ކުރީގެ ރައީސް އިބްރާހިމް މުހައްމަދު ޞާލިހު ގެ ސަރުކާރުގެ ފަހު ދުވަސް ކޮޅުގައި، މަޖިލީހުން ރުހުން ދިނުމަށް ފޮނުވުނު ސަފީރުންގެ ނަންތައް، މިސަރުކާރުން އަނބުރާ ގެންގޮސްފި އެވެ. 

މަޖިލީހުގެ މިއަދުގެ ޖަލްސާ ފަށްޓަވަމުން އަސްލަމް ވަނީ ކުރީ ސަރުކާރުން ބައެއް މުއައްސަސާތަކަށް އަދި ޤައުމުތަކުގެ ސަފީރުންގެ ގޮތުގައި އައްޔަންކުރަން މަޖިލީހަށް ފޮނުވާފައިވާ ނަންތައް މި ސަރުކާރުން އަނބުރާ ނަގައިފައިވާކަން ހާމަކުރައްވާފައެވެ. 

އެގޮތުން އަސްލަމް ވިދާޅުވީ ބްރޯޑްކާސްޓިން ކޮމިޝަން (ބްރޯޑްކޮމް) އާއި ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އަށް އައްޔަން ކުރަން ކުރީގެ ރައީސް ޞާލިހު މަޖިލީހަށް ފޮނުވި ނަންތައް މިމަހު 22 ވަނަ ދުވަހު މި ސަރުކާރުން، އަނބުރާ ގޮސްފައިވާ ކަމަށެވެ. 

އަދި މިއަހަރު އޭޕްރިލް މަހު ޕްރައިވެޓައިޒޭޝަން އެންޑް ކޯޕޮރަޓައިޒޭޝަން ބޯޑު (ޕީސީބީ) އަށް އައްޔަން ކުރައްވާފައިވާ ފާތިމަތު ޝިވްރީން އާއި މެއި މަހު އައްޔަން ކުރެއްވި މުހައްމަދު އާޒާދަށް ރުހުން ދިނުމުގެ މައްސަލަ މަޖިލީހަށް ވައްދާފައިވަނިކޮށް، މިމަހު 20 ވަނަ ދުވަހު އެ ދެބޭފުޅުން ވެސް އެ މަގާމްތަކުން އިސްތިއުފާ ދެއްވާފައިވާ ކަން ރައީސް އޮފީހުން މިމަހު 22 ވަނަ ދުވަހު މަޖިލީހަށް އަންގާފައިވާ ކަމަށް އަސްލަމް ވިދާޅުވިއެވެ. 

މީގެ އިތުރުން، ރައީސް ސޯލިހު ނަން ފޮނުވި ހަތަރު ސަފީރެއްގެ ނަންތައް ވެސް އަނބުރާ ގެންދިޔުމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު މިމަހު 21 ވަނަ ދުވަހު މަޖިލީހަށް ސިޓީފުޅެއް ފޮނުއްވާފައިވާ ކަމަށް އަސްލަމް ވިދާޅުވިއެވެ.

އެގޮތުން، ނަން އަނބުރާ ގެންދެވި ސަފީރުންނަކީ، ޕާކިސްތާނަށް ކަނޑައެޅި ސަފީރު ސެލީނާ ހަދީޖާ ނަޖީހާއި، ޔުނައިޓަޑް އަރަބް އެމިރޭޓްސް (ޔޫއޭއީ) އަށް ކަނޑައެޅި ސަފީރު މިދްފާ ނައީމް އާއި، ޕީޕަލްސް ރިޕަބްލިކް އޮފް ޗައިނާ އަށް ކަނޑައަޅާފައިވާ ސަފީރު ހުދާ އަލީ ޝަރީފްގެ އިތުރުން ބަންގްލާދޭޝް އަށް ކަނޑައެޅި ސަފީރު ޝިއުނީން ރަޝީދުގެ ނަންފުޅެވެ.