މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ ދަށުން ހިނގަމުންދިޔަ "ކޮމިއުނިކޭޝަންސް އޮތޯރިޓީ އޮފް މޯލްޑިވްސް" (ކޭމް) މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްގެ ދަށަށް ބަދަލުކުރައްވައިފި އެވެ. 

ރިޔާސީ އައު ދައުރު ފެށުމާ ގުޅިގެން، ސަރުކާރުގެ އިދާރީ އޮނިގަނޑަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ބައެއް ބަދަލު ގެންނަވައިފައެވެ. 

އެގޮތުން މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްގެ ނަމުގައި އައު އިދާރާއެއް އުފައްދަވާފައިވާއިރު، އެ އިދާރާގެ މިނިސްޓަރު ކަމަށް އައްޔަނު ކުރައްވާފައިވަނީ މަޑުވަރީ ދާއިރާގެ ކުރީގެ މެންބަރު އާދަމް ޝަރީފް ޢުމަރެވެ.

ޝަރީފުގެ މިނިސްޓަރު ކަމުގެ ދަށުން ހިންގާ ލޯކަލް ގަވަރމަންޓް މިނިސްޓްރީގެ ދަށަށް ކޭމް ގެނެސްފައިވާއިރު، އެ މިނިސްޓްރީއާ ހަވާލު ކޮށްފައިވާ މެންޑޭޓުތަކުގެ ތެރޭގައި ކޮމިއުނިކޭޝަންގެ ދާއިރާއާ ގުޅުންހުރި ގިނަ ކަންތައްތަކެއްވެއެވެ. އޭގެތެރޭގައި ހިމެނޭ ބައެއް ކަންކަން:

- ކޮމިއުނިކޭޝަންގެ ދާއިރާއިން ރާއްޖެއަށް ބޭނުންވާ އިންފްރާސްޓްރަކްޗަރ ބިނާކުރުމުގެ ސިޔާސަތުތައް ކަނޑައަޅައި ހިންގުން.

- ގައުމީ ތަރައްގީގެ ޕްލޭންގައި އެކަށައަޅާ ތަރައްގީގެ ލަނޑުދަނޑިތައް ހާސިލުކުރުމަށް، ކޮމިއުނިކޭޝަންގެ ދާއިރާގެ މާސްޓަރޕްލޭން އެކުލަވާލައި ތަންފީޒުކުރުން.

- އިންޓަނޭޝަނަލް ޓެލެކޮމިއުނިކޭޝަން ޔޫނިއަން (އައިޓީޔޫ) އާއި، އޭޝިޔާ ޕެސިފިކް ޓެލެކޮމިއުނިކޭޝަން (އޭ.ޕީ.ޓީ) ކޮންވެންޝަންތަކުގައިވާ އުސޫލުތަކާއި އެއްގޮތަށް ރާއްޖޭގެ ޓެލެކޮމިއުނިކޭޝަނުގެ ހިދުމަތާބެހޭ ސިޔާސަތުތައް ކަނޑައަޅައި ހިންގުން.

- ކޮމިއުނިކޭޝަންގެ ދާއިރާތަކުން ސަރުކާރުން ހިންގަން ބޭނުންވާ މަޝްރޫއުތައް ރާވައި ހިންގުން.

- ރާއްޖޭގެ ކޮމިއުނިކޭޝަން ޓެކްނޯލޮޖީއާބެހޭ ސިޔާސަތު ކަނޑައަޅައި، އެ ސިޔާސަތު ތަންފީޒުކުރުން.

ސަރުކާރުގެ ބައެއް ވުޒާރާތަކުގެ މެންޑޭޓަށް ބަދަލު ގެންނަވާފައިމިވަނީ ސަރުކާރު ހިންގުމަށް ފަސޭހަކޮށް ރައްޔިތުންނަށް ޚިދުމަތްތައް ދިނުން އަވަސް ކުރުމުގެ ގޮތުން ކަމަށް ރައީސް އޮފީހުން ބުނެއެވެ.