އިންތިޚާބީ ރައީސް ޑރ މުހައްމަދު މުއިއްޒުގެ ވެރިކަމެއްގައި ދިވެހިރާއްޖެއަށް އިގްތިސާދީ ގޮތުންނާއި އެނޫންވެސް ހުރިހާ ދާއިރާ އަކުން ކުރިއެރުން ލިބިގެންދާނެ ކަމަށް ޕީއެންސީ ސެނެޓަރ ހުސައިން ޝިފާޒް ވިދާޅުވެއްޖެ އެވެ. 

ޝިފާޒު މިއަދު ކުރެއްްވި ޓުވީޓެއްގައި ވިދާޅުވީ، ޑރ. މުޢިއްޒު ވެރިކަމާއި ހަވާލުވެވަޑައިގެންނަވަން ހަފްތާއަކަަށް ވެފައިވާއިރު، މާތް الله ގެ އިރާދަފުޅުން އެމަނިކުފާނު ވެރިކަން ވެގެންދާނީ އުއްމީދީ ވެރިކަމެއް ކަމަށެވެ. 

"އެއީ ގައުމު ވެއްޓިފައިމިވާ އިގްތިސާދީ އަނދަވަޅުން ނަގައި، ކޮޅަށް ޖަހައި، ބާރު ދުވެލީގައި ކުރިއަށް ޖައްސާލައި ހުރިހާ ދާއިރާ އަކުންވެސް ގައުމަށް ނަފާވާނެ ވެރިކަމެއް. ދިވެހިންނަށް ދެން އޮތީ އުފާވެރި ދުވަސްތަކެއް. ދިވެހީންގެ ރާއްޖެ ދިވެހިންނަށް ވަރަށް އަވަށް ލިބިގެންދާނެކަމީ ޝައްކެއް އޮތް ކަމެއް ނޫން." ޝިފާޒް ވިދާޅުވި އެވެ. 

Advertisement

އިންތިޚާބީ ރައީސް ޑރ މުހައްމަދު މުއިއްޒު ހުވާކުރައްވައި ވެރިކަމާއި ހަވާލުވެވަޑައިގަންނަވާނީ މި މަހުގެ 17 ވަނަ ދުވަހުއެވެ. އެމަނިކުފާނު ހުވާ ކުރައްވާ ޖަލްސާގެ ކަންކަންވެސް މިހާރު ކުރިއަށް ދާއިރު، އެމަނިކުފާނުގެ އެދުމުގެ މަތިން އެ ޖަލްސާ ބާއްވަން ނިންމާފައިވަނީ ޖުމްހޫރީ މައިދާނުގަ އެވެ. 

ވެރިކަމާއި ހަވާލުވެވަޑައިގެންނެވުމަށްފަހު އެންމެ ފުރަތަމަ ފަށްޓަވާނީ ދިވެހިންގެ ރާއްޖެ ދިވެހިންނަށް ހޯދައި ދެއްވުމުގެ މަސައްކަތް ކަމަށް މުޢިއްޒު ވަނީ ވިދާޅުވެފަ އެވެ.