ކޮމިޝަނާ އޮފް ޕްރިޒަންސް އަހްމަދު މުހައްމަދުފުޅު މަގާމުން އިސްތިއުފާ ދެއްވަން ނިންމަވައި އިސްތިއުފާގެ ސިޓީ ހުށަހަޅުއްވައިފިއެވެ.

ސީޕީ އަހުމަދު އިސްތިއުފާ ދެއްވަން ނިންމަވައި ކަރެކްޝަންސްގެ މުވައްޒަފުންނަށް ފޮނުއްވި މެސެޖުގައި ވިދާޅުވެފައިވާ ގޮތުން، އޭނާގެ އިސްތިއުފާގެ ސިޓީ ރައީސުލްޖުމްހޫރިއްޔާއަށް އިބްރާޙީމް މުހައްމަދު ޞާލިހަށް މިހާރު ވަނީ ހުށަހަޅުއްވައިފައެވެ. އަދި އެ މަގާމުން ރަސްމީކޮށް ވަކިވެވަޑައިގަންނަވާނީ މިމަހުގެ 19 ވަނަ ދުވަހު ކަމަށް ވެސް އެ މެސެޖްގައިވެއެވެ.

ސީޕީގެ މެސެޖުގައި އޭނާ ވަނީ ވޭތުވެދިޔަ ތިން އަހަރާއި 10 މަހެއްހާ ދުވަހުގެ ތެރޭގައި ކަރެކްޝަންސްގެ ހުރިހާ އޮފިސަރުނާއި މުވައްޒަފުންގެ ފަރާތުން ލިބުނު އެހީތެރިކަމާއި އެއްބާރުލުމަށް ޝުކުރު އަދާކުރައްވާފައެވެ. އަދި އެ މުއްދަތުގެ ތެރޭގައި، އޭނާގެ ގާބިލްކަން ހުރި މިންވަރަކުން ކަރެކްޝަންސްގެ ކުރިއެރުމަށް މަސައްކަތް ކުރައްވާފައި ވާނެ ކަމަށްވެސް ވިދާޅުވެފައިވެއެވެ. 

"ކަރެކްޝަނަލް ސާވިސްގެ އަމާޒުތަކަށް ވާސިލް ވުމަށް އެންމެންނާ އެކީގައި މަސައްކަތް ކުރެވުނީތީ އެކަމާ އުފާ ކުރަން. ހުރިހާ އެންމެންނަށް ވެސް މުސްތަގްބަލްގައި ކާމިޔާބީއަށް އެދެން،" ސީޕީގެ މެސެޖުގައި ވިދާޅުވިއެވެ.

މީގެ އިތުރުން މާދަމާގެ ވަގުތެއްގައި ހުރިހާ ޖަލުތަކަށާއި ކޮމާންޑްތަކަށް ޒިޔާރަތް ކުރައްވާނެ ކަމަށްވެސް ސީޕީ ވިދާޅުވެފައިވެއެވެ. 

ކޮމިޝަނާ އޮފް ޕްރިޒަންސްގެ މަޤާމަށް އަހްމަދު އައްޔަނުކުރެވުނީ 2020ޖެނުއަރީ 21، 2020 ގައެވެ. އެ މަގާމު އަހްމަދާ ހަވާލު ކުރެވުނީ ކުރިން ސީޕީކަން ކުރެއްވި އަބްދުالله މުނާޒް މަގާމުން ވަކިކުރެއްވުމުންނެވެ. ސީޕީއަކަށް ވެވަަޑައިގެންނެވުމުގެ ކުރިން އަހްމަދު ހުންނެވީ އިންސްޕެކްޓާ އޮފް ކަރެކްޝަނަލް ސާވިސަސްގެ މަގާމުގައެވެ.