ސަރުކާރު ބަދަލުވުމުން، މިހާރު ސަރުކާރު ހިންގާ މައި ޕާޓީ ވާދަވެރި ޕާޓީގެ ގޮތުގައި ހަރަކާތްތެރިވާން ފަށާއިރު ޒިންމާދާރު އިދިކޮޅު ޕާޓީގެ ގޮތުގައި ހަރަކާތްތެރިވުމަށް އެދިލައްވާކަމަށް އިންތިޚާބީ ރައީސް ޑރ މުއިއްޒު އެދިވަޑައިގެންފި އެވެ. 

ޖުމްހޫރީ ދުވަހާއި ގުޅިގެން ދައުލަތުގެ މީޑިއާއިން ކުރިއަށް ގެންދިޔަ ޚާއްސަ ޕްރޮގްރާމެއްގައި ވާހަކަދައްކަވަމުން ޑރ މުއިއްޒު ވިދާޅުވީ މަލްޓި ޕާޓީ ނިޒާމަކީ ރައްޔިތުން ވަރަށް ޝައުގުވެރިވާ ނިޒާމެއްކަމަށެވެ. އަދި ސިޔާސީ ޕާޓީތަކާއި ގުޅިގެން މަސައްކަތްކުރުމުގެ ރޫހު ރައްޔިތުންގެ މެދުގައި އޮތްކަން ފާހަގަކުރެވޭ ކަމަށެވެ. 

އެހެންކަމުން ސިޔާސީ ޕާޓީތަކުން މަސައްކަތްކުރާއިރު ޤައުމީ ފިކުރު އިސްކުރުން ވަރަށް މުހިންމުކަމަށް އިންތިޚާބީ ރައީސް ވިދާޅުވިއެވެ.

އެގޮތުން ސަރުކާރު ބަދަލުވުމުން، މިހާރު ސަރުކާރު ހިންގާ ޕާޓީ ވާދަވެރި ޕާޓީއަށް ބަދަލުވެގެންދާނެ ކަމަށާއި، އެ މަޤާމު ފުރުއްވާއިރު ޒިންމާދާރު ކަމާއެކު ޕާޓީގެ ހަރަކާތްތައް ކުރިއަށް ގެންދެވުމަށް ޑރ މުއިއްޒު ވަނީ ގޮވާަލައްވާފަ އެވެ. 

އެމަނިކުފާނު ވިދާޅުވީ ޒިންމާދާރު އޮޕޮސިޝަނަކުން ރައްޔިތުންނަށް ފައިދާ ހުރި ކަންކަން ކުރިއަށް ގެންދިއުމަށް ހިތްވަރު ދެއްވާނެ ކަމަށެވެ. އަދި ސަރުކާރުން ކުރާ ރަނގަޅު ކަންކަން ފާހަގަކޮށް ތައުރީފުވެސް ކުރާނެ ކަމަށެވެ. 

އެހެން ނަމަވެސް ސަރުކާރުން ގޯސްކޮށް ކަމެއް ކުރާކަން ފާހަގަކުރެވޭނެ ނަމަ، އެކަން ރައްޔިތުންނަށް ބުނެދީ، އޭގައި އޮތް ރަނގަޅުކޮށް ހާމަކޮށްދިނުމަކީ ސަރުކާރާއި ވާދަވެރި ސިޔާސީ ޕާޓީގެ ޒިންމާކަމަށާއި، އެގޮތަށް ޕާޓީތަކުން ޒިންމާދާރުކަމާއެކު ފާޅުކުރާ ޚިޔާލުތަކަށް މަރުހަބާ ކިޔާނެކަމަށް ޑރ މުއިއްޒު ވިދާޅުވި އެވެ. 

އޭގެ އިތުރުން އެމަނިކުފާނު ވިދާޅުވީ ސިޔާސީ ޕާޓީތައް ކުރިއަރުވާ ޕާޓީތައް ބާރުވެރިކުރުވުމަށް އެމަނިކުފާނުގެ ސަރުކާރުން މަސައްކަތްކުރަމުން ގެންދަވާނެ ކަމަށެވެ. 

ޕާޓީން ގައުމީ ފިކުރު އިސްކޮށް މަސައްކަތްކުރާނަމަ، ޕާޓީގެ ހަރަކާތްތައް ހިންގުމުގައި މާލީ އެހީތެރިކަން ވެސް ސަރުކާރުން ފޯރުކޮށްދޭނެ ކަމަށާއި، ސިޔާސީ ހަރަކާތްތައް ހިންގާއިރު، ގައުމީ ރޫހާއި ޚިލާފުނުވެ ހިންގާ ހަރަކާތްތަކަށް ސަރުކާރުން ފުރިހަމަ އެއްބާރުލުން ދެއްވާނެކަމަށް ވެސް އިންތިޚާބީ ރައީސް ޑރ މުއިއްޒު ވަނީ ވިދާޅުވެފަ އެވެ.