ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ، މަގާމުން ވަކި ކުރުމަށް ހުށަހަޅާފައިވާ މައްސަލަ މާދަމާ ބޭއްވުމަށް އެޖެންޑާކޮށްފިއެވެ.

ފަންސާސް މެމްބަރުންގެ ސޮޔާއިއެކު ހުށަހަޅާފައިވާ އީވާގެ އިތުބާރު ނެތްކަމުގެ މައްސަލައިގެ ޤަރާރު މަޖިލީހަށް ބަލައިގަނެ، އެ މައްސަލައިގެ ނޯޓިސް އީވާ އަށް ފޮނުވާފައިވަނީ ނިމިގެންދިޔަ ނޮވެންބަރު މަހުގެ 20 ވަނަ ދުވަހުއެވެ.

އީވާ ވަކިކުރުމަށް ހުށަހެޅި ގަރާރުގައި ސޮއިކުރައްވާފައިވަނީ އެމްޑީޕީއަށް ނިސްބަތްވެޑައިގަންނަވާ 49 މެމްބަރުންނާއި، އަމިއްލަ މެމްބަރެއްގެ ގޮތުގައި މަޖިލީހުގައި އިންނަވާ ނޮޅިވަރަމް ދާއިރާގެ މެމްބަރު މުޙައްމަދު ނަޝީދު އަބްދުﷲ އެވެ.

މަޖިލީހުގެ އާންމު ކޮމެޓީއިން ވަނީ މިޖަލްސާގައި ކޮންމެ މެމްބަރަކަށްވެސް 3 މިނިޓަށް ވުރެ އިތުރު ނުވާނެ ގޮތުގެ މަތިން 1 ފުރުސަތު ދިނުމަށް ކަނޑައަޅާފައެވެ.

މަޖިލީހުގެ ނައިބު ރައީސް ކަމުގެ މަގާމުން އީވާ ވަކިކުރުމަށް ހުށަހެޅި ސަބަބެއްކަމަށް އެމްޑީޕީން ބުނެފައިވަނީ، މަޖިލީހުގެ ކުރީގެ ރައީސް ނަޝީދުގެ އިތުބާރު ނެތްކަމުގެ މައްސަލާގައި އީވާ އަމަލުކުރެއްވީ ޒާތީ މަސްލަހަތު އިސްކުރައްވައިގެން ކަމަށެވެ. އެހެންކަމުން ޕާޓީގެ މެންބަރުންގެ އިތުބާރު އީވާ އަށް ގެއްލިފައިވާކަމަށް އެޕާޓީއިން ބުނެފައިވެއެވެ.

އެމްޑީޕީން މީގެ ކުރިން މަޖިލީހުގެ ރައީސް ކަމުގައި ހުންނެވި މުހަންމަދު ނަޝީދު ވަކިކުރުމަށް 49 މެންބަރުންގެ ސޮޔާއިއެކު ގަރާރެއް ހުށަހެޅިއިރު، ތަފާތުއެކި ބަހަނާތައް ދައްކަވައި އެމައްސަލަ ކުރިއަށް ނުގެންގޮސް ވަނީ ލަސްކޮށްފައެވެ. ނަމަވެސް ފަހުން ނަޝީދު ވަނީ މަޖިލީހުގެ ރައީސްގެ މަގާމުން އަމިއްލަފުޅަށް އިސްތިއުފާ ދެއްވާފައެވެ.

އޭގެފަހުން މެންބަރުންގެ މެދުގައި ވޯޓެއްނަގައި، އެ ވޯޓް ކާމިޔާބު ކުރައްވައި މަޖިލީހުގެ ރައީސަކަށް އިންތިޚާބުވެވަޑައިގަތީ، އެމްޑީޕީގެ ޕީޖީ ގުރޫޕްގެ ލީޑަރަކަށް ހުންނެވި މުޙައްމަދު އަސްލަމެވެ.