ރައްޔިތުންގެ މަޖިލީސް ތަމްސީލުކުރާ ސިޔާސީ ޕާޓީތަކުގެ ދަފްތަރުން މޯލްޑިވްސް ނެޝަނަލް ޕާޓީ (އެމްއެންޕީ) އުނިކޮށްފި އެވެ. 

އެ ދަފްތަރުން އެމްއެންޕީ އުނިކޮށްފައިވަނީ މެމްބަރުންގެ ސިޔާސީ ޕާޓީއަކަށް ރައްޔިތުންގެ މަޖިލީހުގައި ތަމްސީލުކުރެވޭ ގާނޫނީ އަދަދު ހަމަނުވާތީ އެވެ. 

ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުހައްމަދު ނާޒިމް އިސްވެ ހުންނަވާ އުފައްދަވާފައިވާ އެމްއެންޕީގައި މީގެ ކުރިން 3 މެމްބަރުން ތިއްބެވިއެވެ. އެއީ ނާޒިމްގެ އިތުރުން މަޖިލީހުގެ ތިމަރަފުށީ ދާއިރާގެ މެމްބަރު އަބްދުالله ރިޔާޒާއި، ވިލިގިލި ދާއިރާގެ މެމްބަރު އަހުމަދު އުޝާމެވެ. 

އެހެން ނަމަވެސް ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ސަރުކާރުގެ ބަންޑާރަ ނައިބުގެ މަގާމަށް ވަޑައިގެންނެވުމަށް އުޝާމް މަޖިލީސް މެމްބަރުކަމުން އިސްތިއުފާ ދެއްވުމާއި ގުޅިގެން، ގާނޫނުގައި ބަޔާންކުރާ އަދަދު އެމްއެންޕީއަށް ވަނީ ގެއްލިފައެވެ. 

އެކަމަށް އަލިއަޅުވާލައްވާ ރައްޔިތުންގެ މަޖިލީހުގެ މިއަދުގެ ޖަލްސާގައި، މަޖިލީހުގެ ރައީސް މުހައްމަދު އަސްލަމް މަޖިލީހުގެ ގަވައިދާއި ހަވާލާދީ ވިދާޅުވީ ސިޔާސީ ޕާޓީތަކުން މަޖިލީހުގައި ތަމްސީލުކުރަން އެދޭ މެމްބަރުންގެ އަދަދު އެއްވެސް ވަގުތެއްގައި ތިން މެމްބަރުންނަށްވުރެ މަދުވެއްޖެ ނަމަ އެ ޕާޓީއެއް މަޖިލީހުގައި ތަމްސީލުކުރުމުގެ ހައިސިއްޔަތު ގެއްލިގެންދާނެ ކަމަށެވެ. 

އެހެންކަމުން މިވަގުތު އެ އަދަދަށް އެމްއެންޕީގައި މެމްބަރުން ނެތުމާއި ގުޅިގެން ގަވައިދު ނުވާ ހައިސިއްޔަތު އެމްއެންޕީއަށް ގެއްލިފައިވާކަމަށް އަސްލަމް ވަނީ އިއުލާނުކުރައްވާފަ އެވެ. 

ރައީސުލްޖުމްހޫރިއްޔާ ޑރ މުއިއްޒުގެ ކެބިނަޓަށް ވަޑައިގަތުމަށް އުޝާމުގެ އިތުރުން ޕީޕީއެމާއި، ޕީއެންސީގެ ބައެއް މެމްބަރުން ވެސް ވަނީ އިސްތިއުފާދެއްވާފަ އެވެ. 

މެމްބަރުން އިސްތިއުފާދެއްވި ނަމަވެސް، އެ ގޮނޑިތަކަށް އިތުރު މެމްބަރުން އައްޔަންކުރުމަށް ބައި-އިލެކްޝަން ނުބާއްވަން ނިންމާފައިވާކަމަށް އީސީން ވަނީ ހާމަކޮށްފަ އެވެ.