އަންނަ ޖަނަވަރީ މަހުން ފެށިގެން ދިވެހި ފުލުހުންނާއި ސިފައިންގެ މުސާރަ ބޮޑުކުރަން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ނިންމަވައިފިއެވެ. 

ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، ރައީސުލްޖުމްހޫރިއްޔާގެ ވައުދުފުޅާ އެއްގޮތަށް، އަންނަ ޖެނުއަރީ މަހުން ފެށިގެން ފުލުހުންނާ ސިފައިންގެ މުސާރަ ބޮޑުކުރުމަށް، ޕޭ ކޮމިޝަނުން މުސާރައިގެ އޮނިގަނޑު އެކުލަވާލައި އެ އިދާރާތަކަށް މިހާރު ފޮނުވާފައިވާ ކަމަށެވެ.

ސިފައިންނާއި ފުލުހުންގެ މުސާރަ ބޮޑުކުރުމުގެ މަސައްކަތް ފަށައިގެން ކުރިއަށްދާ ކަމަށް މިއަހަރުގެ ތެރޭގައި ތިން ފަހަރު މަތިން މީގެ ކުރިން ރައީސް ޞާލިހު ވަނީ އިއުލާން ކުރައްވާފައެވެ. 

އެގޮތުން، ފުލުހުންގެ ހިދުމަތަށް 90 އަހަރު ފުރުމުގެ މުނާސަބާ ފާހަގަކުރަން މި އަހަރު އޭޕްރިލް މަހު ބޭއްވި ޖަލްސާގައިވެސް ރައީސް ވަނީ ފުލުހުންނާއި ސިފައިންގެ މުސާރައަށް ހެޔޮ ބަދަލެއް ގެނައުމާ ގުޅޭ ދިރާސާތައް ޕޭ ކޮމިޝަނުން ކުރަމުން އަންނަ ކަމަށެވެ. 

މީގެ އިތުރުން ފުލުހުންގެ މުސާރައިގެ ތަފްސީލު ދެއްވަމުން، މިދިޔަ އޮގަސްޓް މަހު ބ. ތުޅާދޫގައި ބޭއްވި ކެމްޕެއިން ޖަލްސާގައި ރައީސް ޞާލިހް ވިދާޅުވީ ކޮންސްޓަބަލް ރޭންކުގެ ފުލުހެއްގެ މުސާރަ 11،000ރ. އިން 15،400ރ. އަށް އިތުރުވާނެ ކަމަށެވެ. ސިފައިންގެ ޕްރައިވެޓް ރޭންކުގެ މީހަކަށް 11،500ރ. މިހާރު ލިބޭއިރު، އަލަށް ގެންނަ ބަދަލުތަކާއެކު 16،300ރ. އަށް މުސާރަ ބޮޑުވާނެ ކަމަށް ވިދާޅުވި އެވެ.