ރާއްޖޭގެ ވެރިކަންކުރާ މައި ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ)ގެ ސެކެރެޓަރީ ޖެނެރަލްގެ މަގާމުގައި ހުންނެވި ކުރީގެ ފުވައްމުލަކު މެދު ދާއިރާގެ މެންބަރު ޝިފާގު މުފީދު (ހިސްޓޯ) އެ ޕާޓީން އިސްތިއުފާ ދެއްވައިފިއެވެ.

އިސްތިއުފާ ދެއްވިކަން އަންގައި ޝިފާގު ޕީއެންސީގެ ރައީސް، އަދި ރައީސުލްޖުމްހޫރިއްޔާ ޑރ. މުހައްމަދު މުޢިއްޒަށް ފޮނުއްްވި ސިޓީގައި ވިދާޅުވެފައިވާ ގޮތުން، ޕާޓީ އާއި ސަރުކާރުގެ މަގާމުތަކަށް މީހުން އައްޔަނު ކުރަމުންދާ ގޮތުން ދިވެހިންގެ ރާއްޖެ ދިވެހިންނަށް ހޯދައި ދެވޭނެ ކަމަށް ގަބޫލު ނުކުރާތީ، ޕާޓީގެ އެސްޖީގެ މަގާމުންނާއި ޕާޓީންވެސް އޭނާ އިސްތިއުފާ ދިންކަމަށެވެ. 

ޕީއެންސީން ވަކިވެވަޑައިގެންނެވުމަށްފަހު ހިސްޓޯ ވަނީ ކުރީގެ ރައީސް ޔާމީން އަބްދުލްގައްޔޫމް ގެ އައު ޕާޓީ، ޕީޕަލްސް ނެޝަނަލް ފްރޮންޓް، ޕީއެންއެފް އާ ގުޅިވަޑައިގެންފައެވެ. 

Advertisement

އެމްޑީޕީގެ މެންބަރެއްގެ ގޮތުގައި ކުރިން ފުވައްމުލަކު މެދު ދާއިރާގެ ރައްޔިތުންގެ މަޖިލީހުގެ ގޮޑިއަށް އިންތިޚާބުވި ހިސްޓޯ ޕީއެންސީގެ ސެކްރެޓަރީ ޖެނެރަލްގެ މަގާމަށް އައްޔަންކޮށްފައިވަނީ ޕީޕީއެމްގެ ކައުންސިލްގެ މަގާމަށް އިންތިޚާބުކުރުމަށް ބޭއްވި އިންތިޚާބުގައި ނާކާމިޔާބުވެފައިވަނިކޮށެވެ.

ހިސްޓޯ ޔާމީން ގެ ޕާޓީއާ ގުޅެން ނިންމަވާފައިވާއިރު، ރައީސް ޔާމީން ގެ އައު ޕާޓީ އުފެއްދުމުގެ ހުއްދަ އިއްޔެ އީސީން ވަނީ ދީފައެވެ. އެ ޕާޓީގެ އަމާޒަކީ 24 ގަޑިއިރު ތެރޭގައި 3000 ފޯމު ހަމަ ކުރުން ކަމަށް ޕާޓީ އުފެއްދުމުގައި އިސްކޮށް ހަރަކާތްތެރިވާ ފަރާތްތަކުން ވަނީ ބުނެފައެވެ. 

އެހެންކަމުން ޔާމީންއަށް ތާއީދުކުރާ ހުރިހާ ފަރާތަކުންވެސް އެ ޕާޓީއާ ގުޅިވަޑައިގެންނެވުމަށް އެޕާޓީން ވަނީ އެދިފައެވެ.