ނިމިދިޔަ ރައީސް އިބްރާހިމް މުހައްމަދު ޞާލިހު ގެ ސަރުކާރުން ފެށި ތަރައްގީގެ އެންމެ ބޮޑު މަޝްރޫއު ކަމަށްވާ ތިލަމާލޭ ބުރިޖުގެ މަސައްކަތް ކުރިއަށް ގޮސްފައިވާ ގޮތާއި ގުޅިގެން މިހާތަނަށް ލިބިފައިވާ މަޢުލޫމާތު ތަކުން، އެ ބްރިޖްގެ ކޮލިޓީއާމެދު ކަންބޮޑުވާފަދަ ކަމެއް ފާހަގަވެފައިނުވާ ކަމަށް ޢިމާރާތް ކުރުމާއި ބިނާރާބެހޭ ވުޒާރާގެ ވަޒީރު ޑރ. އަބްދުالله މުއްޠަލިބު ވިދާޅުވެއްޖެ އެވެ. 

ތިލަމާލޭ ބްރިޖުގެ މަސައްކަތް ކުރަމުންދަނީ އިންޑިޔާގެ އެފްކޮންސް އާއި ހަވާލު ކޮށްގެންނެވެ. ރައީސް ޞާލިހުގެ ސަރުކާރުން ކުރިއަށް ގެންދިޔަ މަޝްރޫޢު ތަކުގެ ތެރެއިން އެންމެ ބޮޑު ފާޑުކިޔުންތައް އަމާޒުވީ އެފްކޮންސް އިން އެމަސައްކަތް ކުރަމުންދާ ގޮތާއިމެދުއެވެ. އެގޮތުން، ބްރިޖުގެ މަސައްކަތައް ގެނައި ޕްލެޓްފޯމް ފަރަށް އެރި މައްސަލައާއި، ޓެސްޓް ޕައިލް ހުރި ގޮތުން، ގިނަ ބައެއްގެ ފާޑުކިޔުންތައް އެ ސަރުކާރަށް އަމާޒުވެގެންދިޔައެވެ. އަދި އެއާއެކު ބްރިޖުގެ ކޮލިޓީއާމެދު މެދުވެސް ގިނަ ބައެއް ސުވާލު އުފައްދައި ކަންބޮޑުވުން ފާޅުކޮށްފައިވެއެވެ. 

އެ ސަރުކާރު ބަދަލުވެ، އައު ސަރުކާރުގެ ދައުރު މިހާރު ފެށިފައިވާއިރު، ރައީސުލްޖުމްހޫރިއްޔާ ޑރ މުހައްމަދު މުއިއްޒު އާއި، މިނިސްޓަރ މުއްޠަލިބުގެ އިތުރުން ސަރުކާރުގެ އިސްފަރާތްތަކުން އިއްޔެ ވަނީ ބްރިޖުގެ މަސައްކަތް ކުރިއަށްދާ ގޮތް ބައްލަވާލައްވާފައެވެ. 

ޢިމާރާތް ކުރުމާއި ބިނާރާބެހޭ ވުޒާރާގެ ވަޒީރު ޑރ. އަބްދުالله މުއްޠަލިބު--ފޮޓޯ/ ކޮންސްޓްރަކްޝަން މިނިސްޓްރީ

އެގޮތުން، ސަރުކާރަށް ފާހަގަވި ކަންކަމާއި ގުޅޭގޮތުން، މައުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބުދެއްވަމުން މިނިސްޓަރ މުއްޠަލިބު ވިދާޅުވީ، ބްރިޖުގެ މަސައްކަތާއި ގުޅިގެން ފާޑުކީ ފަރާތްތަކުން، ކޮންކްރީޓް އެޅުމުގެ މަސައްކަތް ކުރިއަށްދިޔަ ގޮތާއި ގުޅޭގޮތަށް ފާޑުކިޔާފައިވާ ކަމަށެވެ. އަދި އެފްކޮންސް އިން އެ މަސައްކަތް ކޮށްފައިވަނީ "އެންމެ ބެސްޓް ޕްރެކްޓިސް" ނުވަތަ އެކަން ކުރަންވީ އެންމެ ރަނގަޅަށް ނޫން ކަމަށްވިޔަސް، މަސައްކަތް ކުރިއަށްދާ ގޮތް ބެލުމަށް ހަވާލުކުރެވިފައިވާ ކޮންސަލްޓަންޓުން، އެ މަސައްކަތް ކުރާ ހުރިހާ ވަގުތެއްގައި އެތަނުގައި ތިބޭ ކަން މިނިސްޓަރ ފާހަގަކުރެއްވިއެވެ. 

އެހެންކަމުން ކަމުން ބްރިޖުގެ ކޮލިޓީއާމެދު ކަންބޮޑުވަންޖެހޭ ކަމެއް މިހާތަނަށް ފާހަގަވެފައިނުވާ ކަމަށް މިނިސްޓަރ ވިދާޅުވި އެވެ. 

މިނިސްޓަރު ވިދާޅުވީ، ބްރިޖުގެ ޓެސްޓް ޕައިލްތައް ހަރުކުރުމަށްފަހުވެސް ބަލަންޖެހޭ ކަންކަން ބަލާފައި ހުރިކަން މިހާތަނަށް ބެލި ބެލުމުން އެނގިފައިވާ ކަމަށާ، އެހެންނަމަވެސް، އެއީ މިވީ ކުޑަ މުއްދަތުގެ ތެރޭގައި ބަލައި ދިރާސާ ކުރުމުން ފެންނަންހުރި ކަންކަން ކަމަށެވެ. އަދި ބްރިޖުގެ މަސައްކަތް ކުރިއަށްދާ ގޮތާއިގުޅޭގޮތުން މައްސަލައެއް ހުރިކަން ފާހަގަވެއްޖެ ނަމަ، އެކަން ހާމަކުރައްވާނެ ކަމަށާ، އެ މައްސަލަ ހައްލު ކުރެއްވުމަށްވެސް މަސައްކަތްކުރައްވާނެ ކަމަށް މިނިސްޓަރު ވިދާޅުވި އެވެ. 

ޢިމާރާތް ކުރުމާއި ބިނާރާބެހޭ ވުޒާރާގެ ވަޒީރު ޑރ. އަބްދުالله މުއްޠަލިބު--ފޮޓޯ/ މިނިސްޓްރީ

ތިލަމާލޭ ބްރިޖުގެ މަސައްކަތް އެއްކޮށް ނިންމާލެވޭނެ ކަމަށް ކުރީ ސަރުކާރުން ކުރިން ލަފާކުރީ އަންނަ އަހަރުގެ މެދު ތެރޭގައި ކަމަށެވެ. އެހެންނަމަވެސް، ވެރިކަން ބަދަލު ވުމުގެ މަރުހަލާތެރޭގައި، އެ ސަރުކާރުން، އެ މުއްދަތު އިތުރުކޮށްފައިވާ ކަން މިނިސްޓަރ މިއަދު ހާމަކުރައްވާފައި ވާއިރު، މިހާރު އޮތް ގޮތުން އެ މަސައްކަތް އެއްކޮށް ނިންމޭނީ 30 ސެޕްޓެމްބަރު 2026 ގައެވެ.

ތިލަމާލެ ބްރިޖު މަޝްރޫއުގެ ދަށުން 6.7 ކިލޯމީޓަރުގެ ދިގު ބްރިޖަކާއި ކޯސްވޭ ލިންކެއް އަޅާނެއެވެ. އެގޮތުން ދެރަށް ދޭތެރޭ ކަނޑުގައި އަޅާ މައި ބްރިޖްތަކުގައި 140 މީޓަރު ހުންނާނެ ކަމަށް އެފްކޮންސް އިން ބުނެއެވެ.