ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމަށް ހުށައެޅި ގަރާރު މަޖިލީހުގެ ގަވައިދާއި ޚިލާފުކަމަށް ކަނޑައަޅާ ހެދުނުގެ ދަންފަޅީގައި ބޭރުކޮށްލުމަށްފަހު، އަލުން އެ މައްސަލަ ކުރިއަށް ގެންދިއުމަށް ބޭއްވި ޖަލްސާވެސް ކުރިއަށް ނުގެންދެވޭނެކަމަށް ކަނޑައަޅާ ނިންމާލައިފި އެވެ.
ނަޝީދުގެ އިތުބާރު ނެތްކަމުގެ ގަރާރުގެ މަސައްކަތް ކުރިއަށް ގެންދިއުމަށް މިއަދު ދެވަނައަށް އެޖެންޑާ ކުރި ޖަލްސާގެ ރިޔާސަތު ބެލެހެއްޓެވީ މަޖިލީހުގެ ނައިބު ރައީސް އީވާ އަބްދުﷲ އެވެ.
އެ ޖަލްސާ ފެށުނުތާ ކުޑަ ވަގުތުކޮޅެއް ތެރޭ އެއީ ހެނދުނުގެ ޖަލްސާގައި ބޭރުކޮށްފައިވާ ގަރާރެއް ކަމަށް ބުނެ ދެވަނަ ޖަލްސާ އީވާ ނިންމަވާލެއްވި އެވެ.
"މި ގަރާރަކީ މިއަދު ހެނދުނު 09:00 ޖެހިއިރު ފެށުނު ޖަލްސާގައި މިއަދުގެ ރިޔާސަތުން އެ ޖަލްސާ އެ ހިސާބުން ނިމުނީ ކަމަށް ނިންމަވައި ބޭރުކޮށްފައިވާ ގަރާރެއް. އެހެންވީމާ އަޅުގަނޑެއް ގަބޫލެއް ނުކުރަން މިއީ މިއަދު ދެން އިތުރަށް ކުރިއަށްގެންދެވޭނެ މައްސަލައެއް ކަމަށް. މި ގަރާރަކީ މަޖިލީހުގެ ރިޔާސަތުން ނިޒާމީ މައްސަލައެއްގައި ގޮތެއް ނިންމައި ބޭރުކޮށްފައިވާ ގަރާރެއް,"
މަޖިލީހުގެ ނައިބު ރައީސް އީވާ އަބްދުﷲ
އީވާ ޖަލްސާ ނިންމަވާލެއްވުމާއި ގުޅިގެން އެމްޑީޕީގެ މެމްބަރުން ވަނީ ނުރުހުން ފާޅުކޮށް މަޖިލީހުގައި އަޑުގަދަކުރަން ފަށާފައެވެ. އަދި މަޖިލީހުގެ ރިޔާސަތުން މިއަދު އަމަލުކޮށްފައިވަނީ ޚުދުމުހުތާރުކޮށްކަމަށް އެ މެމްބަރުން ވިދާޅުވެފައި ވެއެވެ.
Advertisement
This content is created and paid for by advertisers and does not involve Voice Journalists
