އިންޑޮނޭޝިޔާގައި މިހާރު ކުރިއަށްދާ 17 އަހަރުން ދަށުގެ ފިރިހެން ވޯލްޑްކަޕް ފުޓްބޯޅަ މުބާރާތުގެ ކުއާޓާ ފައިނަލުގައި ފަސޭހަކަމާއި އެކު 3-0 ގެ ނަތީޖާއަކުން ބްރެޒިލް ބަލިކޮށް މުބާރާތުގެ ސެމީ ފައިނަލުގެ ޖާގައެއް އާޖެންޓީނާ އިން ކަށަވަރުކޮށްފިއެވެ.

އާޖެންޓީނާ މުބާރާތުގެ ކުއާޓާ ފައިނަލުން ޖާގަ ހޯދީ ދެވަނަ ބުރުގައި 5-0 ގެ ނަތީޖާއަކުން ވެނަޒުއޭލާ ބަލިކުރުމަށްފަހު އެވެ. އަދި ބްރެޒިލް ކުއާޓާ ފައިނަލުގެ ޖާގައެއް ހޯދީ ދެވަނަ ބުރުގައި 3-1 ގެ ނަތީޖާއަކުން އިކުއެޑޯ ބަލިކުރުމަށްފަހު އެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި އާޖެންޓީނާ އިން ލީޑު ހޯދި 28 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ރިވަޕްލޭޓްގެ ފޯވާޑް ކުލައުޑިއޯ އެޗެވަރީ އެވެ.

Advertisement

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުންނެވެ.

މެޗުގެ ދެވަަނަ ހާފުގައި އާޖެންޓީނާ އިން އެޓީމުގެ އެޓޭކުތައް އިތުރަށް ވަރުގަދަކުރި އިރު، މިހާފުގައި އެޓީމުން ވަނީ އިތުރު ދެލަނޑު ކާމިޔާބުކޮށްފައެވެ. އެގޮތުން އެޓީމުގެ ދެވަނަ ލަނޑު 58 ވަނަ މިނެޓުގައި އެޗެވަރީ ކާމިޔާބުކުރި އިރު، މިމެޗުގައި އޭނާގެ ހެޓްރިކް ފުރިހަމަކުރީ 71 ވަނަ މިނެޓުގައެވެ. މިއީ މިމުބާރާތުގައި އޭނާ ކާމިޔާބުކުރި ފަސްވަނަ ލަނޑެވެ.

މިލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން އާޖެންޓީނާ ކުރީގައި އޮވެގެންނެވެ. އަދި މުބާރަތުގެ ސެމީ ފައިނަލުގައި އާޖެންޓީނާ އިން ނުކުންނާނީ ޖަރުމަނާއި ދެކޮޅަށެވެ.