މަޖިލީހުގެ ނައިބު ރައީސް އީވާ އަބްދުالله ރިޔާސަތުގައި އިންނެވުމާއި ދެކޮޅަށް އެމްޑީޕީއަށް ނިސްބަތްވާ މެމްބަރުން އިހުތިޖާޖު ކުރަމުން ދިއުމާއި ގުޅިގެން، މަޖިލީސް ހޫނުވެ މިއަދަށް ތާވަލުކުރި ޖަލްސާ އަނެއްކާވެސް މެދުކަނޑާލަން ޖެހިއްޖެ އެވެ. 

މިއަދުގެ 9:00 އަށް އެޖެންޑާކުރި ރައްޔިތުންގެ މަޖިލީހުގެ ޖަލްސާގައި އޮތީ އަންނަ އަހަރަށް ލަފާކޮށް ދައުލަތުން އެލުކަލާވާފައިވާ ބަޖެޓު މަޖިލީހަށް ހުށައެޅުމަށް ތާވަލުކޮށްފައެވެ.

އެހެން ނަމަވެސް ކޯރަމް ހަމަނުވާތީ އެ ޖަލްސާ މެދުކަނޑާލާފައިވާއިރު، ރިޔާސަތު ބެލެހެއްޓެވި ނައިބު ރައީސް އީވާ ވިދާޅުވީ ބަޖެޓު ހުށައެޅުމަކީ މަޖިލީހުން ކޮންމެހެން ކުރަން ޖެހޭ ކަމަކަށް ވާތީއާއި، ކޯރަމަ ހަމަކޮށްގެން ޖަލްސާ ކުރިއަށް ގެންދިއުމަށް މަސައްކަތްޕުޅު ކުރެއްވާނެ ކަމަށެވެ. 

އެފަހުން ވެސް އެ ޖަލްސާ ކުރިއަށް ގެންދިއުމަށް އީވާ މަސައްކަތްޕުޅު ކުރެއްވި އެވެ. އެހެން ނަމަވެސް އެ ފަހަރުވެސް ކޯރަމަ ހަމަނުވާތީ ބަޖެޓު ހުށައަޅާ ޖަލްސާ ކުރިއަށް ގެންދެވޭގޮތް ވަނީ ނުވެފައެވެ. 

ދެން މިއަދުގެ 11:00 ގައި މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމާއި ގުޅޭ ޖަލްސާ ކުރިއަށް ގެންދިއުމަށް ރިޔާސަތުގައި ނައިބު ރައީސް އީވާ އިންނަވާ މަސައްކަތް ކުރެއްވިއެވެ. 

އެހެން ނަމަވެސް އެ ޖަލްސާގެ އެޖެންޑާ ހުށައަޅުއްވަމުން ގެންދެވި ވަގުތު އެމްޑީޕީއަށް ނިސްބަތްވެވަޑައިގަންނަވާ މެމްބަރުން ވަނީ އީވާ ރިޔާސަތުގައި އިންނެވުމާއި ދެކޮޅަށް އަޑުއުފުއްލަވާ ނުރުހުން ފާޅުކުރައްވާފަ އެވެ. އަދި އެ މެމްބަރުންނާއި ދެކޮޅަށް ދަ ޑިމޮކްރެޓސްގެ މެމްބަރުން ވެސް އަޑުއުފުލާފައި ވެއެވެ. 

މަޖިލީސް ތަޅުމުގައި މެމްބަރުން އަޑުގަދަކުރަމުން ދިއުމާއި ގުޅިގެން މަޖިލީހުގެ ނިޒާމު ގެއްލިފައިވާތީ ޖަލްސާ ކުރިއަށް ގެންދެވޭ ގޮތެއް ނުވިއެވެ. ނައިބު ރައީސް އީވާއަށް ޖެހިވަޑައިގަތީ އެ ޖަލްސާވެސް މެދުކަނޑާލައްވާށެވެ. 

އެފަހުން ވެސް ޖަލްސާ ފައްޓަވައިގެން ކުރިއަށް ގެންދިއުމަށް އީވާ މަސައްކަތްޕުޅު ކުރެއްވިއެވެ. އެހެން ނަމަވެސް އެމްޑީޕީއާއި ޑިމޮކްރެޓްސްގެ މެމްބަރުންގެ އިހުތިޖާޖުކުރަމުން ދިއުމާއި، މަޖިލީހުގައި ތާޅަފިއްޔާއި ދުންމާރި ހިފައިގެން އަޑުގަދަކުރަމުން ދިއުމާއި ގުޅިގެން ޖަލްސާ ކުރިއަށް ގެންދެވޭގޮތް ނުވެގެން ވަނީ މެދުކަނޑާލަން ޖެހިފައެވެ. 

12:30 އަށް ޖަލްސާ މެދުކަނޑާލައްވަމުން އީވާ ވިދާޅުވީ އަދިވެސް މިއަދުގެ ޖަލްސާ ކުރިއަށް ގެންދިއުމަށް އެކަމަނާ މަސައްކަތްޕުޅު ކުރައްވާނެ ކަމަށެވެ. އަދި ދެން ޖަލްސާ ފައްޓަވާނެ ވަގުތެއް މެމްބަރުންނަށް އަންގަވާނެ ކަމަށާއި، މި ލިބޭ ވަގުތުކޮޅުގައި ސިޔާސީ ޕާޓީތަކުގެ އިސް ބޭފުޅުންނާއި ބައްދަލުކުރައްވައިގެން މަޖިލީސް ކުރިއަށް ގެންދެވޭނެ ގޮތާއި ގުޅޭގޮތުން މަޝްވަރާ ކުރައްވާނެކަމަށް އީވާ ވިދާޅުވި އެވެ.