އެއާޕޯޓް މަރާމާތު ކުރުމަށް ބޭނުންވާ 80 މިލިއަން ރުފިޔާ ހޯދީ  ރައީސް އިބްރާހިމް މުހައްމަދު ސޯލިހުގެ ސަރުކާރުން ނޫންކަމަށް ޕީއެންސީ ގެ ޗެއާޕާސަން އަބްދުއްރަހީމް އަބްދުالله ވިދާޅުވެއްޖެއެވެ.

އަދުރޭ މިފަދައިން ވިދާޅުވެފައި ވަނީ ވެލާނާ އިންޓަނޭޝަނަލް އެއާޕޯޓަށް އިތުރަށް ބޭނުންވި 79.8 މިލިއަން ޑޮލަރު (1.2 ބިލިއަން ރުފިޔާ) ހޯދުމުގެ މަސައްކަތްތައް ކުރީ މި ސަރުކާރުން ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވުމާއި ގުޅިގެން މިއަދު ފޭސްބުކްގައި ކުރެއްވި ޕޯސްޓެއްގައިއެވެ.

އަދުރޭގެ ޕޯސްޓްގައި އިތުރަށް ވިދާޅުވަފައިވަނީ އެއާޕޯޓް ގެ މަޝްރޫއު އަށް އިތުރަށް ބޭނުންވި ފައިސާ ހޯއްދެވީ އިންތިހާބީ ރައީސް ޑރ.މުހައްމަދު މުއިއްޒު ކަމަށެވެ. އަދި މި 80 މިލިއަން ޑޮލަރަކީ މުއިއްޒު ޔޫއޭއީ އަށް ކުރެއްވި ދަތުރުފުޅުގައި ހޯއްދެވި އެއްޗެއް ކަމަށްވެސް އެބޭފުޅާ ފާހަގަ ކުރެއްވިއެވެ.

"ރޯ މާ ދުވާލު މިވަރުގެ ބޮޑެތި ދޮގުތައް ހަދާއިރު ރައްޔިތުންނަށް އޮޅުވާލުމުގެ ނަތީޖާ އަދިވެސް ނުފެންނަނީތޯ؟ ނިމިގެން ދިޔަ ރިޔާސީ އިންތިހާބުގެ ނަތީޖާއިން ވަރަށް ސާފުކޮށް އިބޫ ސޯލިހް ގެ ސަރުކާރުގެ އޮޅުވާލުމާއި ،މަކަރާއި، ހީލަތް ރައްޔިތުން ބަލައި ނުގަންނަކަން އެއޮތީ ވަރަށް ރީތިކޮށް ފެންނަން." އަދުރޭ ވިދާޅުވިއެވެ.

ވީއައިއޭގެ އާ ޕެސެންޖާ ޓާމިނަލްގެ ޑިޒައިނަށް ގެނެވުނު ބަދަލާއެކު މަސައްކަތް ނިންމުމަށް އިތުރު 200 މިލިއަން ޑޮލަރު ބޭނުންވާއިރު ، އޭގެ ތެރެއިން 100 މިލިއަން ޑޮލަރު ފޯރުކޮށްދިނުމަށް ސައުދީ ފަންޑުން ވަނީ އެއްބަސްވެފަ އެވެ.

ބާކީ ބޭނުންވާ 100 މިލިއަން ޑޮލަރުގެ ތެރެއިން 80 މިލިއަން ޑޮލަރު ޔޫއޭއީގެ އަބޫ ދާބީގެ ފަންޑު ފޯ ޑިވޮލެޕްމެންޓު (އޭޑީއެފްޑީ) މެދުވެރިކޮށް ހަމަޖައްސަވާނެ ކަމުގެ ޔަގީންކަން ޔޫއޭއީން ދިނުމާއެކު އެ މަސައްކަތް އަންނަ އަހަރަށް ނިންމޭނެ ކަމުގެ ޔަގީންކަން ލިބިފައިވާ ކަމަށް ފިރުޒުލް ވަނީ ވިދާޅުވެފަ އެވެ.