ލ ގަމުން ގިނަ އަދަދެއްގެ ބަޔަކު ވެރިކަންކުރާ ޕާޓީ ޕީއެންސީއަށް ސޮއިކޮށްފިއެވެ.

ވެރިކަން ކުރާ ޕާޓީ ޕީއެންސީއަށް 10،000 މެމްބަރުން ހަމަކޮށް އެ ޕާޓީއަށް ވަކި އޮފީހެއް ގާއިމްކުރުމަށް ކުރެވެމުންދާ މަސައްކަތްތަކުގެ ތެރެއިން ލ ގަމުން ޕީއެންސީއާއި ގުޅުނު 600 މެމްބަރުންގެ ފޯމުތަކާއި ހަވާލުވީ ޕީއެންސީގެ ޗެއާޕާސަން އަދި ރައީސް އޮފީހުގެ ސީނިއަރ މިނިސްޓަރ އަބްދުއްރަހީމެވެ.

އިލެކްޝަންސް ކޮމިޝަނުން ބަލަހައްޓާ ޕާޓީތަކުގެ ދަފުތަރުގައި އޮތް ގޮތުން، މިދިޔަ ފެބްރުއަރީ 21 އާ ހަމައަށް ޕީއެންސީގައި މެންބަރުންގެ ގޮތުގައި ތިބީ 3159 މެންބަރުންނެވެ.

Advertisement

ރައީސުލްޖުމްހޫރިއްޔާ ޑރ މުހައްމަދު މުއިއްޒު އިންތިޚާބު ކާމިޔާބުކުރެއްވުމާއެކު ގިނަ އަދަދެއްގެ ޢާންމު ރައްޔިތުން ދަނީ ޕީއެންސީއާއި ގުޅެމުންނެވެ. އެގޮތުން މިމަހު 19 ވަނަ ދުވަހު ލ.ފޮނަދޫ ކައުންސިލްގެ ހުރިހައި މެންބަރުން ހިމެނޭހެން ގިނަ އަދަދެއްގެ ބޭފުޅުން ވެރިކަން ކުރާ ޕީއެންސީއާ ގުޅިވަޑައިގެންފައެވެ. ފޮނަދޫ ކައުންސިލުގެ ހުރިހާ މެންބަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ހުރިހާ މެންބަރުން އަދި ޕީ.ޕީ.އެމް/ޕީ.އެން.ސީގެ ސްޓިއަރިންގ ކޮމިޓީގެ ހުރިހައި މެންބަރުން ޕީ.އެން.ސީއަށް ސޮއި ކުރައްވައިފިއެވެ.

މީގެ އިތުރުންވެސް ރަށްރަށުގެ ކައުންސިލްތަކުގެ މެމްބަރުންނާއި އެހެންހެން ޕާޓީތަކަށް މިސްބަތްވާ މެމްބަރުންވެސް އެ ޕާޓީތައް ދޫކޮށް ވެރިކަން ކުރާ ޕާޓީ، ޕީއެންސީއާއި ގުޅެމުން އަންނަކަން ފާހަގަކޮށްލެވެއެވެ.