ދިވެހިރާއްޖެގެ ރައީސުލްޖުމްހޫރިއްޔާ ކަމުގެ ހުވާ އިއްޔެ ކުރެއްވެވި ރައީސް ޑރ މުޙައްމަދު މުޢިއްޒަށް ތުރުކީވިލާތައް ވަޑައިގަތުމަށް އެޤައުމުން ދަޢުވަތު ދެއްވައިފައިވެއެވެ.

ތުރުކީވިލާތުގެ މިނިސްޓަރ އޮފް ކަލްޗަރ އެންޑް ޓޫރިޒަމް، މެހްމަތް ނުރީ އާސޯއި އާއި އެކު ރައީސް ޑރ މުޙައްމަދު މުޢިއްޒު ބޭއްވެވި ބައްދަލުވުމުގައި ދެބޭފުންގެ ދެމެދުގައި ދެކެވުނު ވާހަކަފުޅު ގައި ތުރުކީވިލާތަށް ރަސްމީ ދަތުރުފުޅެއް ކުރެއްވުމަށް ރައީސް ޑރ މުޢިއްޒަށް ދަޢުވަތު އެރުވިއެވެ.

ރޭ ކުރުނބާ މޯލްޑިވްސްގައި ރައީސް ޑރ މުޢިއްޒާއި ތުރުކީވިލާތުން ވަޑައިގެންނެވި ބޭފުޅުންނާއި އެކު ބޭއްވެވި ބައްދަލުވުމުގައި ރައީސް ޑރ މުޢިއްޒު ވަނީ އެ މަނިކުފާނުގެ ހުވައިކުރެއްވުމުގެ ރަސްމިއްޔާތަށް ވަޑައިގެންނެވިކަމަށްޓަކައި ތުރުކީވިލާތުގެ ޓުވަރިޒަމް މިނިސްޓަރ މެހްމަތް ނުރީ އާސޯއިއަށް ޝުކުރުއަދާކުރައްވާފައެވެ.

މިބައްދަލުކުރެއްވުމުގައި، ނިމިދިޔަ ރިޔާސީ އިންތިޚާބުގައި ރައީސް ޑރ މުޢިއްޒު ހޯއްދެވި ކާމިޔާބީ ފާހަގަކުރައްވާ ތުރުކީވިލާތުގެ މިނިސްޓަރ މެހްމަތް ވަނީ ރައީސްއަށް ތަހުނިޔާ ވިދާޅުވެލައްވާފައެވެ.

އަދި ތުރުކީވިލާތާއި ދިވެހިރާއްޖެއާ ދެމެދު ދަތުރުކުރާ ފްލައިޓްތަކުގެ އަދަދު އިތުރުކުރުމާއިއެކު، ދެ ޤައުމުގެ މެދުގައި ޓޫރިޒަމާއި ތަޢުލީމާއި ދަތުރުފަތުރުކުރުމުގެ ދާއިރާއިން ގުޅުން ބަދަހިކުރުމުގެ ޝައުގުވެރިކަން މިނިސްޓަރ މެހްމަތު ގެ ވާހަކަފުޅުގައި، ތުރުކީވިލާތުގެ އިންވެސްޓްމަންޓްތައް ދިވެހިރާއްޖެއަށް ގެނައުމަށް ހުރި ފުރުސަތުތަކުގެ މައްޗަށް އަލިއަޅުވާލެއްވިއެވެ.

މި ބައްދަލުކުރެއްވުން ނިންމަވާލައްވަމުން، ދެ ޤައުމުގެ ސަގާފަތާއި އާދަކާދައިގައި ހުރި އެއްގޮތްކަން ފާހަގަކުރައްވާ، ދިވެހިރާއްޖެއާއި ތުރުކީވިލާތާ ދެމެދު އޮތް ގުޅުން އިތުރަށް ބަދަހިކުރުމަށް މަސައްކަތްކުރުމުގެ ޝައުގުވެރިކަން ރައީސް ޑރ މުޢިއްޒު ފާޅުކުރެއްވިއެވެ.