ރައްޔިތުންގެ މަޖިލީހުގެ ރައީސް ކަމަށް އެމްޑީޕީގެ ޕާލަމެންޓްރީ ގުރޫޕުގެ ލީޑަރު އަދި މަޖިލީހުގެ ހިތަދޫ އިތުރު ދާއިރާގެ މެމްބަރު މުހައްމަދު އަސްލަމް އިންތިޚާބުކޮށްފި އެވެ. 

އަސްލަމް އެ މަގާމަށް އިންތިޚާބުކޮށްފައިވަނީ މަޖިލީހުގެ ރައީސްކަމުގެ މަޤާމުން ރައީސް މުހައްމަދު ނަޝީދު އިސްތިއުފާދެއްވުމާއި ގުޅިގެން އެ މަގާމަށް ބޭފުޅަކު އައްޔަށްކުރުމަށް ހޯދަ ދުވަހުގެރޭ މަޖިލީހުގައި ބޭއްވި ޖަލްސާއެއްގަ އެވެ. 

މަޖިލީހުގެ ރައީސްކަމުގެ މަޤާމަށް އަސްލަމް ހޮވިވަޑައިގަތީ، މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމާއި ވާދަކުރައްވާ ބޮޑު ތަފާތަކުންނެވެ. 

Advertisement

އެގޮތުން ރައީސަކު ހޮވުމަށް ނެގި ވޯޓުގައި ބައިވެރިވި 76 މެމްބަރުންގެ ތެރެއިން 53 މެމްބަރުން ވޯޓުދެއްވާފައިވަނީ އަސްލަމަށެވެ. އަލީ އާޒިމަށް ލިބިވަޑައިގަތީ 23 ވޯޓެވެ. އެއާއެކު އަސްލަމު ވަނީ މަޖިލީހުގެ ރައީސްކަމަށް އިންތިޚާބުވެފަ އެވެ.

އެ މަގާމަށް އިންތިޚާބުވުމާއި ގުޅިގެން، ވޯޓު ދެއްވި މެމްބަރުންނަށް ޝުކުރު އަދާކުރައްވާ ވާހަކަދައްކަވަމުން އަސްލަމް ވިދާޅުވީ، ރައްޔިތުންގެ މަޖިލީސް ގާނޫނާއި ގަވައިދާއި އެއްގޮތަށް ކުރިއަށް ގެންދެވުމުގެ މަސައްކަތް އެބޭފުޅާ ކުރައްވަމުން ގެންދަވާނެ ކަމަށެވެ. އަދި މަޖިލީހުގެ މަސައްކަތްތައް ހަލުވި ސްޕީޑުގައި ކުރިއަށް ގެންދިއުމަށް ހުރިހާ މެމްބަރުންގެ އެހީތެރިކަމާއި އެއްބާރުލުން ދެއްވުމަށް ވެސް އަސްލަމް އެދިވަޑައިގެންފައި ވެއެވެ.

އަސްލަމަކީ 2005 ވަނަ އަހަރުން ފެށިގެން، މަޖިލީހުގައި މެދުކެނޑުމެއް ނެތި މަސައްކަތް ކުރައްވަމުން ގެންދަވާ މެމްބަރެކެވެ.

19 ވަނަ ރައްޔިތުންގެ މަޖިލީހުގައި އެމްޑީޕީގެ ޕާލަމެންޓްރީ ގުރޫޕުގެ ލީޑަރަކަށް އޭނާ އިންތިޚާބުވެވަޑައިގަތީ ވެސް މީގެ ކުރިން އެ މަގާމު ފުރުއްވި އަލީ އާޒިމާއި ވާދަކުރައްވައި ކުރި ހޯއްދަވައިގެން ނެވެ. 

އޭގެ އިތުރުން އަސްލަމަކީ ނިމިދިޔަ ރިޔާސީ އިންތިޚާބުގައި ރައީސް ޞާލިހުގެ ރަނިންމޭޓުކަން ވެސް ފާހަގަކޮށްލެވެއެވެ.