ކެންސަރު ބައްޔަށް ފަރުވާ ހޯއްދެވުމަށް ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ރާއްޖެއިން ބޭރަށް ވަޑައިގަތުމަށް ހަމަޖެހިއްޖެއެވެ.

ވަޒީރު ރަމީލާ ކުރައްވައިފައިވާ ފޭސްބުކް ޕޯސްޓެއްގައި ވިދާޅުވެފައިވަނީ ކެންސަރު ބައްޔަށް ފަރުވާ ހޯއްދެވުމަށް މިއަދު ރާއްޖެއިން ބޭރަށް ފުރައިވަޑައިގަތުމަށް ހަމަޖެހިފައިވާ ކަމަށެވެ.

ވަޒީރު ރަމީލާ ފޭސްބުކްގައި މިއަދު ހެނދުނު ކުރެއްވި ޕޯސްޓެއްގައި ވިދާޅުވީ އޭނާ ކެންސަރަށް ޑައިގްނޯސްވުމާ ގުޅިގެން ކީމޯ އާއި ރޭޑިއޭޝަން ތެރަޕީ ނެގުމަށް ރާއްޖެއިން ބޭރަށް ވަޑައިގަންނަވަން ނިންމަވާފައިވާ ކަމަށެވެ. އަދި ބަލި ޖެހިފައިވާކަން އެނގުނީ ކެންސަރުގެ އެޑްވާންސް ސްޓޭޖުގައި ހުއްޓާ ކަމަށް އޭނާ ވިދާޅުވެފައިވެއެވެ.

ޑައިގްނޯސް ވެފައިވަނީ ކޮން ބާވަތެއްގެ ކެންސަރަކަށް ކަމެއް ޑރ ރަމީލާ ވިދާޅުވެފައެއް ނުވެއެވެ.

ޑރ ރަމީލާގެ ފޭސްބުކް ޕޯސްޓުގައި ވިދާޅުވެފައިވަނީ އެންމެނާއި ވަކިވެގެން ދަނީ ވަރަށް ބަރު ހިތަކާއި އެކުގައި ކަމަށާއި، اللهގެ އިރާދަފުޅުން އަދި ބައްދަލުވާނެ ކަމަށެެވެ. އަދި ހެޔޮ ދުޢާ ކޮށްދިނުމަށް ރަމީލާ ވަނީ އެދިވަޑައިގެންފައެވެ.