ކައުންސިލަކުން ފޯރުކޮށްދޭ ޚިދުމަތަކުން ރައްޔިތަކު މަހްރޫމް ކުރެވޭނީ ޤާނޫނުއަސާސީ އާއި އެއްގޮތްވާގޮތުގެ މަތީން ހެދިފައިވާ ޤާނޫނަކުން ނުވަތަ ޤަވާޢިދަކުން އެކަން ކުރުމުގެ ބާރު ލިބިގެން ކަމަށް ލޯކަލް ގަވާމެންޓް އޮތޯރިޓީ (އެލްޖީއޭ) އިން ބުނެފިއެވެ. 

ވ. ފެލިދޫ ކައުންސިލަށް ދައްކަންޖެހޭ ފައިސާ ނުދައްކާ މީހުންނާއި އެމީހުންގެ އަނބިން ފިރިން އަދި ދަރިންނަށް ކައުންސިލްގެ ފަރާތުން ފޯރުކޮށްދޭ އެއްވެސް ޚިދުމަތެއް ނުދިމުމަށް ކައުންސިލުން ނިންމުމާ ގުޅިގެން ނެރުނު ނޫސްބަޔާނެއްގައި އޮތޯރިޓީން ބުނެފައިވަނީ،  ކައުންސިލްތަކަށް އެކި ފަރާތްތަކުން ދައްކަން ޖެހޭ ފައިސާ ނުދައްކާ ހުރުމަކީ އެކަމުގެ ސަބަބުން ކައުންސިލުތަކަށް ދަތިތަކާ ކުރިމަތިވާނެ ކަމެއްކަމަށާއި އެހެންނަމަވެސް ކައުންސިލުތަކުގެ ނިންމުންތައް ނިންމަން ވާނީ ގާނޫނުގެ ދަށުން އާންމު ރައްޔިތުންނަށް ލިބޭ ހައްގުތަށް ނުގެއްލޭ ގޮތަށް ކަމަށެވެ. 

މީގެ އިތުރުން އެއްވެސް ކައުންސިލް އިދާރާއަކުން ފޯރުކޮށްދޭ ހިދުމަތްތަކުން އެއްވެސް ރައްޔިތަކުން މަހުރޫމްކުރެވޭނީ ގާނޫނީއަސާސީއާއި ހިލާފުނުވާނޭހެން ފާސްކޮށްފައިވާ ގާނޫނަކުން ނުވަތަ ގަވާއިދަކުން އެކަންކުރުމުގެ ބާރުލިބިގެންކަމަށް އެ ބަޔާނުގައި ބުނެފައިވާއިރު، ކައުންސިލާއި އަމިއްލަ ފަރުދަކާ މެދު ކުރެވޭ މަދަނީ މުއާމަލާތެއްގެ ތެރެއިން އެފަރާތުން ކައުންސިލަށް ދައްކަން ޖެހޭ ފައިސާ ނުދެއްކުމަކުން، ގާނޫނަކުން ނުވަތަ ގަވާއިދަކުން ހުއްދަކުރާ ފިޔަވަޅެއް މެނުވީ އެއްވެސް ރައްޔިތަކާމެދު އެޅުމަކީ ފަރުދީ ހައްގެއް ހިފެހެއްޓުން ކަމުގައި ދެކޭ ކަމަށް ވެސް އެ އިދާރާއިން ނެރުނު ބަޔަނުގައި ވަނީ ބުނެފައެވެ. 

އެލްޖީއޭ ގެ ބަޔާނުގައި ވިދާޅުވީ އެގޮތަށް ފަރުދީ ހައްގެއް، ކައުންސިލްތަކަށް ނުހިފެހެއްޓޭނެ ކަމަށާއި ކައުންސިލަކާއެކުވެވޭ މަދަނީ މުއާމަލާތަކާ ގުޅިގެން ދައްކަން ޖެހޭ ފައިސާއެއް ނުދެއްކުމަކުން އެމީހަކާ މެދު ފިޔަވަޅު އަޅަންވާނީ މުއާމަލާތް ކުރުމަށް ހަދާ އެއްބަސްވުމާއި އެއްގޮތަށް ގާނޫނާއި ގަވައިދުގެ މަތިން ކަމަށެވެ.

ހަމަމިއާއެކު ހުރިހާ ރައްޔިތުންގެ ހައްގުތައް ކަށަވަރުވާނޭހެން ނިންމުންތައް ނިންމުމަށް ކައުންސިލްތަކަށް އެ އިދާރާއިން ވަނީ އިލްތިމާސް ކޮށްފައެވެ.