ރައްޔިތުންގެ މަޖިލީހުގެ އިންތިޚާބީ ދާއިރާތަކަށް އާބާދީ ކަނޑައަޅާފައިވާގޮތުގެ ވަގުތީ ރިޕޯޓަށް ލިބުނު ޝަކުވާތައް ދިރާސާކޮށް ނިމި އެ ޝަކުވާތަކަށް މިއަދު ޖަވާބު ފޮނުވާނެކަމުގައި އިލެކްޝަންސް ކޮމިޝަން (އީސީ)ން ބުނެއްޖެއެވެ. 

މިކަން ހާމަކޮށް އެ ކޮމިޝަނުގެ ނައިބް ރައީސް އިސްމާއީލް ހަބީބް ވިދާޅުވީ، މަޖިލީހުގެ 2024 ވަނަ އަހަރުގެ އިންތިޚާބީ ދާއިރާތަކަށް އާބާދީ ކަނޑައަޅާފައިވާގޮތުގެ ވަގުތީ ރިޕޯޓަށް ލިބިފައިވާ ޝަކުވާ/ޚިޔާލުތައް އިލެކްޝަންސް ކޮމިޝަނުން ދިރާސާކޮށް ނިންމައިފިކަމަށާއި އެ ޝަކުވާތައް ހުށަހެޅި ފަރާތްތަކަށް އީސީން މިއަދު ޖަވާބުދެއްވާނެކަން ހާމަކުރައްވައި ހަބީބްވިދާޅުވި މިހާރު ކުރިއަށްދަނީ، ރާތަކުގެ ފައިނަލް ރިޕޯޓު އާންމު ކުރުމަށް ކުރަންޖެހޭ ޗާޓުތަކުގެ މަސައްކަތްތައް ކަމުގައެވެ. 

އިލެކްޝަންސް ކޮމިޝަނުން ލަފާ ކުރާ ގޮތުގައި ރައްޔިތުންގެ މަޖިލީހުގެ އިންތިޚާބު ބޭއްވޭނެ ކަމަށް ލަފާކުރެވެނީ އަންނަ އަހަރުގެ މާޗުމަހުގެ ފަހުކޮޅުގައި ނުވަތަ އޭޕްރީލްމަހުގެ ކުރީކޮޅުގައެވެ. އަދި އިންތިޚާބު ބޭއްވޭނެ ސީދާ ތާރީޚެއް މި ނޮވެމްބަރު މަހުގެ ތެރޭގައި އިއުލާނުކުރެވޭ ވަރު ވާނެކަމަށްވެސް މީގެ ކުރިން ހަބީބް ވަނީ ވިދާޅުވެފައެވެ. 

މި ހިނގާ ދައުރުގައި މަޖިލީހުގައި 87 މެންބަރުން ތިއްބަވައެވެ. ނަމަވެސް އަލަށް އިތުރުކުރި 6 ދާއިރާއާއެކު 20 ވަނަ މަޖިލީހުގައި ޖުމްލަ 93 މެންބަރުން ތިއްބަވާނެއެވެ.