ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޤާމުން ވަކިކުރުމަށް ހުށައަޅާފައިވާ މައްސަލައިގެ ގަރާރާއި ގުޅިގެން މަޖިލީހުގެ މެދުހެންވޭރު ދާއިރާގެ މެމްބަރު އަލީ އާޒިމް ނެންގެވި ނިޒާމީ ނުކުތާއާއި އެކު މަޖިލީސް ހޫނުވެއްޖެ އެވެ. 

ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލަ ކުރިޔަށް ގެންދެވޭނެ ގޮތެއް ހޯދަން އެމް.ޑީ.ޕީއިން ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލަ ބެއްލެވުމަށްފަހު އެ ކޯޓުން ވަނީ މަޖިލީހުގެ ނައިބު ރައީސް އީވާ އަބްދުﷲ ނެތްނަމަވެސް އެ މައްސަލަ ކުރިއަށް ގެންދެވޭނެކަމަށް ނިންމާފައެވެ. 

އެއާއެކު މިއަދު އެ މައްސަލަ ކުރިއަށް ގެންދިއުމަށް މަޖިލީހަށް އެޖެންޑާކޮށް ޖަލްސާ ފަށާފައިވާއިރު، އާޒިމް ވަނީ މަޖިލީހުގެ ރައީސް މަގާމުން ވަކިކުރުމަށް ހުށައަޅާފައިވާ ގަރާރަކީ ގާނޫނުގައި ގަރާރެއްގައި ހުންނަން ޖެހޭ ސިފަތައް ނެތް ގަރާރެއްކަން ފާހަގަކޮށްފައެވެ. އަދި ގަވައިދާއި ޚިލާފަށް އޮތް ގަރާރެއް މަޖިލީހަށް ހުށަނޭޅޭނެ ކަމަށާއި، އެގޮތަށް އެ ގަރާރު ހުށައަޅައިގެން ޖަލްސާ ކުރިއަށް ގެންދިއުމުގެ ފުރުސަތު ނުދެއްވާނެކަމަށް އާޒިމް ވިދާޅުވި އެވެ. 

Advertisement

އެފަހުން ރައްޔިތުންގެ މަޖިލީސް ތަމްސީލުކުރައްވާ ދަ ޑިމޮކްރެޓްސްގެ ގިނަ މެމްބަރުން ވަނީ ނިޒާމީ ނުކުތާ ނަންގަވާ އާޒިމްގެ އެ ވާހަކައަށް ތާއީދުކޮށްފަ އެވެ. ޑިމޮކްރެޓްސްގެ މެމްބަރުން ފާހަގަކޮށްފައިވާ ގޮތުގައި ގަރާރެއް ހުށައަޅާނަމަ އޭގައި ދީގާޖާއެއް އޮންނަން ޖެހެއެވެ. 

އެހެން ނަމަވެސް ނަޝީދުގެ އިތުބާރު ނެތްކަމުގެ މައްސަލައިގައި ހުށައަޅާފައިވާ ގަރާރުގައި ދީބާޖާ އުނިވާކަމަށާއި، އެހެންކަމުން ގަރާރެއްގެ ސިފަ ފުރިހަމަނުކޮށް، މިހާރު ހުށައަޅާފައިވާ ގަރާރާއިއެކު މައްސަލަ ކުރިއަކަށް ނުދެވޭނެ ކަމަށާއި، އެ މައްސަލަ ކުރިއަށް ގެންދިއުމަށް ރިޔާސަތުން ފުރުސަތުވެސް ދެއްވައިގެން ނުވާނެކަމަށް ޑިމޮކްރެޓްސްގެ މެމްބަރުން ވަނީ ތަކުރާރުކޮށް ވިދާޅުވެފަ އެވެ. 

އެކަމާއި ގުޅިގެން އެމްޑީޕީގެ މެމްބަރުން ވަރަށް ބޮޑަށް މަޖިލީހުގައި ނުރުހުން ފާޅުކުރަން ވަނީ ފަށައިފައެވެ. އަދި މިއަދުގެ ޖަލްސާގެ ރިޔާސަތު ބަލަހައްޓަވަމުން ގެންދަވާ ވިލުފުށީ ދާއިރާގެ މެމްބަރު ހަސަން އަފީފަށް ނިސްބަތްކޮށް ނުރުހުމުގެ ބަސްތައް އެމްޑީޕީގެ މެމްބަރުން ވަނީ ރައްދުކޮށްފަ އެވެ. 

އެއާއެކު ޖަލްސާ ވަނީ ވަރަށް ބޮޑަށް ހޫނުވެފައެވެ.