އިންތިޚާބީ ރައީސް ޑރ މުހައްމަދު މުއިއްޒުގެ ސަރުކާރުގައި މިނިސްޓްރީތައް އިތުރުވި ނަމަވެސް، ސިޔާސީ މަޤާމުތައް މަދުވެފައި ޚަރަދުތައް ކުޑަވާނެކަމަށް އިންތިޚާބީ ރއީސް ޑރ މުހައްމަދު މުއިއްޒު ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައި ވަނީ ޖުމްހޫރީ ދުވަހުގެ މުނާސަބާއާއި ގުޅިގެން ދައުލަތުގެ މީޑިއާއިން ކުރިއަށް ގެންދިޔަ ޕްރޮގްރާމެއްގައި ސަރުކާރުގެ ވުޒާރާތަކާއި ގުޅޭގޮތުން ކުރި ސުވާލަށް ޖަވާބުދެއްވަމުން ނެވެ. 

ޑރ މުއިއްޒު ވިދާޅުވީ ބައެއް ވުޒާރާތަކުގެ މަސައްކަތްތައް ހަލުވިކަމާއެކު ކުރިއަށް ގެންދިއުމަށް ބޮޑެތި ވުޒާރާތައް ބައިކޮށްފައިވާނެ ކަމަށެވެ. އަދި ރިޔާސީ އިންތިޚާބުގައި ވައުދުވި ގޮތަށް، ބައެއް ދާއިރާތަކަށް ޚާއްސަކޮށްގެން އާ ވުޒާރާތަށްވެސް އެކުލަވާލައްވާފައިވާނެ ކަމަށެވެ. 

އިންތިޚާބީ ސަރުކާރުގައި 22 ވުޒާރާ އެކުލަވާލާފައިވާނެކަން ޑރ މުއިއްޒު ފާހަގަކުރެއްވި އެވެ. އެއާއެކު އެމަނިކުފާނު ވިދާޅުވީ އާ ވުޒާރާތަކަށް އިތުރު އިމާރާތްތައް ނުނަންގަވާނެ ކަމަށެވެ. އަދި އެ ވުޒާރާތައް ހިންގަވާނީ މިހާރުވެސް ހުރި އިމާރާތްތަކުގައި ކަމަށެވެ. 

އޭގެ އިތުރުން އާ ވުޒާރާތައް އެކުލަވާލި ނަމަވެސް ސިޔާސީ މަޤާމު 700 އަށް ވުރެ އިތުރު ނުކުރައްވާނެ ކަމަށާއި، ހިންގަވާނީ ޚަރަދުކުޑަ ސަރުކާރެއްކަމަށް ޑރ މުއިއްޒު ވިދާޅުވި އެވެ.

ޑރ މުއިއްޒު ވިދާޅުވީ އާ ވުޒާރާތަކެއް އެކުލަވާލި ނަމަވެސް، ސިވިސް ސާވިސްއަށް އޭގެ ޒާތުގައި ނަގަން ޖެހޭ މުވައްޒަފުން ނިސްބަތުން އިތުރުވެގެން ނުދާނެ ކަމަށެވެ. އެގޮތުން ގާތްގަނޑަކަށް އަލަށް ނަގާ ވަޒީފާތައް 5 އިންސަވެސް އިތުރު ނުވާނެކަމަށް ޑރ މުއިއްޒު ވިދާޅުވި އެވެ. 

އެމަނިކުފާނު ވިދާޅުވީ ބައެއް ބޮޑެތި ވުޒާރާތަށް ދެބައި ކުރުމާއި އާ ވުޒާރާތަކެއް އުފެއްދުމުގެ މަގްސަދަކީ ވުޒާރާތަކަށް ބުރަ ނުވާނެވަރުގެ މެންޑޭޓުތައް އެކުލަވާލުން ކަމަށެވެ. އަދި އެފަދަ މެންޑޭޓުތައް އެކުލަވާލައިގެން މަސައްކަތް ކުރާނަމަ ނަތީޖާ ނެރުމަށް ވުޒާރާތަކަށް ވެސް ފަސޭހަވެގެންދާނެ ކަމަށާއި، އޭގެ ސަބަބުން ރައްޔިތުންނަށް ޚިދުމަތް ފޯރުކޮށްދިނުމަށް ވުޒާރާތަކަށް ބޮޑެތި ލުއި ފަސޭހަކަން ލިބިގެންދާނެ ކަމަށް ޑރ މުއިއްޒު ވިދާޅުވި އެވެ.