ވެލާނާ އިންޓަރނޭޝަނަލް އެއަރޕޯޓްގެ އައު ޓަރިމިނަލް ތަރައްޤީ ކުރުމުގެ މަޝްރޫއުގެ ދަށުން ސައުދީ އަރަބިއްޔާގެ ބިން ލާދިން ކުންފުންޏާއި ހަވާލުކުރެވިގެން މިހާރު ކުރިއަށްދާ މަސައްކަތްތަކުން އެެކަނި، އެޓާރމިނަލް ގެ ބޭނުން ކުރަން ފެށޭ ވަނރު ނުވާނެކަމުގައި އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެއެވެ. 

އެ މަނިކުފާނު މިފަދައިން ވިދާޅުވީ، ވެލާނާ އިންޓަރނޭޝަނަލް އެއަރޕޯޓްގެ އައު ޓަރިމިނަލް ތަރައްޤީ ކުރުމުގެ މަޝްރޫއުގެ ދަށުން ކުރިއަށްދާ މަސައްކަތްތައް ބައްލަވާލެއްވުމަށް މިއަދު އެ ސަރަހައްދަށް ކުރެއްވި ޒިޔާރަތަށްފަހު ނޫސްވެރިންނާއި ބައްދަލު ކުރައްވާ ވާހަކަފުޅު ދައްކަަވަމުންނެވެ. 

އެ މަނިކުފާނުގެ ވާހަކަ ފުޅުގައި ފާހަގަ ކުރެއްވި ގޮތުގައި ސައުދީ އަރަބިއްޔާގެ ބިންލާދިން ކުންފުންނާއި ހަވާލުކުރެވިގެން ކުރިއަށްދާ ސްކޯޕްގެ 54 އިންސައްތަ މަސައްކަތް މިހާރު ނިމިފައިވީނަމަވެސް އަދި އެ ސްކޯޕްގެ ބާކީ ބައި ނިމުމަށް އެ ކުންފުނިން އަންދާޒާ ކުރަނީ 2025 ވަނަ އަހަރުގެ މެދެއްހާތަނުގައި ކަމަށެވެ. އެހެންމެވެސް ބާކީ ހުރި މަސައްކަތްތައް 2024 ވަނަ އަހަރުގެ އޮކްޓޫބަރު މަހުގެ ނިޔަލަށް ފުރިހަމަ ކުރުމަށް އެމަނިކުފާނު ބޭނުންފުޅުވެ ވަޑައިގަންނަވާކަމުގައިި އިންތިޚާބީ ރައީސް ފާހަގަކުރެއްވިއެވެ. 

Advertisement

އެހެންކަމުން މިއީ 8 ނުވަތަ 9 ވަރަކަށް މަސްދުވަސް މަސައްކަތް އަވަސްކުރުން ކަމުގައި ފާހަގަ ކުރައްވަމުން އިންތިޚާބީ ރައީސް ޑރ މުއިއްޒު ވިދާޅުވީ، އައު ޓަރމިނަލް ތަރައްޤީ ކުރުމުގެ މަސައްކަތުގެ ސްކޯޕްގައި ނުހިމެނޭ، އެހެންނަމަވެސް އެ މަސައްކަތްތަކާއި ނުލައި ޓަރމިނަލް ބޭނުންކުރަން ނުފެށޭ ކަންކަން ހުރިކަން ފާހަގަވެގެން ގޮއްސިކަމުގައި ޑރ މުއިއްޒު ވިދާޅުވިއެވެ. 

އެގޮތުން އެފަދަ ކަންކަން ފާހަގަ ކުރައްވަމުން ޑރ މުއިއްޒު ވިދާޅުވީ ޓަރމިނަލްގެ ހުރިހާ އޮޕަރޭޝަނަކާއި ގުޅުވައިދޭ ސަރވިސް ރޯޑު  ހެދުމަށް ހަވާލު ކޮށްފައި ނުވާކަމަށާއި ވުމާއެކު އެމަނިކުފާނުގެ އެންމެ އިސް އަމާޒެެއްގެ ގޮތުގައި އެ މަގު ހެދުން ކުރިއަށް ގެންދަވާނެ ކަމަށާއި އެ މަސައްކަތަށްވެސް 10 ވަރަކަށް މަސް ހެދަވާނެކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވިއެވެ. 

މީގެ އިތުރުން ޑރ މުއިއްޒު ފާހަގަ ކުރެއްވި ގޮތުގައި އެ މަޝްރޫއުގެ ދަށުން ހަވާލުކުރެވިފައިވަނީ ހަމައެކަނި "ބޭސިކް ފިނިޝިންގ" ގެ މަސައްކަތްތައްކަމަށާއި މަޝްރޫއަށް އެންމެ މުހިއްމު ޑިއުޓީ ފްރީގެ ސަރަހައްދު ތަރައްގީ ކުރުމަށްވެސް ހަވާލުކުރެވިފައި ނުވާކަމަށެވެ.

އެހެންކަމުން ނުނިމި އަދި ހަވާލުނުކުރެވި ހުރިހާ މަސައްކަތެއް ނިންމުމަށް ބަޔަކާއި ހަވާލުކުރެވި، އަދި އެކަމަށް ބޭނުންވާ މާލީ އެހީތެރިކަން ހަމަ ޖެއްސުމާއި އެކީގައި ގުޅިގެން އެންމެ އިސްކަމެއްދޭ މަސައްކަތެއް ގޮތުގައި މި މަޝްރޫޢު ކުރިއަށް ގެންދެވިއްޖެ ނަމަ، އަމާޒުކުރެވިފައިވާ ލަނޑުދަނޑި އާއި އެއްގޮތަށް 2024 ވަނަ އަހަރުގެ އޮކްޓޫބަރު މަހުގެ ނިޔަލަށް އެ މަޝްރޫޢު ނިންމާލެވޭނެ ކަމުގެ ފުރިހަމަ ޔަގީންކަން އެބަ އޮތްކަމުގައި ޑރ މުއިއްޒު ވިދާޅުވިއެވެ.