އަމިއްލަ މަގާމެއް ދިފާއުކުރުމަށްޓަކައި ޑިމޮކްރެޓިކް އުސޫލުތަކާއި ހަމަތައް ކަފުންކުރާ މީހެއްކަމުގައި ނުވާނޭކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް އީވާ އަބްދުالله ވިދާޅުވެއްޖެއެވެ.
ރައްޔިތުންގެ މަޖިލީހުގެ ނައިބު ރައީސް ކަމުގެ މަގާމުން އީވާ ދުރުކުރުމަށް މިއަދު ކުރިއަށް ގެންދެވުނު ޖަލްސާގައި ދިފާއުވާން އެރުވި ފުރުސަތުގައި ވާހަކަ ދައްކަވަމުން އީވާ ވިދާޅުވީ، އަމިއްލަ މަންފާއަކަށްޓަކައި ޑިމޮކްރެޓިކްގެ ހަމަތަކާއި އުސޫލުތަކާއި ދެކޮޅަށް މަސައްކަތްކުރާ މީހެއްކަމުގައި ދުވަހުވެސް ވެވަޑައިގުނަންނަވާނޭކަމަށެވެ. އީވާ ވިދާޅުވީ، ސިޔާސީ ގޮތުން ބަދަލުހިފައި ޒާތީ ނުވާނޭކަމަށާއި، ވައްކަމުގެ ހާއްޔެއްގައި ތާށިވެފައި ނުހުންނަވާނޭކަމަށެވެ.
މަގާމުން ވަކިކުރުމަށް އެމްޑީޕީން މަސައްކަތް ފެށީ އެސަރުކާރުގެ ނާގާބިލްވާހަކަ އާއި، ކުރަމުންދާ ވައްކަންތަކުގެ ވާހަކަ ފާޅުގައި ދައްކަންފެށުމުން ކަމަށް އީވާ ވިދާޅުވިއެވެ.
އީވާ ވިދާޅުވީ، ނިމިގެންދިޔަ އެމްޑީޕީ ސަރުކާރާ ދެކޮޅަށް ބަސްބުނެ، އެ ސަރުކާރުގެ ހިޔާނާތްތަކުގެ ވާހަކަތައް ދައްކަވަންފެށުމުން، އެސަރުކާރުން އޭނާއާއި ދިމާކުރާނޭކަން މާކުރިންވެސް އެނގިވަޑައިގަންނަވާކަމަށެވެ.
"ހަގީގަތަކީ ނާގާބިލް، ކިބުރުވެރި ސަރުކާރަކާ ދިމާލަށް އަޅުގަނޑު ނާގާބިލް ކިބުރުވެރި ސަރުކާރެކޭ ބުނީ، ހަގީގަތަކީ އެސަރުކާރުން މާބޮޑަށް އަޅުގަނޑާ ނުރުހުނީ، އަދި އަޅުގަނޑުވެސް އެސަރުކާރާ މާބޮޑަށް ނުރުހުނީ،"
އީވާ އަބްދުالله
އެމްޑީޕީ ދޫކޮށްލުމާއި ގުޅޭގޮތުން ވާހަކަ ދައްކަވަމުން އީވާ ވިދާޅުވީ، އެޕާޓީ އާއި އޭރުގެ ސަރުކާރު ދޫކޮށް ނުކުތީ، ގަބޫލުނުކުރެވޭ ހަމަ ތަކަކާއި އުސޫލުތަކެއްތެރޭގައި ތާށިވެފައި ހުންނަވަން ބޭނުންނުވާތީކަމަށެވެ.
"މިދޫކޮށްލަނީ ބޮޑު ސަރުކާރަކާ، އަދި އެސަރުކާރާ ގުޅިފަވާ އާރާ ބަރާ، އެސަރުކާރާ ގުޅިފަވާ ރައްޔިތުންގެ މަޖިލީހުގެ ފުރިހަމަ އަގްލަބިއްޔަތުކަން އެނގިހުރެ އަޅުގަނޑުމެން ނިކުތީ، މާބޮޑު މޮޅެއް ވާނޭކަމަކަށް ނޫން އަޅުގަނޑުމެން ނުކުތީ، އެހެންނަމަވެސް ގަބޫލުނުކުރެވޭ ތަނެއްގައި ތާށިވެފައި ނުތިބެންވެގެން އަޅުގަނޑުމެން ނުކުތީ،"
އީވާ އަބްދުالله
މީގެ އިތުރުން އީވާ ވަނީ، މަޖިލީހުގެ ނާއިބު ރައީސާގެ މަގާމަށް އޭނާ އަކީ ނާގާބިލް ބޭފުޅެއް ކަމަށް އެއްވެސް ޕާޓީ އެއްގެ މެންބަރެއް ދެކެނުލައްވާނެ ކަމަށް ވިދާޅުވެފައެވެ. އަދި އެ މަގާމުގެ މަސްއޫލިއްޔަތުތައް އަދާ ކުރެއްވީ ގާނޫނު އަސާސީ އާއި، މަޖިލީހުގެ ގަވާއިދުގެ އިތުރުން ސްޕްރީމް ކޯޓުގެ ހުކުމާއި އެއްގޮތަށް ކަމަށް ވެސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
