ދަ ޑިމޮކްރެޓްސްގެ އެތެރޭގެ ފުރަތަމަ އިންތިޚާބުގެ ވޯޓުލުން އެ ޕާޓީގެ މެމްބަރުން ތިބި ހުރިހާ ރަށެއްގައި ފަށައިފި އެވެ.
މިއިންތިޚާބަކީ އެ ޕާޓީގެ ރައީސާއި 3 ނައިބު ރައީސުން ހޮވުމުގެ އިތުރުން ދާއިރާތަކުގެ ރައީސުންނާއި ރަށު ރައީސް، އަތޮޅު ރައީސް، މަޖިލިސް ދާއިރާތަކުގެ ރައީސް، އިންތިޚާބު ކުރުމަށް ކުރިއަށް ގެންދާ އިންތިޚާބެއްކަމަށް ދަ ޑިމޮކްރެޓްސްއިން ވަނީ ހާމަކޮށްފަ އެވެ.
މީގެ އިތުރުން ޔަންގް ޑިމޮކްރެޓްސް ނުވަތަ ޒުވާނުންގެ ރައީސް ހޮވުން އޮންނާނެ ކަމަށްވެސް އެޕާޓީން ވަނީ މައުލޫމާތު ދީފައެވެ.
ޑިމޮކްރެޓްސްގެ އެތެރޭގެ އިންތިޚާބުގައި ޕާޓީގެ ރައީސްކަމަށް ދެބޭފުޅުން ވާދަކުރައްވައެވެ.
އެއީ ނިމިދިޔަ ރިޔާސީ އިންތިޚާބުގައި އެޕާޓީން ވާދަކުރެއްވި ރިޔާސީ ކެންޑިޑޭޓްގެ ރަނިން މޭޓް އަދި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު އާއި ހެންވޭރު ހުޅަނގު ދާއިރާގެ މެންބަރު ހަސަން ލަތީފް އެވެ.
ޑިމޮކްރެޓްސްގެ އެތެރޭގެ އިންތިޚާބުގައި އެ ޕާޓީގެ 1043 މަޤާމަށް މީހުން ހޮވުމަށް ވަނީ ހަމަޖެހިފަ އެވެ. އޭގެ ތެރެއިން 271 މަޤާމަށް މީހުން އިންތިޚާބުވެފައި ވާއިރު މިހާރު ކުރިއަށްދާ އިންތިޚާބުގައި 35 މަގާމަކަށް މެމްބަރުން އައްކަންކުރެވިގެންދާނެ އެވެ.
އެޕާޓީން ބުނީ 721 ހުސް މަޤާމް އޮތް ކަމަށާއި، އޭގެތެރޭގައި ރަށު އެސެމްބްލީ އާއި އަތޮޅު އެސެމްބްލީތަކުގެ ބައެއް މަޤާމްތައް ހިމެނޭ ކަމަށެވެ.
މިއަދު ކުރިއަށްދާ ޑިމޮކްރެޓްސްގެ އެތެރޭގެ އިންތިޚާބުގައި ވޯޓުލުމުގެ ޙައްޤު 5883 ފަރާތަކަށް ލިބިގެންދާކަން ޕާޓީން ވަނީ ހާމަކޮށްފަ އެވެ.
ކުރީގެ ރައީސް މުޙައްމަދު ނަޝީދު އިސްވެ ހުންނަވައިގެން އުފެއްދި ޑިމޮކްރެޓްސްއިން ވަނީ މިއަހަރު ބޭއްވި ރިޔާސީ އިންތިޚާބުގައި ވާދަކޮށް ރަނގަޅު ކާމިޔާބީއެއް ހޯއްދަވާފަ އެވެ.
އެގޮތުން ރިޔާސީ އިންތިޚާބުގައި ތިންވަނައަށް އެންމެ ގިނަ ވޯޓު ހޯދާފައި ވަނީ ދަ ޑިމޮކްރެޓްސްއިން ނެވެ. އެ ޕާޓީއަކީ މި ވަގުތު މަޖިލީހުގެ މައިނޯރިޓީ ޕާޓީކަން ވެސް ފާހަގަކޮށްލެވެ އެވެ.
Advertisement
This content is created and paid for by advertisers and does not involve Voice Journalists
