ކުރިއަށް އޮތް 5 އަހަރަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒުުގެ ސިޔާސަތުތައް ތަންފީޒުކުރުމުގައި ސާބިތުވެ ތިއްބަވާނެކަމުގައި ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ. 

ޕީޕީއެމްގެ ލީޑަރ އަދި ކުރީގެ ރައީސް ޔާމީނު އެ ޕާޓީން ވަކިވެވަޑައިގެން އައު ސިޔާސީ ޕާޓީއެއް އުފެއްދެވުމުގެ މަސައްކަތް ކުރައްވަމުން ގެންދަވާކަން އިއުލާނުކުރައްވައި އެކަމުގެ މަސައްކަތްތައް ކުރިއަށްދާ މި ދަނޑިވަޅުގައި ޚާރިޖީ ވަޒީރު މޫސާ ޒަމީރު ކުރެއްވި ޓުވީޓެއްގައި ބުނެފައިވަނީ، ކުރިއަށް އޮތް 5 އަހަރަށް ދިވެހި ރައްޔިތުން ނިންމާފައިވާ ނިންމުމާ އެއްގޮތަށް، ޕީޕީއެމް-ޕީއެންސީގެ ސަރުކާރެއް އެކުލަވާލައި ރައްޔިތުންނަށް ޚިދުމަތްކުރަން ފެށިފައިވާއިރު، އެ ބޭފުޅުން ތިއްބެވީ، ރައީސުލްޖުމްހޫރިއްޔާ ޑރ މުހައްމަދު މުއިއްޒުއާއެކުއެވެ. 

މީގެ އިތުރުން މިނިސްޓަރ ގެ ޓުވީޓުގައި ބުނެފައިވަނީ ދިވެހި ޤައުމަށާއި ރައްޔިތުންނަށް އުފާ ފާގަތިކަން ލިބެން އޮތް މަގަކީ ޑރ މުއިއްޒުއާއެކު ސާބިތުކަމާއެކު ތިބުން ކަމަށާއި ޤައުމާއި ރައްޔިތުންގެ އުންމީދުތައް އެހެން އެއްވެސް ބަޔަކާއި އެއްޗަކާއި ކަމަކަށް ވުރެ ބޮޑު ކަމުގައެވެ. 

ޕީޕީއެމްއާއި ވަކިވެ ވަޑައިގެން ވަކިން ޕާޓީއެއް އުފައްދަވާކަން ހާމަކޮށްފައިވާއިރު ޕީޕީއެމްއަށް ނިސްބަތްވެ ވަޑައިގަންނަވާ އެކި ވުޒާރާތަކުގެ ވަޒީރުންނާއި އެހެނިހެން އިސްވެރިން އަންނަނީ ރައީސް ޑރ މުއިއްޒުއާއެކު ތިއްބެވިކަން ހާމަކުރައްވަމުންނެވެ.