ރައްޔިތުން މަޖިލީހުގެ މި ހިނގާ މިއަހަރުގެ ފަހު ދައުރު އަންނަ މަހުގެ 7 ވަނަދުވަހުގެ ނިޔަލަށް ދަންމާލަން މަޖިލީހުން ފާސްކޮށްފިއެވެ.

މަޖިލީހުގެ މި ދައުރު ދަންމާލަން މަޖިލީހުން ފާސްކުރީ މިއަދުގެ ޖަލްސާގައި ބައިވެރިވެޑައިގެންނެވި 63 މެމްބަރުންގެ ތެރެއިން 51 މެމްބަރުންގެ ތާއީދާއެކުއެވެ. އެކަމަށް ނުފެންނަކަމަށް އެއް މެމްބަރަކު ވޯޓް ދެއްވިއިރު ވަކިގޮތަކަށް ވޯޓް ނުދެއްވާ 6 މެމްބަރަކު ތިއްބެވިއެވެ. އެކަން ފާސް ކުރަން ބޭނުން ވަނީ 27 މެންބަރުންގެ ވޯޓު ކަމުން، މަޖިލީހުގެ މިދައުރު އަންނަ މަހު 7 އަށްވަނީ ދިގުކުރެވިފައެވެ. 

މަޖިލީހުގެ ދައުރު ދަންމާލަން ނިންމެވި ސަބަބެއް ކަމުގައި މަޖިލީހުގެ ރައީސް މުހައްމަދު އަސްލަމް ވިދާޅުވީ، މި ހިނގަމުންދާ ދައުރު ނިމެން ކައިރިވެފައިވާއިރު، ދައުލަތުގެ ބަޖެޓް ފާސްކުރުން ހިމެނޭހެން މި ދައުރުގައި ނިންމަންޖެހޭ މުހިންމު ގިނަ ކަންކަން ނުނިމި ހުރުމެވެ. 

Advertisement

ރައްޔިތުންގެ މަޖިލީހުގެ ރައީސްގެ މަގާމުގައި ކުރިން ހުންނެވި މައްޗަންގޮޅީ މެދު ދާއިރާގެ މެންބަރު މުހައްމަދު ނަޝީދު އެ މަގާމުން ވަކި ކުރުމަށް މަޖިލީހުގެ މެޖޯރިޓީ ޕާޓީ، އެމްޑީޕީން ހުށަހެޅުމުން، މައްސަލަ ކުރިއަށް ނުގެންދެވި، މަޖިލީހުގެ އެހެން ކަންކަން ވެސް ކުރިއަށް ނުގެންދެވުގެ ސަބަބުން، ނަޝީދު އިސްތިޢުފާ ދެއްވަންދެން މަޖިލީސް އޮތީ ހުއްޓުމަކަށް އައިސްފައެވެ. 

އޭގެ ނަތީޖާއެއްގެ ގޮތުން ބަޖެޓްގެ މަސައްކަތްވެސް ފެށުނީ ފަށަންޖެހޭ ތާރީޚަށްވުރެ ލަހުންނެވެ. އަދި އިއްޔެ ބަޖެޓުގެ ބަހުސް މަރުހަލާ ނިމިފައިވީ ނަމަވެސް ސަޕްލިމެންޓްރީ ބަޖެޓުގެ މަސައްކަތް ކުރަންޖެހުމާއިއެކު އެހެން މަސައްކަތްތައް އަނެއްކާވެސް ވަނީ ލަސްވެފަ އެވެ.

ބަޖެޓްގެ މައްސަލައިގެ އިތުރުން, އައު ސަރުކާރުގެ ކެބިނެޓްގައި ހިމެނޭ ވަޒީރުންނަށް ރުހުން ދިނުމުގެ މަސައްކަތާ، މަޖިލީހުގެ ރުހުން ބޭނުންވާ އެހެން މަގާމު ތަކުގެ މައްސަލަވެސް މިހާރު ވަނީ މަޖިލީހަށް ހުށަހެޅިފައެވެ. އެކަންކަން ކޮމިޓީ މަރުހަލާގައި އޮތްއިރު، އެ ނިންމައި ވޯޓަށް އެހުންވެސް މިދައުރުގައި ނިންމަން ޖެހެއެވެ.