ނިމިދިޔަ ރައީސް އިބްރާހިމް މުހައްމަދު ޞާލިހުގެ ސަރުކާރަށް އަމާޒުކޮށް ކުރި ތުހުމަތުތަކުގެ ޙަޤީގަތް ދެނެގަނެ، އެކަން ރައްޔިތުންނަށް ހާމަކުރުމުގެ ގޮތުން ޕަބްލިކް އިންކުއަރީއެއް ހިންގުމަށް ގޮވާލާ ޤަރާރެއް ރައްޔިތުންގެ މަޖިލީހަށް ހުށައަޅައިފިއެވެ.

ތިނަދޫ އުތުރު ދާއިރާގެ މެންބަރު ޢަބްދުލް މުޣުނީ ހުށަހެޅުއްްވި އެ ޤަރާރުގެ ފުރަތަމަކިޔުން ވަނީ މިއަދުގެ ޖަލްސާއަށް އިއްވާފައެވެ.

ޢަބްދުލް މުޣުނީ ހުށައެޅުއްވި ޤަރާރުގައި ބުނެފައިވަނީ ނިމިދިޔަ ސަރުކާރުގެ ސިޔާސަތުތަކާއި ނިންމާފައިވާ ނިންމުންތަކާއި ބޭރު ޤައުމުތަކާއިއެކު، ހަދާފައިވާ އެއްބަސްވުންތަކުގެ ސަބަބުން ރާއްޖޭގެ ޤައުމީ ސަލާމަތާއި، ސިޔާދަތަށް އަސަރުކޮށްފައިވާ ކަމަށް، ބުނެ އޭރުގެ އިދިކޮޅުން ތުހުމަތުތަކެއް ކޮށްފައިވާ ކަމަށެވެ.

އޭގެ ސަބަބުން، ގިނަ ރައްޔިތުންތަކެއް ވަނީ ކަންބޮޑުވުން ފާޅުކޮށް، މިކަމާއި ގުޅޭ ހަޤީގަތްތައް ހާމަކުރުމަށް ގޮވާލާފައިވާއިރު އެފަދަ އެއްވެސް ޢަމަލެއް ނުވަތަ ސިޔާސަތެއް ކުރީ ސަރުކާރުން ތަންފީޒުކޮށްފައިވޭތޯ ދެނެގަންނަންޖެހޭ ކަމަށް އެ ގަރާރުގައި ވެއެވެ. 

މުޣުނީގެ އެ ޤަރާރުގައި ވަނީ އެ ތުހުމަތުތަކާއި ގުޅޭގޮތުން، އެކަންކަމުގެ ތެދު ދޮގު ދެނެގަނެ، ރައްޔިތުންނަށް ހާމަކޮށްދިނުމުގެ ގޮތުން ޕަބްލިކް އިންކުއަރީއެއް ހިންގުމަށް އެދިފައެވެ.

އެމްޑީޕީން މިފަދަ ގަރާރެއް ހުށަހަޅުއްވާފައި ވާއިރު، ކުރީ ސަރުކާރުން ހަމައެކަނި އިންޑިޔާއާއި އެކު ސިޔާސީ ގުޅުންތަކާއި ގުޅޭ 100 އަށްވުރެ ގިނަ އެއްބަސްވުން މިިދިޔަ 5 އަހަރުގެ ތެރޭގައި ޤާއިމުކޮށްފައިވާކަމަށް ރައީސުލްޖުމްހޫރިއްޔާގެ އޮފީހުން ހާމަކޮށްފައިވެއެވެ. އޭގެ ތެރޭގައި ރާއްޖޭގެ މިނިވަންކަމާއި އިސްތިގުލާލަށް ގެއްލުންވާނެ ކަންކަން ހުރިއިރު އެކަންކަން އެއްވަސްވުންތަކުން އުނި ކުރައްވާނެ ކަމަށް އެ އޮފީހުން ވަނީ ބުނެފައެވެ.