އަމިއްލަ މަގާމެއް ދިފާއުކުރުމަށްޓަކައި ޑިމޮކްރެޓިކް އުސޫލުތަކާއި ހަމަތައް ކަފުންކުރާ މީހެއްކަމުގައި ނުވާނޭކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް އީވާ އަބްދުالله ވިދާޅުވެއްޖެއެވެ.

ރައްޔިތުންގެ މަޖިލީހުގެ ނައިބު ރައީސް ކަމުގެ މަގާމުން އީވާ ދުރުކުރުމަށް މިއަދު ކުރިއަށް ގެންދެވުނު ޖަލްސާގައި ދިފާއުވާން އެރުވި ފުރުސަތުގައި ވާހަކަ ދައްކަވަމުން އީވާ ވިދާޅުވީ، އަމިއްލަ މަންފާއަކަށްޓަކައި ޑިމޮކްރެޓިކްގެ ހަމަތަކާއި އުސޫލުތަކާއި ދެކޮޅަށް މަސައްކަތްކުރާ މީހެއްކަމުގައި ދުވަހުވެސް ވެވަޑައިގުނަންނަވާނޭކަމަށެވެ. އީވާ ވިދާޅުވީ، ސިޔާސީ ގޮތުން ބަދަލުހިފައި ޒާތީ ނުވާނޭކަމަށާއި، ވައްކަމުގެ ހާއްޔެއްގައި ތާށިވެފައި ނުހުންނަވާނޭކަމަށެވެ.

މަގާމުން ވަކިކުރުމަށް އެމްޑީޕީން މަސައްކަތް ފެށީ އެސަރުކާރުގެ ނާގާބިލްވާހަކަ އާއި، ކުރަމުންދާ ވައްކަންތަކުގެ ވާހަކަ ފާޅުގައި ދައްކަންފެށުމުން ކަމަށް އީވާ ވިދާޅުވިއެވެ.

އީވާ ވިދާޅުވީ، ނިމިގެންދިޔަ އެމްޑީޕީ ސަރުކާރާ ދެކޮޅަށް ބަސްބުނެ، އެ ސަރުކާރުގެ ހިޔާނާތްތަކުގެ ވާހަކަތައް ދައްކަވަންފެށުމުން، އެސަރުކާރުން އޭނާއާއި ދިމާކުރާނޭކަން މާކުރިންވެސް އެނގިވަޑައިގަންނަވާކަމަށެވެ.

އެމްޑީޕީ ދޫކޮށްލުމާއި ގުޅޭގޮތުން ވާހަކަ ދައްކަވަމުން އީވާ ވިދާޅުވީ، އެޕާޓީ އާއި އޭރުގެ ސަރުކާރު ދޫކޮށް ނުކުތީ، ގަބޫލުނުކުރެވޭ ހަމަ ތަކަކާއި އުސޫލުތަކެއްތެރޭގައި ތާށިވެފައި ހުންނަވަން ބޭނުންނުވާތީކަމަށެވެ.

މީގެ އިތުރުން އީވާ ވަނީ، މަޖިލީހުގެ ނާއިބު ރައީސާގެ މަގާމަށް އޭނާ އަކީ ނާގާބިލް ބޭފުޅެއް ކަމަށް އެއްވެސް ޕާޓީ އެއްގެ މެންބަރެއް ދެކެނުލައްވާނެ ކަމަށް ވިދާޅުވެފައެވެ. އަދި އެ މަގާމުގެ މަސްއޫލިއްޔަތުތައް އަދާ ކުރެއްވީ ގާނޫނު އަސާސީ އާއި، މަޖިލީހުގެ ގަވާއިދުގެ އިތުރުން ސްޕްރީމް ކޯޓުގެ ހުކުމާއި އެއްގޮތަށް ކަމަށް ވެސް ވިދާޅުވި އެވެ.