މަސައްކަތް ފެށިގެން މިހާރު ކުރިއަށްދާ ވެލާނާ އިންޓަރނޭޝަނަލް އެއަރޕޯޓްގެ އައު ޓަރމިނަލްގެ މަސައްކަތް ނިމޭއިރު އެ ޓާރމިނަލް ވެގެންދާނީ މި ސަރަހައްދުގައިވެސް ހުރި އެންމެ ހިތްގައިމު އެއް ޓާމިނަލަށް ކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ވިދާޅުވެއްޖެއެވެ.
މިއަދު ފާހަގަ ކުރާ ޖުމްހޫރީ ދުވަހުގެ މުނާސަބަތުގައި ދިވެހި ޤައުމާއި މުޚާތަބު ކުރައްވައި ރައީސް ދެއްވި ޚިތާބުގައި އެމަނިކުފާނު ވިދާޅުވީ، އެ މަނިކުފާނު ވެރިކަމާއި ހަވާލުވެ ވަޑައިގެންނެވި އިރު ޓަރމިނަލްގައި އެޅިފައިވަނީ ހަމައެކަނި އެ އިމާރާތުގެ ބިންގާ ކަމުގައެވެ. އަދި ފުރިހަމަ ޚިދުމަތެއް ދިނުމަށްޓަކައި ގެންނަންޖެހޭ ބަދަލު ތަކާއެކު، އައު ޓަރމިނަލްގެ މަޝްރޫޢު ކުރިއަށް ގެންދިއުމަށްޓަކައި ހޯދަން ޖެހޭ ފައިސާ އެމަނިކުފާނުގެ ސަރުކާރުން ހޯދައިފައިވާނެ ކަމަށެވެ.
ފުރިހަމަ ޚިދުމަތެއް ދެވޭނެ ގޮތަށް ޑިޒައިނަށް ކޮންމެހެން ގެންނަން ޖެހުނު ބަދަލުތައް ގެނައިން. މަޝްރޫޢު ކުރިއަށް ގެންދަން ހޯދަންޖެހުނު ފައިސާ އަޅުގަނޑުމެން ހޯދިން
ރައީސް ޞާލިޙް
މީގެ އިތުރުން އެމަނިކުފާނު ވިދާޅުވީ، ނިމެމުންދާ ހިތްގައިމު ޓަރމިނަލްގެ ޙަޤީޤީ ސިފަ، ހުޅުލޭގެ މަލައިން ފެންނަން މިހާރު ހުންނާނެ ކަމަށެވެ.
ނިމޭއިރު އެ ޓަރމިނަލް ވެގެންދާނީ، މި ސަރަޙައްދުގެ އެންމެ ހިތްގައިމު އެއް ޓަރމިނަލަށް.
ރައީސް ޞާލިޙް
ހަމަ އެޔާއެކު އެމަނިކުފާނުގެ ޚިތާބުގައި ވަނީ، ހަނިމާދޫގައި އަލަށް އަޅާ ބައިނަލްއަޤްވާމީ އެއަރޕޯޓުގެ މަސައްކަތް ބާރަށް ކުރިއަށްދާކަމަށާއި އަދި އައްޑޫގެ އިޤްތިޞާދީ ތަރައްޤީގެ މައި ނާރެސް ކަމުގައިވާ ގަން އިންޓަރނޭޝަނަލް އެއަރޕޯޓް އިތުރަށް ތަރައްޤީކުރުމުގެ ޢަމަލީ މަޝްރޫޢުވެސް ކުރިއަށް ދާކަން ފާހަގަ ކުރައްވައިފައެވެ.
ހަމައެޔާއެކު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ފާހަގަ ކުރެއްވި ގޮތުގައި ދެ އަހަރަށް ދިގުދެމިގެން ދިޔަ ކޮވިޑްގެ ޢާލަމީ ވަބާގެ ދަތިތަކާއި ގޮންޖެހުންތަކަށްފަހުވެސް ކުރެވުނު ގިނަ މަސައްކަތުން އެންމެ ފުރަތަމަ ބޯޑަރު ހުޅުވި އެއް ޤައުމަކީ ރާއްޖެ ކަމުގައި ފާހަގަކުރައްވައިފައެވެ. އަދި އެއީ ފަތުރުވެރިކަމާއި އިޤްތިޞާދު، އިހުހުރި ހިސާބަށް ރުޖޫޢަވުމުގައި ލިބުނު ބޮޑު ކާމިޔާބެއްގެ ގޮތުގައިވެސް އެމަނިކުފާނު ވަނީ ސިފަކުރައްވާފައެވެ.
Advertisement
This content is created and paid for by advertisers and does not involve Voice Journalists
