވެރިޔާ ސްކީމުގެ ދަށުން ފުރަތަމަ ބުރުގައި ފްލެޓް ލިބޭ މީހުންގެ ދާއިމީ ލިސްޓެއް ޕްލޭނިން މިނިސްޓްރީން އާންމުކުރީ ހޮނިހިރު ދުވަހުއެވެ. އެ ލިސްޓު އާންމު ކުރީ ވެސް އުސޫލުން ބޭރުން, ކޮރަޕްޝަން އެކުލެވޭހެން 4,000 ފްލެޓް ބަހާލަން އުޅޭކަމުގެ ތުހުމަތުގައި އޭސީސީއަށް މައްސަލަ ހުށަހަޅާފައި ވަނިކޮށެވެ.

އެ ލިސްޓު އާންމު ކުރުމާއެކު, ބަޔަކު ވަނީ ހައުސިން މިނިސްޓްރީއަށް އެއްވެ, އެތަނުގައި އިހުތިޖާޖު ވެސް ކޮށްފަ އެވެ. ފްލެޓް ލިސްޓުގައި, ފުރަތަމަ ބުރުގައި 4,000 ފްލެޓް ލިބޭ މީހުން ކަނޑައަޅާފައި ވަނީ ދީފައިވާ ޕޮއިންޓުންނެވެ. ނަމަވެސް މީގެ ކުރިން ނެރުނު ފްލްޓުގެ ވަގުތީ ލިސްޓުގައި ޕޮއިންޓު ދީފައެއް ނުވެއެވެ.