އިސްރާއީލުން ފަލަސްޠީނުގައި ހިންގަމުންދާ ގަތުލުޢާއްމުގައި ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީވުމަށް އާބަންކޯއިން އަންނަ ހުކުރު ދުވަހު ހާއްސަ ހަރަކާތެއް ބާއްވަން ނިންމައިފިއެވެ.

އާބަންކޯއިން ބުނީ، މި ފަންޑް ރެއިޒިން ހަރަކާތް އޮންނާނީ ހުޅުމާލެ ފުރަތަމަ ފިޔަވަހީގެ ރުއްގަނޑު 2 ގައި ކަމަށެވެ. އަދި މި ހަރަކާތް ކުރިއަށްދާނީ ހުކުރު ދުވަހު ހަވީރު 4-6 އަށް އަދި ރޭގަނޑު 8ން 10 އަކަށް ކަމަށްވެސް އާބަންކޯއިން ބުނެފައިވެއެވެ.

މިއީ އާބަންކޯގެ މުވައްޒަފުންގެ ފަރާތުން ފަލަސްޠީނުގެ ރައްޔިތުންނަށް އެހީވުމަށް ބާއްވާ ފަންޑް ރެއިސިންގް އިވެންޓެކެވެ.

Advertisement

މި އިވެންޓުގައި ބައިވެރިވުމަށް ވީހާވެސް ގިނަ ފަރާތްތަކުން އައުމަށް އާބަންކޯއިން ވަނީ ދަޢުވަތު ދީފައެވެ.

އާބަންކޯއިން ވަނީ ފަލަސްޠީނުގައި ހާލުގައި ޖެހިފައިވާ ފަރާތްތަކަށް އެހީވުމަށް އެކި ފަރާތްތަކުން ބޭއްވި ހަރަކާތްތަކުގައި ވެސް އެހީތެރިކަން ފޯރުކޮށްދީފައެވެ.

އިސްރާއީލުގެ ލާ އިންސާނީ ޖަރީމާތަކުގެ ސަބަބުން ޙާލުގައި ޖެހިފައިތިބި ފަލަސްޠީނުގެ ރައްޔިތުންނަށް އެހީވުމަށް ދިވެހިންގެ ފަރާތުން ދަނީ ގިނަ ހަރަކާތްތަކެއް ހިންގަމުންނެވެ. އަދި ހިންގާ ހަރަކާތް ތަކުން ހޯދާ ފައިސާ އައިއޭސީ އާއި ދަނީ ހަވާލުކުރަމުންނެވެ.