އާ ސަރުކާރުން އެންމެ އިސްކަންދޭނީ އެއާޕޯޓު މަޝްރޫއާއި ފުށިދިއްގަރުފަޅު މަޝްރޫއު ނިންމުމަށްކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައިވަނީ ޖުމްހޫރީ ދުވަހުގެ މުނާސަބާއާއި ގުޅިގެން ދައުލަތުގެ މީޑިއާއިން ގެނެސްދިން ޚާއްސަ ޕްރޮގްރާމުގައި ކުރި ބައެއް ސުވާލުތަކަށް ޖަވާބުދެއްވަމުން ނެވެ. 

އެ ޕްރޮގްރާމުގައި ޕްރެސެންޓަރު ވަނީ މިހާރު ރައްޔިތުންގެ އެންމެ ބޮޑު ޝަކުވާއެއް އޮތް ބޯހިޔާވަހިކަމުގެ މައްސަލަ ޙައްލުކުރުމަށް ޑރ މުއިއްޒުގެ ސަރުކާރުން ކިހާ އަވަސް މިނެއްގައި މަސައްކަތް ކުރައްވާނެތޯ ސުވާލު ކުރައްވާފަ އެވެ. 

އެ ސުވާލަށް ޖަވާބުދެއްވަމުން އެމަނިކުފާނު ވިދާޅުވީ ސަރުކާރާއި ޙަވާލުވުމަށްފަހު އެންމެ އިސްކަމެއް ދެއްވާނީ ރައީސް ޔާމިނުގެ ސަރުކާރުގައި ފެއްޓެވި އެއާޕޯޓު އެކްސްޕެންޝަން ޕްރޮޖެކްޓު ނިންމާލުމަށް ކަމަށެވެ. އެގޮތުން އެ މަޝްރޫއު ނިންމާލުމަށް ބޭނުންވާ ފަންޑު މިހާރު ހަމަޖެހިފައިވާކަން އެމަނިކުފާނު ފާހަގަކުރެއްވި އެވެ. 

އެއާއެކު އެމަނިކުފާނު ވިދާޅުވީ ވެރިކަމަށް ވަޑައިގެން ދެތިން މަސްތެރޭގައި ފުށިދިއްގަރުފަޅު ހިއްކުމުގެ މަސައްކަތް ފައްޓަވާނެ ކަމަށެވެ. އެއީ މި ސަރުކާރުން ބޯހިޔާވަހިކަމުގެ މައްސަލަ ޙައްލުކުރުމަށް ކުރިއަށް ގެންދާނެ އެންމެ ބިޔަ މަޝްރޫއު ކަމަށާއި، ފުރަތަމަ އަހަރުތެރޭ ފުށި ދިއްގަރުފަޅު ހިއްކާ ނިންމުމަކީ ސަރުކާރުގެ އަމާޒުކަމަށް ޑރ މުއިއްޒު ވިދާޅުވި އެވެ. 

އެމަނިކުފާނުގެ ވެރިކަމުގައި އެ ދެ މަޝްރޫއަށް ޚާއްސަ އިސްކަމެއް ދެއްވާ ސަބަބުތަކަށް ވެސް ޑރ މުއިއްޒުގެ ވާހަކަފުޅުގައި އަލިއަޅުވާލެއްވި އެވެ. 

އެގޮތުން އެމަނިކުފާނު ވިދާޅުވީ އެއާޕޯޓު މަޝްރޫއަކީ ރާއްޖޭގެ އިޣްތިޞާދު ކޮޅަށް ޖެހުމަށް އެންމެ މުހިންމު މަޝްރޫއުކަމަށެވެ. އެއާޕޯޓު މަޝްރޫއު ވީހާ ވެސް އަވަހަކަށް ނިންމުން ވެގެންދާނީ ރާއްޖޭގެ އިޤްތިޞާދު ނަގާ ކޮޅަށް ޖެހުމަށް ވަރަށް ބޮޑު ބާރަކަށް ކަމަށާއި، އެ މަޝްރޫއު އަވަސްކުރުމަށް ސަރުކާރުން މަސައްކަތް ކުރާނެކަމަށް ޑރ މުއިއްޒު ވިދާޅުވި އެވެ. 

އަދި ހަމައެއާއެކު ބޯހިޔާވަހިކަމުގެ މައްސަލަ ޙައްލުކުރުމަކީ އެމަނިކުފާނު ޚާއްސަ އިސްކަމެއްދޭ ސިޔާސަތަކަށްވުމުން ފުށިދިއްގަރުފަޅު މަޝްރޫއުވެސް ހަލުވި ދުވެހީގައި ނިންމަވާނެކަމަށް ޑރ މުއިއްޒު ވިދާޅުވި އެވެ. 

އެ މަޝްރޫއާއި ގުޅޭގޮތުން މީގެކުރިން ވާހަކަދައްކަވަމުން ޑރ މުއިއްޒު ވިދާޅުވީ އެއީ ހުޅުމާލޭގެ ދެ ފިޔަވަހި އެއްކޮށްލީމާ އޮންނަ ސަރަހައްދަށްވުރެ ތިންގުނަ ބޮޑު ސަރަހައްދެއް ކަމަށާއި، އެ މަޝްރޫއު ނިމޭއިރު މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެކަމަށް ޤަބޫލުފުޅު ކުރައްވާކަމަށެވެ.